Read Ntcham Tobit 14 Bible Online

Tobit 14 - Ntcham bible

Tobit 14

¹Toobii nín gāā nlan ŋun ki jáam̀ ti-Dindaanee nín kúntì puee dee.

²Toobii nìn cáá abin dilaataal nì saalaa nì ali ní ki dōoǹ u-ŋaliŋu pu nì ŋgbansɔŋfi, ní bi síb́-u nì tinyool Niiniifi tiŋkin. U nìn cáá abin imuŋku ita nì ali ní ki kpántì ujɔfu. U nín pɔ́ɔkèe, u nìn bí digbilin ní ki nìn pūǹ biwɔfib tiwan. U nìn pée gbíntìi jáaḿ Unimbɔti ní ki nyɔ́ŋkí-u u nín sá ukpaanee pu.

³Kí wàatī ú kpúee ní u yíiń u-jipɔɔn Toobiyaasi ní ki tīī-u isaŋki nee yii: «M-biki, kpáaǹ a-biyaamu kí búntí.

⁴Ŋá malaa kí nīn cá Meedii, di sá yii Unimbɔti bɔnaatiliu nín nìn sòon̄ tibɔti tin ki tɔ́ Niiniifi tiŋki puee, m fōō-tì ki kíí. An làá pée jītí míǹ ní, ní nnaabu ń jēetí Asuur nì Niiniifi timmu pu. Tin kɔkɔ ní Isirayeel bɔnaatiliibi bin Unimbɔti nìn túnnée sòon̄ee làá bàń míǹ. Tin bi nìn sòon̄ee, tiba kaa làá bàtī. Ti-yuntiŋu yaa bàn̄ee, an làá ŋá míǹ. A yaa bí Meedii tiŋkin, a làá nīn bí ŋgbansɔŋfin ki jítiǹ a yaa bí Asuur nì Babiloon timmun. Di sá yii m nyí ní ki fōō ki kíí yii tin kɔkɔ Unimbɔti sòon̄ ki síiǹee kaa làá gbíntí fám, see an ŋá míǹ. Tin Unimbɔti bɔnaatiliibi sòon̄ee, tiba kaa làá gbíntí fám kaa ŋá míǹ. Bi làá kàaǹ ti-nabiyaamu mun dáá gbíntìi kóò Isirayeel tiŋkinee ní kí cúú-bi kí cùnnì ndandati kuyuŋu kí wàatī kitimmɔntii nee. Isirayeel tiŋki làá dāá dòon̄ kikuliŋŋi ní ubɔ kaa dāa gíti kóò Samaarii àá Jeerusaleem timmun[28]. Bi làá dāá sēē kunimbɔtidii ŋŋmi ní kú dāá lítí ŋyunti ŋubɔ poon.

⁵Ama Unimbɔti làá dāá fàtīí sɔ̄ bi-saai ní kí fàtīí gíiǹní-bi Isirayeel tiŋkin[29]. Bi làá dāá fàtīí mā kunimbɔtidii, ama kuaa làá dāá nīn ŋān̄ ki bàn̄ kupeepeekaauee kí cáá sāā Unimbɔti nín síiǹ ŋyunti ŋuŋyee ń nín bàń. Míǹ boonee, bi-kɔkɔ làá dāá fàtīí nyānní kuyuŋun kí gítí ní kí fàtīí mā Jeerusaleem tiŋki kí nīn ŋān̄ tiŋan pu. Bi làá dāá fàtīí mā kunimbɔtidii niin kí nóó nì Isirayeel bɔnaatiliibi nín nìn sòon̄ ku-pu pu ki síiǹee.

⁶Atimbun ŋin bí kitiŋ puee kɔkɔ làá dāá fàtīí gítiń ní kí nīn fàŋkí Unimbɔti nì ibaamɔn poon. Bi-kɔkɔ làá fá bi-waaŋi ŋin mɔ́ntí-bi ki cáǹ-bi diyìntilinee ní kí dāá gāā ilan kí nyɔ̄ŋkì talku Nimbɔtiu kí nīn ŋáań tin bí deedeeyee.

