Read Ntcham Néhémie 6 Bible Online

Néhémie 6 - Ntcham bible

Néhémie 6

¹Sambalati nì Toobiya nì Geeseem ulaalibuja nì ti-nannanliibi bin kíǹee nìn gbìl̄ yii m fātìi máń digundi dibùndi diba kaa ti bí. Ŋyunti gbantee, punuubi di nìn kíǹ maa láá dūu cóoǹ.

²Sambalati nì Geeseem nìn túnní binib bí tùkù-mi yii ḿ dāan̄ tí kpāfì Keefiriim tiŋkin Oonoo tantakalin. Bi nìn cáá nlandɔkɔ kí ŋá-mi tikpitil.

³M nìn tú binib bí cùú tùkù-bi yii: «Atuun ŋin m bíi tūǹ dooyee wīikí tikpil, an pɔ̄ɔ̄ ḿ ŋmā kí dāan̄ ni-cee. M yaa yíkì ki nín dòoń ni-cee, ditundi làá gbèen̄.»

⁴Bi túnní bi yíí-mi míǹ ŋfunyɔm minaa pu, ní m kíí-bi tibɔbaantiil.

⁵Sambalati nìn gíti túnní u-tɔntɔnliu ubɔ ŋŋmooŋmootiim, u ŋúbiń kugbɔŋu ncal an kaa fúuń tiba poon.

⁶Bi nìn ŋmàn̄ kugbɔŋu gbanti poon yii: «Atimbun kɔkɔ poonee, bi sòoǹ ní Geeseem mun lī yii sii nì a-nabiyaamu Juuda yab cáá nlandɔkɔ kí nyā ni-ba. An pu ní a fātìi bíi māā digundi. Bi lī gba yii a là kí kpántí bi-bɔtiu ní.

⁷Bi bí yii a lēē Unimbɔti bɔnaatiliibi Jeerusaleem bí bāakì yii a kpántì Juuda tiŋkin ubɔti. Tibɔti gbanti làá bà Peeriisi yab bɔtiu cee, an puee dāan̄ man cee tí kpāfì kí sòoǹ.»

⁸Ní m tú bí tùkù-u yii: «Tin kɔkɔ a sòon̄ nee, mbaamɔn ŋubɔ kpá poon, sii a-ba di náań-tì.»

⁹Binib gbanti kɔkɔ nìn nyàab̀ kí fàaǹ-ti ní. Bi nìn dàkafī yii ti-wunti làá yɔ̀tī tí gbèen̄ ditundi ní. «Kɔŋkɔnnee m-Dindaan, tīī-mi mpɔn!»

¹⁰Dalbee man nìn cūtì ki ká Deelaya jipɔɔn Seemaya, Meetabeel naantiiu, kun puee waa nìn ŋūǹ kí nyā. Ní u bí-mi yii: «Tí kɔ́ kunimbɔtidiin, poon poon diikun kí kpāfì. Tí pìin̄ mpunyɔmu kí kpàl̄, di sá bi là kí kpɔ̀-si. Kunyeeu ní a-nannanliibi làá dāan̄ kí kpɔ̀-si.»

¹¹Ní m kíí-u yii: «Kii man nee di sáńaaa? Àá unil ulɔu di bí kii man nee ní kí kɔ́ kunimbɔtidiin kí taa kpú? Maa làá cù.»

¹²M nìn béè yii an kaa sá Unimbɔti di nìn tīī-u dinyɔɔbundi ú dūú nàatī-mi, ama an sá Sambalati nì Toobiya di nìn tīī-u animbil ú sòoǹ nì mi míǹ.

¹³Ba pu ní bi nìn tīī-u animbil? An nìn sá ú sòoǹ míǹ ḿ fàŋkì kí nóó u-saŋkii kí ŋá ikpiti. Niinee bi bàà ká nsan kí bīil̀ m-yindi kí kɔ́ǹ-mi icoo dee.

¹⁴«M-Nimbɔtiu, taa súntí tin Toobiya nì Sambalati nì Noowadiya, unimpu un nàatī a-bɔtee, nì a-bɔnaatiliibi bin kíǹee nín ŋá tin ki nyàab̀ kí fàan̄-mee pu.»

¹⁵Bi nìn dū iwiin imuŋku ili nì saalaa nì ili ní ki máń ki dóò digundi, uŋmal un bi yíì Eeluulee wiiŋyi mmuŋku nì iŋmoo dal.

¹⁶Ti-nannanliibi kɔkɔ nín gbìl̄ mimmee, tifaandi nìn kɔ́ atimbun ŋin nìn māntìi tú-tee kɔkɔ ní bíǹ bi-ba nìn ká yii bi sīntì taapu. Niinee bi béè yii an sá ti-Nimbɔtiu di tútúǹ-ti ní ti túń ditundi gbanti ki dóò.

¹⁷Ŋyunti gbanti kɔkɔ mun poonee, Juuda yab bɔtibiliŋ nìn ŋmà Toobiya tigban ní úǹ kíikí-bi.

¹⁸Di sá u nì Juuda yab tikpil nìn pūtì ki pōoǹ tɔb, kun puee u nìn sá Araa jipɔɔn Seekaniya coo, ní úǹ u-ba jipɔɔn Yeewoowanan nìn cáá Beereekiya jipɔɔn Meesulam bisal.

¹⁹Bi nìn sòoǹ ki pàkà-u m-nimbiin, ní ki cáǹ ma mun bɔti ki máafí-u. Toobiya nìn ŋmà-mi tigban kí fàaǹ-mi.