Read Ntcham Néhémie 4 Bible Online

Néhémie 4 - Ntcham bible

Néhémie 4

¹Ŋyunti ŋun Sambalati nì Toobiya nì bilaalibub nì Amɔn yab nì Asidoodi yab gbìl̄ yii Jeerusaleem gundi mātam bíi cá nyɔkɔpu, ní bi fātìi bíi māā ki ŋēeb̀ digundi jaŋŋi ŋin lítèe, ní bi fōō mbum tiŋan pu[7].

²Bi nìn kpáfì ki bóob́ kí dāá já nì Jeerusaleem yab kí cáań fìkil fikil.

³Niinee ní ti mēē ti-Nimbɔtiu, ní bi-puee, ti lēē binib ki yóoǹ sintil bí nīn cí-ti ŋwiimpu nì kunyeeu.

⁴Ama ní Juuda yab bíi gbùkum̄ yii: «Ndigbuntam kpúkú tikpil, ní bin bíi fèe gīī an dáá gbíntìi dɔ̄. Taa làá ŋmā kí fàtīí mā digundi nee.»

⁵Ní ti-nannanliibi bí ki lì yii: «Bi làá nīn pée kā kaa nyí, kaa wāĺ ní tí dāá túuǹ-bi kí nà-bi ní kí yàntī digundi mātam ń gbèen̄.»

⁶Juuda yab bin nìn kóò bi-kansikinee dɔ́miń ki tùkū-ti ŋfunyɔm saalaa pu yii: «Laakin kamaa ní ni yaa pée fātèe, bi kā ti-pu ní.»

⁷Niinee ní m dū binib ki yóoǹ digundi boon laakin tàkēe. M nìn yóoǹ-bi ki nóó nì bi nín pēē pēē mmaal puee ní bi ŋúb́ ntàataajimu nì ŋkpamu nì itɔfi.

⁸M yóoǹ-bi míǹ ki dóòyee ní ki bí abɔtibil nì bibɔsoonliibi nì samaa un kíǹee yii: «Taa fàŋkìmaan ni-nannanliibi! Téetímaan ni-Dindaan un sá ukpaan ki sá kuwambiiuee pu, kí já ni-nabiyaamu nì ni-jipɔmbi nì ni-bisalib nì ni-nimpoobi nì ni-diiŋŋi pu.»

⁹Ti-nannanliibi nín gbìl̄ yii ti béè tin bi bɔ́ntèe nì Unimbɔti nín bíil̀ tin bi bàà bóob́ kí ŋée puee, ní ti-kɔkɔ fātìi gítì digundi cee, ní báà ŋma nìkī ditundi din u bàà bíi tūǹee.

¹⁰Ama kí yòon̄ ŋwiin gbantee, m-tɔntɔnliibi bininjab dijandi di nìn bí ki tūǹ ditundi ní dijandi din kíǹee ŋúb́ ŋkpamu nì agbampɔɔ nì itɔfi ní ki pēē ajanjabɔkuti. Bikpilib nìn yú Juuda yab kɔkɔ boon.

¹¹Bin nìn bíi māā digundee nì bin nìn tūntí awaŋgulee nìn cáá ŋŋal ŋubɔ ní ki tūǹ ditundi, ní ŋun kíǹee ŋúb́ tijanjawan.

¹²Bimaliibi nìn gbìn̄ bi-tàataajimmu bi-cammu ní ki māā, ní uninja un búǹ ŋyinee yú m-tikindi.

¹³Ní m bí abɔtibil nì bibɔsoonliibi nì samaa un kíǹee kɔkɔ yii: «Digundi tundi din kíǹee dáá náaǹ ki wīikí, ní ajancuku ŋin pu ti bí ki tūǹ ditundee dátiǹ tɔb.

¹⁴Míǹ puee laakin kamaa ni yaa bí ní ki gbìl̄ bi búń ŋyinee, ní dāá kpāfì m-cee. Ti-Nimbɔtiu làá já kí tīī-ti!»

¹⁵Ti nìn tūǹ ditundi kí kíĺ kutaafaau kí dāá sāā kunyeeu iŋmalbijaa nyātam, ní ti-kansikin dijandi ŋúb́ ŋkpamu.

¹⁶Ŋyunti gbanti mbaanti ní m tùkū samaa yii: «Kunyeeuee, utɔntɔŋkpil kamaa nì u-tɔntɔnliibi ń cù Jeerusaleem kí cīití sintil, kutaa yaa wúntèe, bí dāá tɔ̄ ditundi.

¹⁷Man m-ba nì m-nabiyaamu nì m-tɔntɔnliibi nì m-janjaliibi bin cí-mee, ti-kansikin báà ubɔ kaa nìn pèetī u-wanti, see ti yaa làá fàl̀ baba.»