Read Ntcham Tobit 3 Bible Online

Tobit 3 - Ntcham bible

Tobit 3

¹M nìn kɔ́ kunimbaakpaaŋŋun, ki kíĺ ki bíi yáliŋkí ki sūǹ. Míǹ boonee ní m kíĺ ki bíi mèé nì iyaliŋki yii:

²«Ti-Dindaan, a sá deedeedaan ní, ní a-tuuŋŋi kɔkɔ sá deedee tuuŋŋi. A sá deedeedaan ní ki cáá mbaamɔn a-saŋyi kɔkɔn, sii di sòoǹ duulinya bɔti.

³An yaa sée, ti-Dindaan, téetí m-pu. Kpèè-mi kí taa dáaĺ m-tafal m-kpitii puɔɔɔ, m-yìntitam puɔɔɔ, m-baabi yam pu.

⁴Bi yīntiǹ a-marab. An pu ní a yāntì ti-nannanliibi fúkúl̀-ti, ki cúú-ti ki cūnnì kuyuŋu, ki kūū-ti, ki bēel̀-ti ki láń-ti. A nín jìn̄-ti ti yàl̄ ki kɔ́ atimbun ŋin poonee, bi ŋúb́-ti ní ki sìí niin.

⁵A nín sòoǹ binib bɔti puee sá deedee ní. A cáá mbaamɔn kí dáaĺ m-tafal man nì m-baabi kpitii pu, di sá yii taa tɔ́ a-marab ní kaa tí cōom̀ a-nimbiin ibaamɔn poon.

⁶Too kɔŋkɔnnee, pée dū-mi kí ŋá a nín là puee. Fàtīí fōō m-fooku ḿ taa ti nín̄ bí kitiŋ nee pu kí fàtīí gítí ntamin[9]! An sɔ́ ḿ kpú ki jítiǹ ḿ nīn bí dimaŋfalin, di sá yii m gbìl̄ bi sīī-mi fám ní m bí kunimbaakpaaŋŋu poon. M-Dindaan, nyāntí-mi dinimbinaamandi nee poon, yàntī ḿ kɔ́ talku ŋuŋfilin ní kí taa fàtī a-boon kí tīī-mi, m-Dindaan. Tiŋman, an sɔ́ ḿ kpú ki jítiǹ ḿ nīn bí nnaabu nee poon m-maŋfal wiiŋyi kɔkɔ poon, ní kí nīn gbìl̀ bi sìí-mi yéè!»

⁷Ŋwiin gbanti mbaanti, Eekibataani tiŋki kin bí Meedii tiŋkinee, Roogeel bisal Saara nìn gbìl̄ u-baa tɔntɔnliibi binimpoobi kansikin ubɔ bíi sìí-u.

⁸Tin nìn jítèe di sá yii Saara nìn mɔ́ǹ ŋfunyɔm miluli pu ní. Ama ŋyunti kamaayee, ŋfaŋkpitim Asimoodee nìn kù u-cal kí wàatī gba ní u nì u ń nín kpāfì kii binib bin cáá tɔbee nín máaǹ kí nīn ŋáań puee. Utɔntɔnli gbanti nìn tùkū-u yii: «Sii di kù a-calib! A mɔ́ǹ miluli kɔkɔ pu dee, ama kaa fōō báà ubɔ yindi!

⁹A-calib yaa kpíìyee, ba pu ní a sàantí-ti? Nín̄ cá kí ŋàl̄-bi tí taa pée ká a màl̄ kibininjabiki àá kibinimpubiki!»

¹⁰Ŋwiin gbantee, Saara nìn kɔ́ kunimbaakpaaŋŋun. U nìn kíĺ ki bíi sūǹ ní ki nín kóò kudii kun tɔ́kɔ́ u-baa yɔkɔ puee kí bàà lúntí u-ba ŋŋmii kí kpú. Ama ní u dākafì ki lī u-ban yii: «Binib làá sìì m-baa kí lì yii: <A bàà cáá kibineeŋkaai, ní kì lúntì ki-ba ki-naabuŋu pu!> M yaa ŋá mimmee, m làá yàntī m-baa ń kpú[10] u-tikpitin nì kunimbaau. An puee, an nín bàà sá ḿ lúntí m-ba kí kpúee, m làá pùtì gbàam̀ ti-Dindaan ní úǹ u-ba ń kpɔ̀-mi, ní ḿ taa ti gbìl̄ binib sìí-mi m-maŋfal wiiŋyi kɔkɔ poon.»

¹¹Ŋyunti gbanti dicilpuee ní u yōoǹ u-ŋalii ki túĺ tɔkɔla ní ki mēē yii: «Unimbɔti ulaŋŋaŋfiti, inyɔŋki sá a-yai! A-yindi ń ká inyɔŋki kí nīn cá jaanjaan! A-tuuŋŋi kɔkɔ ń nyɔ̄ŋkì-si kí nīn cá jaanjaan!

¹²Kɔŋkɔnnee, sii watil pú ní m fàtī m-ba ki túl̀, sii watil pú ní m fàtī m-nimbiin ki túl̀.

¹³Yàntī ḿ yīkì kitiŋ nee pu ní kí taa ti gbìl̄ binib sìí-mi talku.

¹⁴Ti-Dindaan, sii a-ba nyí, maa cáá tijɔkɔndi. Báà uninja kaa gbēē-mi ki ká.

¹⁵Maa kɔ́ǹ mama m-ba yindi nì m-baa yindi icoo kitiŋ kin bi cáań-ti kuyuŋu nee poon. M sá m-baa sapɔmbaabil ní, waa ti cáá kibiki kiba kin làá jī u-fakalee. Waa cáá naal kaa tí cáá kinabiki kin ŋūǹ kí cáá-mee. M mɔ́ǹ bininjab biluli dee bi-kɔkɔ kpíì. Ba pu ní ḿ nīn gíti bí dimaŋfalin[11]? Ama ti-Dindaan, an yaa kaa fáatiǹ-si á kpɔ̀-mee, kpòon̄ a-tafal kí pīlifì bi nín sìí-mi puee.»

¹⁶Ŋyunti gbanti dicilpu dicilpuee, tinyool Nimbɔtiu fōō Toobii nì Saara wimmeem.

¹⁷Unimbɔti nìn tú ntuun Rafayeel ŋu dɔ́miń ki cáaǹ bi-liitil. Ŋu nìn cúú tinipɔn ki lēē Toobii nimbiliŋ pu ní u fātìi wál̀ Unimbɔti walifiŋu. Ŋu nìn fīī Raguweel bisal Saara ki nyántì ŋfaŋkpitim Asimoodee ŋaan, ní ki dū-u ki tīī Toobii jipɔɔn Toobiyaasi ticati. Di sá yii mara poonee, Toobiyaasi di nìn cáá nsan kí cáá-u kí wàatī ní bin kɔkɔ bàà là kí cáá-uee ń nín páań. Ŋyunti gbantee Toobii nyáń dicindi ki nín kóò u-diikun ní Raguweel bisal Saara mun nyáń kudii kun tɔ́kɔ́ u-baa diiku puee ki kpákatì.