Read Ntcham Néhémie 2 Bible Online

Néhémie 2 - Ntcham bible

Néhémie 2

¹Dalba Niisan ŋmaliu poon, ubɔti Aritaseerseesi nín kāl̀ dibeel abin mmuŋku poonee, ndaam nìn yú u-nimbiin ní m yōoǹ ki tīī-u. Doooo nee, maa láá pée yúl̀ u-nimbiin nì kunimbaau míǹ ki ká.

²Ubɔti nìn bālifì-mi yii: «Ba pu ní a-nimbiin bóob́ míǹ? A būǹ níii? Kunimbaau di cáá-saaa?» Niinee ní tifaandi tiba cúú-mi tikpil.

³Ní m bí ubɔti yii: «Ubɔti ń nīn cáá mmaŋfafɔkɔn baabadal! Mana ní m-nimbiin kaa làá nīn bóob́, ŋyunti ŋun ní kitiŋ kin poon bi síb́ m-naanjabee kpántì adigbun ní ŋŋmi wùn̄ ki-punuubee[2]?»

⁴Ní ubɔti bālifì-mi yii: «Ba ní a là ḿ ŋá kí tīī-si?» Ní m mēē yilpu Nimbɔtiu,

⁵ní ki bí ubɔti yii: «Ti-baa ubɔti, an yaa ŋān̄ a-cee ní man a-tɔntɔnliu bɔti yaa fáatiǹ-si, á tɔ̄-mi Juuda tiŋkin laakin bi síb́ m-naanjabee, ḿ cùú fàtīí mā-kì.»

⁶Unimpubɔti nìn kā ki kɔ́ĺ ubɔti ní u bālifì-mi yii: «A-saŋŋu gbanti làá fōō iwiin iŋa? Ní ŋyunti ŋulɔŋu ní a làá fàtīí gítiń?» An nìn kítì ubɔti cee ú yàntī ḿ cù, ní m yóoǹ-u ŋyunti ŋun m làá gítińee[3].

⁷Ní m gíti bí ubɔti yii: «A yaa bàà kíikí kí tīī-mi kugbɔŋu ḿ cáá tīī ntimu mun bí Eefiraati ŋwìiń jeetilaŋki púee gɔminab, bí pɔ̄-mi nsan ḿ jītí bi-timmun kí cù Juuda tiŋkin.

⁸Á bàà gíti tīī-mi kugbɔŋu kubɔ mun ḿ cáá tīī sii ubɔti saakpeeliu Asaafi ú tīī-mi idɔ ḿ cáá kpáá sintil difɔkɔku kun yú ki pìl̄ kunimbɔtidiiyee punyɔmmu nì kitiŋ gundi nì kudii kun m làá nīn kóòyee.» Ubɔti nìn tīī-mi kugbɔŋu gbanti, kun puee Unimbɔti nìn yú m-boon.

⁹M nìn cūtì ntimu mun bí Eefiraati mɔɔl ŋwìiń jeetilaŋki púee gɔminab cee, ní ki dū tigbɔn tin ubɔti nìn tīī-mee ki tīī-bi. Ubɔti nìn yāntì bijanjakpilib nì bitanjakaliibi céeǹ-mi.

¹⁰Sambalati un sá Oorɔn tiŋkinee nì uamɔnja Toobiya, u-taapu yɔu nín gbìl̄ yii m bāańee, an kaa mɔ́ɔkiǹ-bi yii ubɔ dɔ́miń ki nyàab̀ Isirayeel yab ŋanti.

¹¹M bàn̄ Jeerusaleemee, m kāl̀ iwiin ita ní.

¹²Kunyeeuee, man nì bininjab biba nìn yíkì, ama maa nìn pée tùkū báà ubɔ tin Unimbɔti nìn dūu ŋá m-pɔbilin ḿ ŋá kí tīī Jeerusaleemee. Maa nìn cáá kuwaŋkuluu kubɔ ki kútì kimaŋ kin m nìn kēe pu.

¹³M nìn dūu dī Ditantakal punyɔkɔki ki nyáń ki cūtì Draagɔn nyimbuliŋu nì titampuntan punyɔkɔki. M nìn kpēē Jeerusaleem gundi ki tin kátì ní ki ká yii ajan bátì bátì ki lítì, ní punuubi wùn̄ ŋŋmi.

¹⁴Ní m nìkī ki nín cá Nnyimbul punyɔkɔki watil, ki jítì ubɔti bɔɔku caŋin, ní nsan nìn gíti kpá kimaŋ kin m kēe ń dī.

¹⁵Kunyeeu gbanti ní m fātìi tí dī ki nín jɔ́ḿ Seedrɔn bùmbiki watil pú ki pée bí ki kpèé Jeerusaleem tiŋki gundi, ní ki fātìi gítì m-boon ki dī Ditantakal punyɔkɔki ki kɔ́.

¹⁶Kitiŋ pu bɔsoonliibi kaa nìn nyí laakin m cūtèe, kaa nyí tin mun m ŋée. Kí cáá sāā ŋyunti gbantee, maa nìn tùkū Juuda yab nì bisaraaŋaliibi nì akpambal nì bibɔsoonliibi nì bin kɔkɔ nìn bí ki kpèé atuunee kun pu ní m dɔ́mińee.

¹⁷Niinee ní m bí-bi yii: «Nimbi ni-ba ká nnaabu ŋun poon ti kɔ́ee. Jeerusaleem tiŋki kpántì adigbun ní ki-punuubi wùn̄ ŋŋmi. Yīkìmaan tí fàtīí mā Jeerusaleem tiŋki guŋŋi kí nyā icoo ni.»

¹⁸Ní m máafì-bi m-Nimbɔtiu nín bīī m-pu puee, nì ubɔti nín sòon̄ nì mi puee. Niinee ní bi téeń yii: «Tí yīkì kí māmaan.» Ní bi yíkì nì kunyannyaau ki kíĺ ditummɔntiil gbanti.

¹⁹Sambalati un sá Oorɔn tiŋkinee nì u-taapu yɔu Toobiya uamɔnja, nì ulaalibuja Geeseem nín gbìl̄ an bɔtee, ní bi kíĺ ki bíi bèel̄-ti, ní ki kpèé-ti fám ki lì yii: «Ba ní ni bíi ŋáań nan ní? Ni là kí já nì ubɔti deeyaaa?»

²⁰Ní m kíí-bi yii: «Yilpu Nimbɔtiu u-ba di làá tīī-ti ŋŋmam. Timbi u-tɔntɔnliibi làá yīkì kí fàtīí mā ti-tiŋki. Ama nimbee, naa cáá nsan kí fōō Jeerusaleem tiŋki wanti tiba. Naa tí cáá ki-pu mpɔn ŋubɔ, ní ubɔ kpá kí dāá téetí ni-pu dalba!»