Read Ntcham Tobit 13 Bible Online

Tobit 13 - Ntcham bible

Tobit 13

¹Niinee Toobii lī yii:

²«Tí nyɔ̄ŋkì Unimbɔti un bí dimaŋfalinee kí nīn cá jaanjaan! Tí nyɔ̄ŋkì u-beel! Úǹ di dátí unil tafal, úǹ di tí sūǹ isaa. U yàntī unil ń sìntī áli ditaŋkpiilin, kí tin bà kitiŋ taapu taapu, ní kí dāá nyāntí-u niin kí gíiǹ binifoobi kansikin. Tiba kpá kaa bí u-pɔŋŋu taapu.

³Isirayeel yab, nyɔ̄ŋkìmaan-u atimbun nimbiin, atimbun ŋin kansikin u jìn̄-ni ni yàl̄ ki kɔ́ee.

⁴Niin muee, u yāntì ni ká u nín sá ukpaan puee. Yòom̄maan-u yilpu binifoobi kɔkɔ nimbiin, di sá yii úǹ di sá ti-Dindaan, ti-Nimbɔtiu, ti-Baa[26]! U sá Unimbɔti ní kí nīn cá abin abin.

⁵Ni-kpitii pu ní u dátí ni-tafal, ama u làá sɔ̄ ni-kɔkɔ saai. U làá nyāntí-ni atimbun ŋin kɔkɔn ni yàl̄ ki tin bínnée ni.

⁶Ŋwiin ŋun ni làá fàtīí gítiń u-cee nì ni-pɔbil kɔkɔ nì ni-naŋki kɔkɔ, kí nīn kíǹ ki bí ibaamɔnni u-nimbiinee, u làá dāá fàtīí gítiń ni-cee ní kaa làá ti fàtī u-boon kí tīī-ni.

⁷Kɔŋkɔnnee, kpèèmaan tin u ŋá ki tīī-nee ní kí nyɔ̄ŋkì-u mpɔn. Nyɔ̄ŋkìmaan ti-Dindaan deedeedaan ní kí yòon̄ Ubɔti yilpu kí nīn cá abin abin.

⁸Mamee, m làá nyɔ̄ŋkì-u kitiŋ kin poon ní bi cúú-mi kuyuŋuee. M làá dàkà ditimbundi din ŋáań ikpitee u-pɔŋŋu nì u nín sá ukpaan puee. Binikpitibee, fàtīí gítiḿmaan, kí nīn ŋáań tin bí deedeeyee u-nimbiin. An yaa yíì u làá fōō-ni ní kí dàkà-ni u-laŋŋaŋfitiiku.

⁹M yòontí m-Nimbɔtiu yilpu ní an mɔ̄ǹ-mi yilpu Bɔtiu pu.

¹⁰Bi-kɔkɔ ń lì yii u sá ukpaan ní kí nyɔ̄ŋkì-u Jeerusaleem tiŋkin! Jeerusaleem, circir tiŋki, Unimbɔti dáaĺ a-tafal a-biyaamu tuuŋŋi pu, ama u làá gíti sɔ̄ bin bin tɔ́-uee saai.

¹¹Ní nyɔ̄ŋkìmaan ti-Dindaan an nín máaǹ puee, ní nyɔ̄ŋkìmaan Ubɔti un bí kí nīn cá jaanjaanee, án nín làá ŋá pu bí fàtīí mā u-diiku a-cee nì dipɔɔpindee.

¹²Ti-Dindaan ń tīī bin kɔkɔ bi cúú kuyuŋuee dipɔɔpindi! Ú dàkà bifalaadambi bin kɔkɔ bí a-ceeyee dineendi kí nīn cáa cá jaanjaan.

¹³Ŋwalifikpaan ŋubɔ làá ŋmíntí kitiŋ jaaŋŋi kɔkɔ pu. Atimbun ŋin bí an dátèe tikpil nì kitiŋ kúntilammu kɔkɔ nib làá dāá dāan̄ a-circir yindi cee, kí nīn ŋúbiń saraabi tikpil kí tīī yilpu Bɔtiu. Binib bin bí ki dòońee làá dāá tīī-si mmɔn, ní bi làá dāá nīn yíì-si kitiŋ kin bi lēēyee abin abin.

¹⁴Mbusu dɔ̄ ki cí bin di sìí-see! Mbusu dɔ̄ ki cí bin kɔkɔ làá bīil̀-si kí wìil̀ a-guŋŋi, nì bin kɔkɔ làá kpēelikì a-gunlɔkɔŋŋi kí sēē a-diiŋŋi ŋŋmee! Ama Unimbɔti làá bìin̄ bin kɔkɔ làá dāá fàŋkì-see kí nīn cá jaanjaan!

¹⁵Nín̄ fàal̀ deedeedambi pu, di sá yii bi làá kóoǹ-bi kí kpāfì ní bí jāam̀ ti-Dindaan abin abin. Bin néeń-see bí mmɔnneeee! Bin bin fàal̀ a-batɔl puee bí mmɔnni!

¹⁶Bin kɔkɔ sūǹ a-pu, bi nín dáaĺ a-tafal puee bí mmɔnneeee! Di sá yii bi làá dāá fàal̀ a-pu ní bi nì si ń dāá kpāfì kí jī mmɔn kí nīn cá jaanjaan. Tiŋman, m jáaḿ ti-Dindaan, Ubɔtikpaan,

¹⁷kun puee bi làá dāá fàtīí mā Jeerusaleem ní bí dāá mā a-Diiku kitiŋin kí nīn cá abin abin. An làá nīn mɔ̄ǹ-mi m-nibul din kíǹee yaa ká a-nyooti ní ki nyɔ́ŋkì sii yilpu Bɔtiuee. Bi làá dāá dū ataŋkpamɔnti ŋin bi yíì safiir nì eemeeroodee ní kí mā Jeerusaleem punyɔmmu, ní kí dāá dū ataŋkpamɔnti kí mā a-guŋŋi kɔkɔ. Bi làá dāá dū sindaariya ní kí mā Jeerusaleem gunlɔkɔŋŋi, ní kí dāá dū sindaariyamɔnti kí mā agun ŋin boon bi bāal̀ee. Ataŋkpamɔnti ŋin bi yíì eeskaarbuukil nì ŋin nyánní Oofiiree[27] ní bi làá dāá dūú cìil̀ Jeerusaleem daŋŋi.

¹⁸Bi làá dāá gāā dipɔɔpindi laŋyi Jeerusaleem punyɔmmu pú ní ilan dāa gbòoǹ pɔ̀ɔɔɔ ki-diiŋŋi kɔkɔn yii: <Aleeluya! Jāam̀maan Isirayeel Nimbɔtiu!> Ní bin ní bi lútèe ń dāá jāam̀ ti-Dindaan circir yindi kí nīn cá talku.»