Read Ntcham Tobit 6 Bible Online

Tobit 6 - Ntcham bible

Tobit 6

¹Kinaacimpɔmbikee nìn táá ntuunee ki búntì. Kibɔkɔ mun nìn táá-bi. Kunyapeepeekaauee, bi nìn gbíntì Tiigiri mɔɔgbandi ní ki dōoǹ.

²Toobiyaasi nìn sīntì Tiigiri mɔɔlin kí fíntí u-taaŋi. Niinee ujɔŋkpaan ubɔ nyánní nnyimin ki bàà là kí cúú u-taal kí náĺ. Kinaacimpɔmbikee nìn fáá mbiil.

³Niinee ntuunee bí-u yii: «Cúú-u kí nīn ŋúb́ tiŋan!» Toobiyaasi nìn ŋúń ki cúú ujɔmee ní ki dáaĺ-u ki bíl̀ dimɔɔgbandi.

⁴Ntuunee nìn bí-u yii: «Pùtī-u kí cúú ŋkaam nì diŋuul nì dipɔɔl kí lēē kí bíĺ ŋkpaanceeti, ní kí dū ina kí fá. Di sá yii ŋkaam nì diŋuul nì dipɔɔl nee sá nnyɔkɔkpaan ní.»

⁵Kinaacimpɔmbikee nìn pūtì ujɔmee ní ki lēē ŋkaam nì diŋuul nì dipɔɔl. U nìn lēē ujɔmee dijandi ki ŋmɔ́ ní ki dū ŋyaam ki pùkū din kíǹee.

⁶Míǹ boonee, bi-liitil nìkī bi-saŋŋu dicilpu ki tóob́ kí kɔ́ Meedii tiŋkin.

⁷Niinee kinaacimpɔmbikee bālifì ntuunee yii: «M-nabiki Asariyasi, ba weeŋyi ní ujɔm ŋuul nì u-pɔɔl nì u-kaam cāantí ní?»

⁸Ní ntuunee kíí-u yii: «Ŋfaŋkpitim yaa páb́ uninja àá unimpuee, á wà ujɔmee ŋuul nì u-pɔɔl udaan nimbiin. Nnyiim min làá yīkèe làá jà ŋfaŋkpitim gbanti ní uninjee àá unimpuee ń tɔ̄ u-ba kí nīn cáa cá jaanjaan.

⁹Tinipɔn yaa bí unil nimbiliŋ pu ní bi dū ŋkaam gbanti ki ŋmītèe, udaan làá ká dicáaǹdi.»

¹⁰Bi nìn kɔ́ Meedii tiŋkin ki tóob́ Eekibataani,

¹¹ní Rafayeel bí kinaacimpɔmbikee yii: «M-nabiki Toobiyaasi!» Ní úǹ kíí-ŋu yii: «Ba ŋá?» Ní ntuunee bí-u yii: «Raguweel cee ní ti làá gbíntí kí dòon̄ kunyeeu nee. A-nabiki kiba dee. U cáá bisal ubɔ bi yíì-u Saara.

¹²Usapɔɔn gbanti boonee, waa ti cáá jipɔɔnaaa, kaa ti cáá bisal ubɔ mun. Sii nì Saara pēē kiŋkiŋ ní. An puee a cáá nsan kí cáá Saara kí jī u-baa fakal. U sá usapɔɔn un cáá iciinee, ki cáá dipɔbil ní ki ŋān̄ mun, ní u-baa mun sá unimɔnti.»

¹³Ní ŋu nìkī ki lī yii: «A cáá nsan kí cáá-u. M-nabiki, pīlifiǹ-mi, m làá sòoǹ kisapɔmbiki gbanti pu ki-baa cee kujoou nee ú dū-kì kí tīī-si. Ní ti yaa láa fātìi gítìń Rageesee, tí dāá ŋá u-pu tinimpucan. M nyí tiŋan yii Raguweel kaa làá yíí kí taa dū-kì kí tīī-si àá kí kíí kí dū-kì kí tīī ubɔ. U yaa ŋá mimmee, see bí kpɔ̀-u kí nóó nì Mooyiisi marau. Di sá yii u nyí mara poonee, sii di cáá nsan kí cáá-kì kí wàatī ní bin kɔkɔ kíǹee ń nín páań. An puee, pīlifiǹ-mi m-nabiki, kujoou nee, man nì Raguweel làá sòoǹ kisapɔmbiki nee pu, ní ḿ tùkù ki-baa ń dū-kì kí tīī-si ticati. Ti yaa láa fàtīi gítí Rageesee, ti làá dāá yòon̄-kì ní kí cáá-kì kí cùnnì a-dumpu.»

¹⁴Niinee Toobiyaasi kíí Rafayeel yii: «M-nabiki Asariyasi, m gbìl̄ yii bi dū-u ki tīī ticati ŋfunyɔm miluli pu, ní u-calib kɔkɔ kpíì kunimpucandiin. Kunyeeu, bi yaa là kí dòon̄ nì uee, bi kúù ní. M gbìl̄ biba mun cee yii arasinii ubɔ di nìn kù-bi.

¹⁵An pu ní m fàŋkí. Arasiniiyee kaa ŋáań usapɔɔnee tiba, ama ŋyunti ŋun ní uninja yaa là kí dòon̄ nì uee ní ú fáá kí kpɔ̀ uninjee. M sá m-baa bibaabil ní. M yaa kpíìyee, m làá yàntī m-baa nì m-na ń kpú kunimbaaun m-pu. Baa ti cáá jipɔɔn ubɔ ń síb́-bi.»

¹⁶Ní Rafayeel bí-u yii: «A súntì tin a-baa tùkū-see pu níii? M nyí u tīī-si mara yii á yòon̄ unimpu úǹ u-ba dicaŋkun naa! M-nabiki, pīlifiǹ-mi, taa yàntī arasinii gbanti bɔti ń páb́-si, sii dee cáá-u. M nyí tiŋan yii kujoou nee gbee, bi làá dū-u kí tīī-si ú kpántí a-nimpuu.

¹⁷Ama a yaa làá kɔ́ kunimpucandiinee, á yòon̄ ujɔmee pɔɔl kikatii nì u-ŋuulee kí dūú páká amɔsiŋkoon kisambiki kin poon bi tùutī talaaluee poon. Nnunnu làá gbìtī ní arasiniiyee yaa gbìl̄ ŋu-puee, u làá sāǹ kí taa ti pée gítiń u-cee dalba dalba.

¹⁸Ŋyunti ŋun ní si nì u làá kpāfèe, ni-liitil ń yīkì dicilpu kí mèè ní kí gbàam̀ ti-Dindaan un bí yilpuee yii ú sɔ̄ ni-saai kí wúń ni-pu. Á taa fàŋkì, di sá yii sii di pée yì unimpu gbanti kí nīn cáa cá talku ní an sá yii sii di làá fīī-u. U làá táá-si ní m tīī-si dimákal yii u làá màal̀-si mbiyaamu mun làá nīn bí kii nnabiyaamuee kí tīī-si. An puee á taa dūú páb́ a-ba.»

¹⁹Ŋyunti ŋun Toobiyaasi gbìl̄ tin Rafayeel sòon̄ee nì u nín béè yii Saara sá u-dicaŋkun niliu ubɔ ki sá u-baa naakookunee, ní u kíĺ ki néeń-u tikpil tikpil ní usapɔɔnee kɔ́-u tiŋan.