Read Ntcham Tobit 4 Bible Online

Tobit 4 - Ntcham bible

Tobit 4

¹Ŋwiin gbanti ní Toobii téetì animbil ŋin u nìn dūu síiǹ Gabayeel, Rageesi tiŋki kin bí Meedii tiŋkinee pu.

²Niinee ní u sòon̄ u-ban yii: «Kpèè, m mēē Unimbɔti yii ú kpɔ̀-mi. Mimmee an kítì yii ḿ yíiń m-jipɔɔn Toobiyaasi kí sòoǹ nì u animbil gbanti pu ní kí nín kpú.»

³Niinee ní u yíiń Toobiyaasi. Úǹ bāańee ní u bí-u yii: «M yaa kpíìyee, á síb́-mi kii an nín máaǹ puee. Tīī a-na tinyool. U-maŋfal wiiŋyi kɔkɔ poonee, á taa dū-u kí fá jaanjaan. Ŋá tin fáatì-uee kí tīī-u, kí taa ŋá tiba tin làá kɔ́ǹ-u kunimbaaunee.

⁴M-biki, á taa súntí agìń ŋin u kántì a-pu ŋyunti ŋun a dáá kā u-poonee. U yaa kpíìyee, á síb́-u kí kɔ́ĺ-mi, dikaakubaantiilin[12].

⁵«M-biki, a-maŋfal wiiŋyi kɔkɔ poonee, á taa súntí ti-Dindaan pu. Á taa kíí kí ŋá ikpiti kí yìntī u-marab. A-maŋfal wiiŋyi kɔkɔ poonee, á nīn tūǹ deedee tuuŋŋi kí taa nóó ikpiti saŋŋu.

⁶Tiŋman, bin bin ŋáań tikɔkɔ nì ibaamɔn poonee, án làá bútí-bi bi-tuuŋŋi kɔkɔ poon ní.

⁷Bin kɔkɔ ŋáań tin bí deedeeyee, á lēē a-gaajawanti pu dijandi kí pɔ̄-bi. A yaa bíi pūǹ-bi tibee, an taa nín̄ wù-si[13]. Á taa fàtī a-boon kí tīī uwɔfi, ní Unimbɔti mun kaa làá fàtī u-boon kí tīī-si.

⁸Tūtuǹ bin kíǹee kí nóó nì tin a cááyee, kí nóó nì a-gaajati wíiŋŋu. A yaa tí cáá fiiiyaaa, á taa fàŋkì kí dū fiii un a cááyee kí tūtuǹ a-nabiki.

⁹A yaa bíi ŋáań mimmee, tigaajawammɔntiil ní a cáa bíi kpáafí dinimbinaamandi wiiŋŋu[14].

¹⁰Kun puee a yaa bíi pūǹ uwɔfee, an làá fīī-si ŋkúm ŋaan, ní kí pìin̄ nsan á taa kɔ́ dibɔmbɔndin.

¹¹Di sá yii bin kɔkɔ pūǹ biwɔfib tiwanee ŋáań saraa un cáá kudapɔɔuee ní ki tìì Yilpu Fɔ́ŋŋŋ Nimbɔtiu.

¹²«M-biki, á taa cáá unimpu min kaa nóó Unimbɔti marauee. Mpeepeekaamee, á cáá unimpu a-nibul kansikin. Á taa cáá unicaan, unimpu un kaa sá a-baa naakookunee. Di sá yii ti sá Unimbɔti bɔnaatiliibi dicaŋkun ní. M-biki, téetí Noowa nì Abraam nì Isaaki nì Jaakɔb, ti-naanjab bipeepeekaabi pu. Bíǹ gbanti kɔkɔ nìn cáá bi-nabiyaamu kansikin ní unimpu ní Unimbɔti nìn bīiǹ bi-pu ki tīī-bi mbiyaamu. U nìn pōoǹ bi-biyaamu nì bi-naantiibi yii bi làá fōō kitiŋ kí kpántí bi-yaka.

¹³An puee m-biki, nín̄ néeń a-nabiyaamu Isirayeel yab. Á taa kpèè kí sìŋkīǹ a-nabiyaamu, bininjab nì binimpoobi bin sá a-nibul yabee. Bíǹ kansikin ní á yòon̄ unimpu. Di sá yii dilambil bíiĺ binib ní ki nàantí-bi. Míǹ mbaantiim ní diwutijool cāabìń disool nì falaakpaan. Diwutijool di sá ŋkùm na.

¹⁴«Á taa yàntī upaadaan nimbiliŋ ń dòon̄ a-cee kutaa ń wúntí aa pàn̄-u[15], ama á pà-u dicilpu dicilpu. A yaa nóó Unimbɔti mimmee, u làá pà-si kí téeǹ. M-biki, á nīn nyíǹ a-ba a-tuuŋŋi kɔkɔ poon, ní kí dàkà a-bimbim kɔkɔ poon yii bi dàkā-si a nyí.

¹⁵Kun aa lèe, á taa dūú ŋá a-juti[16]. Á taa nyɔ̀ ndaam tikpil áli kí tin gbí, ní kí taa yàntī didanyɔgbil ń kpántí mbimbim kí tīī-si.

¹⁶Á tīī bin ŋkùm cááyee tijin bí jī, ní kí tīī bin gàaǹee tiwampeeŋkaal bí pèen̄. Kun a yaa cáá an lákatèe, á dūú tīī biwɔfib. A yaa bíi tììyee, an taa nín̄ wù-si.

¹⁷Dū a-jinti kí tīī bin kā ki sūǹ deedeedaan kpoolee[17], ama á taa ŋá míǹ an yaa sá unikpiti.

¹⁸«Á nīn fòol̄ uciŋfiti kamaa cee isaŋki, ní kí taa kpèè isaŋki in sá imɔntee fám.

¹⁹Tin kamaa poonee, á jāam̀ ti-Dindaan a-Nimbɔtiu, ní kí mèè ú kpòotī-si kí tàkan̄ nsan ŋun tèen̄ee poon, ní kí yàntī án bútí-si a-saŋkiŋŋi nì a-tuuŋŋi kɔkɔ poon. Di sá yii dinibul diba pée kpá ki cáá dinyil. Ti-Dindaan baba di tìì tigaajawan. Úǹ di tí yàntī un u lèe ń sìntī ditaŋkpiilin. «Too, m-biki, á nīn téetí didàkal nee pu ní kí taa yàntī dí nyā a-pɔbilin.

²⁰Kɔŋkɔnnee m-biki, m là á béé yii m dū animbil kúti kiiloobi alaataa ata ki bíl̀ Gabrii jipɔɔn Gabayeel cee Meedii tiŋki kin bi yíì Rageesee ni.

²¹M-biki, ti yaa kpántì biwɔfibee, á taa fàŋkì. Ama a yaa tɔ́ Unimbɔti, ki sáń ikpiti kɔkɔ nì i-bulifi ní ki ŋáań tin fáatiǹ ti-Dindaan a-Nimbɔtiuee, a béé yii a sá ugaajakpaan ní.»