Read Ntcham Tobit 8 Bible Online

Tobit 8 - Ntcham bible

Tobit 8

¹Ŋyunti ŋun bi jíń ki nyùn̄ ki dóòyee, bi làá kɔ́ kí dòon̄ dee. Bi nìn yōoǹ kinaacimpɔmbikee ki cáa kɔ́ǹ kudiin.

²Niinee Toobiyaasi téetì tin Rafayeel bàà sòon̄ee pu. Ní u nyántì u-lookun ujɔmee pɔɔl nì u-ŋuul ki dūu páká amɔsiŋkoon ŋin kā kisambiki kin poon bi tùutī talaaluee.

³Ujɔmee nunuŋu nìn jìn̄ arasiniiyee ní u kɔ́ kutaa ki sáǹ ki cūtìi nyáń Eejipiti tiŋkin. Rafayeel nìn jìn̄-u, ki jáń ki pɔ́ɔkiǹ-u ní ki dū ikusaka ki bóob́-u niin niin.

⁴Míǹ boonee ní bibaatiibi nyáń ki yāntì Toobiyaasi ní ki dū kudii ki kpàl̄. Niinee Toobiyaasi yíkì kilambaŋ pu ní ki bí Saara yii: M-niisal, yīkì tí mèè kí gbàam̀ ti-Dindaan ú dàkà-ti u-laŋŋaŋfitiiku ní kí tīī-ti u-fiil.

⁵Saara yíkì ní bi kíĺ ki bíi mèé ki gbàam̀ ti-Dindaan yii ú fīī-bi. Toobiyaasi nín nìn mēē puee sèé: «Ti nyɔ́ŋkí-si, ti-baabi Nimbɔtiu! A-yindi ń ká inyɔŋki kí nīn cáa cá jaanjaan! Kutagbɔŋu nì tiwannáaŋkaal kɔkɔ ń nyɔ̄ŋkì-si kí nīn cá abin abin!

⁶Sii di náań Adam, sii di tí náań u-nimpuu Awa ú nīn tútúǹ-u kí nīn tīkintí-u. Bíǹ binib bili gbanti di màl̄ inifunaan kɔkɔ. Sii di lī yii: <An kaa ŋān̄ unil ń nīn bí u-baba míǹ. Tí náań un làá nīn tútúǹ-uee kí ŋàl̄-u[21].>

⁷Kɔŋkɔnnee, an kaa sá nlandɔkɔ ŋun kaa kítèe di bíi téekí-mi ḿ cáá m-niisal nee, ama mbaamɔn landɔkɔŋu di bíi téekí-mi. M gbàam̄-si, sɔ̄ man nì u saai, kí pɔ̄-ti diyimɔɔl tí nīn bí dicilpu kí tin púĺ.»

⁸Míǹ boonee ní bi kíí dicilpu yii: «Ameeni, ameeni!»,

⁹ní bi dōoǹ kunyeeu gbanti.

¹⁰Raguweel yíkèe ni ki kóoǹ u-tɔntɔnliibi ki kpáfì ki cūtìi bíi gbì ŋfal. Di sá yii u nìn lī yii: «An ŋūǹ yii kinaacimpɔmbikee kpíì. An yaa lafun jítì mimmee, binib làá bèel̀-ti ní kí sìì-ti.»

¹¹Ŋyunti ŋun bi gbìn̄ ŋfal ki dóòyee ní Raguweel fātìi gítìń mmɔŋki ní ki yíiń u-nimpuu

¹²ki bí-u yii: «Tɔ̄ a-tɔntɔnliibi binimpoobi kansikin ubɔ ú kɔ́ kudiin kí kpèè Toobiyaasi yaa dáá gbíntìi bí dimaŋfalin. An yaa ŋá yii u kpíìyee, ti làá ŋmā kí síb́-u ubɔ ń taa béé tiba.»

¹³Ní bi yíiń utɔntɔnlee, ki tūū fitila ní ki cúú kudii punyɔkɔki ki pīitì. Utɔntɔnlee kɔ́ee ki ká yii bi-liitil dɔ̄ ki gèeǹ fɔ̀rrr.

¹⁴Ní u nyáń ki bí-bi yii: «U bí dimaŋfalin! Tikɔkɔ pée bíi còom̄ tiŋan ní!»

¹⁵Niinee ní bi jáam̀ Unimbɔti un bí yilpuee ki lī yii: «Unimbɔti, a máaǹ bin pɔbil bí diba nì see ń nyɔ̄ŋkì-si! Bí nīn nyɔ́ŋkí-si kí nīn cá abin abin!

¹⁶M jáaḿ-si a nín gbéeǹ-mi mmɔnnee! Di sá yii m nín bàà dàkafī puee, an kaa ŋá míǹ ama ní a dàkā-ti a-poon nín mɔ̄ tikpil puee.

¹⁷Ti jáaḿ-si a nín súń mbibaabilimu muli nee saai puee! Dàkà-bi a-poommɔŋŋu kí fīī-bi! Yàntī bí nīn bí mmɔnni nì dineendi poon.»

¹⁸Míǹ boonee ní u tīī u-tɔntɔnliibi mara yii bí gbīŋkì ŋfalee kí wàatī kutaa ń nín wúntí.

¹⁹Raguweel tùkū u-nimpuu yii ú púĺ kpɔnɔb tikpil. U nìn kɔ́ u-nacaŋkpuŋkun ki lēē inaa ili nì ipijaa inaa ní ki yāntì bi kūū ki ŋáŋkì tinan ki tɔ́kɔǹ. Niinee bi kíĺ ki bíi bɔ́ntí jiŋaal.

²⁰U nìn yíiń Toobiyaasi ní ki bí-u yii: «A làá ŋá doo ŋwiin ŋubɔ kpá saalku kaa làá cù laaba, ama a làá gbíntí m-cee doo kí jī kí nyɔ̀ ní kí tīī m-bisal dipɔɔpindi ú ŋmā kí súntí inaabu in yāntì u jíń falaa tikpil nee pu.

²¹Kɔŋkɔnnee, á fōō m-gaajawanti kɔkɔ dijandi, ní kí fàtīí gítí a-baa cee tiŋan. Dijandi din kíǹee, nimbi di dāa yì man nì m-nimpuu kúm boon. M-biki, ká kunyannyaau, m sá a-baa ní Eedina sá a-na. Ti làá nīn bí sii nì a-niisal cee kí yòon̄ kɔŋkɔnnee kí nīn cáa cá jaanjaan. Nín̄ cáá dimákal, m-biki.»