Read Ntcham Tobit 10 Bible Online

Tobit 10 - Ntcham bible

Tobit 10

¹Ama iwiin pée bí ki jītée, Toobii nìn kā ki cɔ́tí iwiin in nyɔkɔm unil ŋūǹ kí dūú cù Rageesi kí gítińee. Ŋyunti gbanti dāa jítì u-jipɔɔn kaa bāań.

²Ní u sòon̄ u-ban yii: «Ba di kalin tin cúú-u ní u gbíntì niin dee? Àá Gabayeel kpíì ní waa ká un làá dū animbil kí tīī-uee ní.»

³Niinee u kíĺ ki bíi yáliŋkí.

⁴U-nimpuu Ana nìn lī yii: «M-biki kpíì ní! Waa ti bí binifoobi kansikin.» U nìn kíĺ ki bíi sūǹ ki yáliŋkí u-jipɔɔn pu ki lì yii:

⁵«M-bɔti na, m-jipɔɔn! Sii un di sá m-nimbiliŋ walifiŋuee, ŋma di bí yii ḿ yàntī á búntí ní?»

⁶Ama ní Toobii bí-u yii: «Ŋmīĺee, taa dūú páb́ a-ba, m-niisal, laafiya bí-u. An yaa yíì tiba di cúú-bi ní bi gbíntì niin. Un di céeǹ-uee sá unil un pu ti ŋūǹ kí nīn mákée ní, u sá ti-nabiki kiba ní. Taa nín̄ bíi yáliŋkí u-pu, m-niisal, u làá fàtīí gítiń an kaa làá yúntí.»

⁷Ama ní úǹ kíí-u yii: «Taa ti sòoǹ nì mi tiba! Taa ti mɔ̄ntì-mi! M-biki kpíì ní.» Ana kaa ti pée cáá ubɔ pu dimákal. Baabadalee, u péetí malaa ní kí cùú kàl̄ ki kpèé nsan ŋun pú ní u-jipɔɔn làá nyānní kí bàńee. Ŋwìiń yaa jéetèe ní ú fàtīí kɔ́ kudiin ki yáliŋkí ki sūǹ kunyeeu kɔkɔ kaa ti kpáà ŋūǹ kí gèeǹ.

⁸Raguweel nìn pūtì yii bi làá dū ŋwiin ŋubɔ kpá saalku ní kí jī u-bisal nimpucanti jiŋaaliu. Ŋyunti gbanti jítèe ní Toobiyaasi bí-u yii: «Yàntī ḿ nīn gítí, di sá yii m nyí m-baa nì m-na nín kaa ti cáá dimákal yii bi làá fàtīí ká-mee. An puee m gbàam̄-si, m-baa, yàntī ḿ nīn cá kí fàtīí gítí m-baa cee. M pée tùkū-si min poon ní m yāntì-u kí búntìńee.»

⁹Ama ní Raguweel bí Toobiyaasi yii: «Gbíntí, m-biki, gbíntí m-cee doo. M làá tɔ̄ binib bí cù a-baa Toobii cee kí tùkù-u tin bíi jītí a-puee.» Ama ní Toobiyaasi bí-u yii: «Aayee, m gbàam̄-si ní, yàntī ḿ fàtīí gítí m-baa cee.»

¹⁰Niinee Raguweel dū u-nimpuu Saara ki tīī-u, ki kpáaǹ úǹ u-ba gaajawanti kɔkɔ dijandi, an dàkà yii bitɔntɔnliibi bininjab nì binimpoobi nì inaa nì ipii nì mmamu nì igutaamu nì tiwampeeŋkaal nì animbil nì tiwan tiba mun.

¹¹U nìn yāntì bi búntì nì dipɔɔpiŋkpaandin. U nìn kāaǹ Toobiyaasi ki bí-u yii: «Á nīn bí tiŋan, m-biki kí còom̀ tiŋan! Ti-Dindaan un bí yilpuee ń kpòotī-ni, sii nì a-nimpuu Saara! M máká yii m làá ká ni-biyaamu kí wàatī ní kí nín kpú!»

¹²Míǹ boonee ní u bí u-bisal Saara yii: «Nín̄ cá a-cooja cee. Kɔŋkɔnnee, a-cal baa nì u-na di kpántì a-baa nì a-na kii timbi bin màl̄-see. M-bisal, nín̄ cá nì ŋgbansɔŋfi! M máká kí gbìl̄ bi sòoǹ a-pu tiŋan ŋyunti ŋun m dáá bí dimaŋfalin nee!» U lī míǹ ki dóòyee ní ki kāaǹ-bi ní ki yāntì bi búntì.

¹³Eedina úǹ nìn tùkū Toobiyaasi yii: «M-jipɔɔn, m-niijaneeŋkaau, ti-Dindaan ń céeǹ-si kí gíiǹ-si nì laafiya! Ú pɔ̄-mi diyimɔɔl ḿ ŋmā kí kàl̄ kitiŋ pu kí yúntí kí ká mbiyaamu mun ní sii nì Saraa làá màal̀ee kí wàatī ní kí nín kpú. Ti-Dindaan nimbiin ní m dū m-bisal ki ŋúbiǹ-si. Á kpèè-u tiŋan. A-maŋfal wiiŋyi kɔkɔ poonee, á taa kɔ́ǹ-u kunimbaau dalba dalba. M-biki, nín̄ cá nì ŋgbansɔŋfi! Kí yòon̄ kɔŋkɔnnee kí nīn cée, m sá a-na ní Saara sá a-niisal. M mèé yii ti-kɔkɔ ń nīn bí dipɔɔpindin mbaantiim ti-maŋfal wiiŋyi kɔkɔ poon!» Eedina lī míǹ ki dóòyee ní ki kpàl̄ bi-liitil ní ki yāntì bi búntì nì dipɔɔpindi.

¹⁴Míǹ ní Toobiyaasi yíkì Raguweel cee nì mmɔn nì dipɔɔpindi, ki jáaḿ yilpu nì taapu Dindaan, duulinya kɔkɔ bɔtiu u nín yāntì bi cōom̀ disaŋkinnyaandee. Raguweel nìn bí-u yii: «Ti-Dindaan ń tīī-si nnaam á tīī a-baabi tinyool a-maŋfal wiiŋyi kɔkɔ poon!»