⁷Isirayeel yab bin kɔkɔ Unimbɔti làá dāá fīī ŋyunti gbantee làá dāá téetí u-pu ibaamɔn poon, ní kí dāá kóoǹ kí kpāfì kí gítiń Jeerusaleem tiŋkin. Bi làá dāá kàl̄ Abraam tiŋki kin bi làá dāá dūú tīī-bee poon nì ŋgbansɔŋfi kí nīn cáa cá jaanjaan. Bin bin néeń Unimbɔti tiŋman puee làá dāá nīn bí dipɔɔpindin. Ama bin ŋáań ikpiti nì tin kaa kítèe làá dāá wāŋkì kitiŋ pu.

⁸«Kɔŋkɔnnee m-biyaamu, m-bɔkpaaŋi sèé. Nóómaan Unimbɔti nì mbaamɔn ní kí ŋá tin fáatiǹ-uee. Bīfìmaan ni-biyaamu bí nīn bí deedee kí nīn pūǹ biwɔfib tiwan. Bí nīn téetí Unimbɔti pu kí nīn nyɔ́ŋkí u-yindi tikɔkɔ poon nì mbaamɔn nì bi-pɔŋŋu kɔkɔ. «Ama sii m-bikee, yīkì Niiniifi tiŋkin, taa gbíntí doo. A yaa láa síb́ a-na ki kɔ́ĺ-mee, á taa ti kàl̄ kunyabambaantiiu kitiŋ nee pu. Di sá yii m wāĺ, ikpiti kpátìi gbí kitiŋ nee pu ní binib bí ki mɔ́ntí tɔb kaa gbèentí, ní an kaa kpáàa cáá-bi icoo.

¹⁰M-biki, kpèè Naadaan nín ŋá u-baa Ayiikaar un fōō-u ki kpēē-uee puee. Nì u-nimbiliŋ kpìrrr ní u dū-u ki síb́. Ama un u ŋá mimmee nimbiin ní Unimbɔti pàn̄-u icoo bɔti gbanti paati. Ayiikaar nìn fātìi gítìń ŋwalifin ama ní bi dū Naadaan ki tɔ́ talku bɔmbɔndin, kun puee u nìn nyàab̄ kí kpɔ̀ Ayiikaar. Ayiikaar nìn nyáń ŋkúm taliŋku kun Naadaan nìn píĺ-uee, di sá yii u nìn pūǹ biwɔfib tiwan. Ama ní Naadaan kɔ́ kutaliŋŋu kun di kūū-uee gbantin.

¹¹An puee m-biyaamu, kpèè kun di bàń un pūǹ biwɔfib tiwanee nì tin di bàń ukpitiŋalee. Ikpiti diŋál cāabìń ŋkúm ní. Kɔŋkɔnnee m gbìl̀ m-ban dimaŋfal nín bíi féeń-mee.» Bi nìn dū-u ki bíl̀ u-lambaŋki pu, ní u sīntì. Bi nìn síb́-u nì tinyool ní.

¹²Ŋyunti ŋun Toobiyaasi na kpíìyee ní u síb́-u ki kɔ́ĺ u-baa. Míǹ boonee ní u yōoǹ u-nimpuu ki nín cá Meedii ki cūtìi kɔ́ Eekibataani tiŋkin, u-coo Raguweel cee.

¹³Toobiyaasi nìn kpēē u-coobi tiŋan bi-putin. U nìn síb́-bi Eekibataani tiŋki kin bí Meedii tiŋkinee ní ki jíń Raguweel wanti difakal, kii u nín jíń u-baa Toobii wanti difakal puee.

¹⁴U nìn cáá abin dilaataal nì abin saalku nì ali ní ki nín kpíì, ní báà ŋma nìn tɔ́-u.

¹⁵Kí wàatī ú kpúee, u nìn gbìl̄ bi nín nāaǹ Niiniifi tiŋki puee. U nìn ká Niiniifi yab bin Meedii bɔtiu Siyasaar nìn cúuń kuyuŋu ki cáań Meedii tiŋkinee. U nìn nyɔ́ŋkì Unimbɔti tin ní u nìn ŋá Niiniifi nì Asuur yabee. Kí wàatī ú kpúee, u nìn fàal̄ bi nín nāaǹ Niiniifi tiŋkee pu, ní ki nyɔ́ŋkì ti-Dindaan Unimbɔti un máaǹ inyɔŋki kí nīn cáa cá jaanjaanee. Ameeni.