Read Ntcham Tobit 11 Bible Online

Tobit 11 - Ntcham bible

Tobit 11

¹Ŋyunti ŋun bi tóob́ Kaseeriim tiŋki kin bí Niiniifi tiŋki nyɔkɔpuee ní Rafayeel bí Toobiyaasi yii:

²«A nyí tin poon ní ti nìn yíkì ki yāntì a-baayee.

³Tí lìntī a-nimpuu nyɔkɔpu kí cùú bɔ́ntí mmɔŋki kí wàatī ú nín bàń.»

⁴Ní bi-liitil táá ki búntì. Rafayeel nìn tùkū Toobiyaasi yii: «Á yàntī ujɔmee kaam ń nīn bí ki kɔ́ĺ-si.» Toobiyaasi bɔkɔ nìn pá bi-boon.

⁵Ŋyunti gbantee, Ana úǹ nìn kā ki kpèé nsan ŋun pú ní u-jipɔɔn làá nyānní kí dāan̄ee.

⁶Dicilpuee u kpēēyee úǹ di páaǹnée ní u cūtìi tùkū u-baa yii: «Kpèè a-jipɔɔn di dòońee, u nì uninja un céeǹ-uee.»

⁷Kí wàatī Toobiyaasi ń bà u-baa ceeyee ní Rafayeel bí-u yii: «M nyí a-baa nimbiliŋ nín làá ŋúbitée.

⁸Á dū ujɔmee kaam kí nùkù u-nimbiliŋ pu. Nnyɔkɔ nee làá tɔ̄ tinipɔn pu ditundi ní tinipɔnee ń wāŋkì u-nimbiliŋ pu. Niinee a-baa làá nyā ijɔfin ní kí fàtīí ká ŋwalifi.»

⁹Ana nìn sáǹ ki cūtìi yùkū ki léeǹ u-jipɔɔn sil pu ní ki bí-u yii: «M fātìi wál̀-si m-biki, kɔŋkɔnnee m ŋūǹ kí kpú[22]!» Ní u kíĺ ki bíi sūǹ.

¹⁰Toobii nìn nyīī ki yíkì ki còom̄ ki gbéetí ki dī dicindi punyɔkɔpu ki nyáń.

¹¹Toobiyaasi nìn cōom̀ ki túkuǹ-u, ki ŋúb́ ujɔmee kaam ki púfì u-nimbiliŋ pu ní ki ŋúb́-u tiŋan ki lī yii: «M-baa, ká dipɔbil!» U nìn dū nnyɔkɔee ki ŋmītì u-nimbiliŋ ní ki ŋúb́-u.

¹²Míǹ boonee ní u dū u-ŋalii liitil ki gbátì gbátì tinimpɔn tin kā dinimbil kamaa poonee.

¹³Niinee Toobii yùkū ki léeǹ u-sil ní ki kíĺ ki bíi sūǹ ki lì yii: «M-jipɔɔn, m-nimbiliŋ walifiŋu, m fātìi wál̀-si!»

¹⁴Ní u gíti lī yii: «Tí nyɔ̄ŋkì Unimbɔti! Tí nyɔ̄ŋkì u-yiŋkpaandi! Tí nyɔ̄ŋkì u-circir tuuŋyi kɔkɔ! U-yiŋkpaandee ń nīn bí ti-pu! Tí nyɔ̄ŋkì ituun kɔkɔ abin abin! Di sá yii ti-Dindaan di nìn dū falaa nee ki tɔ́ m-pu, ama kɔŋkɔnnee m fātìi wál̀ m-jipɔɔn Toobiyaasi.»

¹⁵Toobiyaasi nìn kɔ́ dicindin nì ifaal ki jáaḿ Unimbɔti mpɔn. Niinee ní u máafì u-baa u-saŋŋu nín cōom̀-u puee, nì animbil ŋin u cāabìńee nì min ní u cáá Raguweel bisal Saarayee. Ní u gíti kútì ki lī yii: «Kpèè úǹ di dòońee, u bí kɔŋkɔnnee Niiniifi tiŋki punyɔkɔki caŋin.»

¹⁶Toobii nìn bí ifaalin ki jáaḿ Unimbɔti ki cá kí tūŋkì u-coopu Niiniifi tiŋki punyɔkɔki watil pú. Niiniifi yab nín ká-u u còom̄ sɔkɔmii ubɔ kaa līī u-nyɔkɔpu ki kpòotī-uee ní an ŋá-bi bitii. Toobii nìn sòoǹ báà ŋma nimbiin yii Unimbɔti súń u-saai ní ki cúú u-nimbiliŋ ki ŋúbitì.

¹⁷U nín sútìi pìl̄ u-jipɔɔn Toobiyaasi nimpuu Saarayee ní u mēē ki bīiǹ u-pu ki lī yii: «M-bisal, sii nì nsan! Tí nyɔ̄ŋkì a-Nimbɔtiu un di cáań-si ti-cee dooyee, m-bisal! Unimbɔti ń bìin̄ a-baa pu! Ú bìin̄ m-jipɔɔn Toobiyaasi pu ní kí bìin̄ si mun pu, m-bisal! Kɔ́ a-diikun, si nì nsan! Sii di yì dibiindi nì mmɔn! Kɔ́-mi, m-bisal!»

¹⁸Ŋwiin gbantee, Juuda yab bin kɔkɔ nìn bí Niiniifi tiŋkinee nìn bí mmɔŋkpaanni ní.

¹⁹Toobii weeb Ayiikaar nì Naadaan mun nìn dɔ́miń u-cee ki nìn bí ifaalin.