Read Ntcham Tobit 12 Bible Online

Tobit 12 - Ntcham bible

Tobit 12

¹Bi jíń tinimpucan jiŋaaliu ki dóòyee ní Toobii yíiń u-jipɔɔn Toobiyaasi ki bí-u yii: «M-biki, kpèè kí pà a-bɔɔ un céeǹ-see paati kí nyàab̀ tiba kí kūtì.»

²Ní Toobiyaasi kíí-u yii: «M-baa, ḿ tīī-u mana? Báà m yaa dū tigaajawan tin u tútuǹ-mi m cáań nee dijandi gba ki tīī-u, maa bíil̀ tiba.

³U fātìi gíiǹní-mi nì ŋgbampɔn, ki cáaǹ m-nimpuu, ki tútuǹ-mi m cáań animbil ní ki gíti cáaǹ si mun. Mana ní m làá tīī-u tíǹ gbanti kɔkɔ pu?»

⁴Ní Toobii bí-u yii: «M-biki, an kítì ú fōō tin kɔkɔ u cáańee dijandi.»

⁵Niinee Toobiyaasi yíiń Rafayeel ní ki bí-u yii: «Yòon̄ tin kɔkɔ a cáańee dijandi án nīn sá a-paati ní kí nīn cá nì ŋgbansɔŋfi!»

⁶Niinee Rafayeel yāntì Toobii nì u-jipɔɔn Toobiyaasi nyáń kinimpunaatii ní u bí-bi yii: «Ní jāam̀maan Unimbɔti kí māafì tin u ŋá ki tīī-nee binifoobi kɔkɔ nimbiin, bi mun ń jāam̀ kí gāā ilan kí nyɔ̄ŋkì u-yindi. Ní yàntī binib kɔkɔ ń béé Unimbɔti tuuŋŋi kii ŋi nín máaǹ puee. Ní taa ti tàan̄ kí jāam̀-u.

⁷An ŋān̄ unil ń dū ubɔti bɔɔŋŋi kí báĺ, ama Unimbɔti tuuŋŋi ŋiŋŋee, an sá bí dūú gāā ilan ní kí nyāntí-ŋi kí bíĺ mpaampiin pu. Tí dū-ŋi kí gāā ilan kii an nín máaǹ puee. «Ŋámaan tiŋan, ní tikpitil tiba kaa làá bàń-ni[23].

⁸Á nīn mèé nì mbaamɔn kí nīn pūǹ biwɔfib tiwan kí kpántí deedeedaan sɔ́ǹ á dī nsaŋkpiti pu kí ká tigaajati[24]. An sɔ́ á pɔ̄ uwɔfi ki jítiǹ á kóoǹ sindaariya kí kpúkuń.

⁹Tiwampɔkaal gbanti fìil̄ unil ki nyāntí ŋkúmin ní ki fíntí ikpiti kɔkɔ. Bin bin pūǹ biwɔfib tiwanee làá kàl̄ kitiŋ nee pu kí yúntí.

¹⁰Bin bin ŋáań ikpitee nì bin kaa ŋáań deedee tuuŋŋee sá bíǹ bi-ba nannanliibi ní.

¹¹«Kɔŋkɔnnee, m làá tùkù-ni ibaamɔn kɔkɔ kaa làá báĺ-ni tiba. M dáá láá yāntì ni béè tin bí nee yii: <An ŋān̄ unil ń dū ubɔti bɔɔŋŋi kí báĺ ní kí lēē Unimbɔti tuuŋŋi kí páań mpaampiin pu kii ŋi nín máaǹ puee.

¹²Too, ŋyunti ŋun a nìn bíi mèéyee, Toobii, ki kpáaǹ Saara muee, man di nìn fōō ni-wimmeem ki cáa cūnnì ti-Dindaan tinyooldaan cee, ki kpáaǹ a nín nìn síb̀ bitaŋkpiibee mun.

¹³A nín kaa nìn gūgufì ki yāntì tijin tin a bíi jīǹee ki nyīī ki yíkì ki cūtìi síb́ utaŋkpiilee, ní Unimbɔti túnní-mi a-cee ḿ cɔ̄ŋkì-si.

¹⁴Ama ŋyunti gbanti mbaanti ní Unimbɔti túnní-mi ḿ cáaǹ-si, kí kpáàa cáaǹ a-coopu Saara mun.

¹⁵Man ní bi yíì Rafayeel, ituun iluli in yú ti-Dindaan nyooti nimbiin, ki tūǹ atuun ki tīī-uee ŋubɔ[25].»

¹⁶Toobii nì Toobiyaasi kaa nìn gíti nyí tin poon bi bée. Niinee bi tātìi dōoǹ dicincibil ní tifaandi cúú-bi.

¹⁷Ama ní ŋúǹ bí-bi yii: «Ní taa fàŋkìmaan tiba! Ŋgbansɔŋfi ń nīn bí ni-cee. Nín̄ jáaḿmaan ti-Dindaan ŋyunti kamaa!

¹⁸M nín nìn bí ni-ceeyee, an kaa sá yii m nín cáá kulaŋŋaŋfitiiuee pu ní m nìn bí ni-cee, ama an sá Unimbɔti di là míǹ. Úǹ ní ni máaǹ kí nīn jáaḿ baabadal. Úǹ ní ni máaǹ kí nīn nyɔ́ŋkí.

¹⁹Ni yaa nìn ká m bíi jīǹee, ibaamɔn poonee, maa nìn baasii jīǹ, ama an ŋáań-ni kii m bíi jīǹee ní.

²⁰Míǹ puee, nyɔ̄ŋkìmaan ti-Dindaan kitiŋ nee pu, kí yòon̄ Unimbɔti yilpu. Kpèèmaan, m fàtīi gítí un di túnní-mee cee dee. Ŋmàmaan tin kɔkɔ bāań-nee kí bíĺ.» Ntuun lī míǹ ki dóòyee ní ki yíkì ki nín jɔ́ḿ yilpu.

²¹Bi nìn yíkì, ama baa nìn gíti ŋūǹ kí wāl̀-ŋu.

²²Bi nìn bíi jáaḿ Unimbɔti, ki nyɔ́ŋkí-u ní ki pàkà-u u-tuŋkpaaŋŋi ŋin ní u nìn ŋá gbantee pu. Unimbɔti tuuŋŋu ŋubɔ di nìn lēē ŋu-ba ki dàkā-bi!