Read Ntcham Tobit 9 Bible Online

Tobit 9 - Ntcham bible

Tobit 9

¹Niinee Toobiyaasi yíiń Rafayeel ní ki bí-u yii:

²«M-nabiki Asariyasi, yòon̄ bitɔntɔnliibi binaa nì igutaamu ili. Nín̄ cá Rageesi tiŋkin, Gabayeel cee. Dū kugbɔŋu kun pu bi nyīī ŋŋal nee kí tīī-u ní kí fōoń animbil ŋin bí u-ceeyee. Míǹ boonee á kpáaǹní Gabayeel ú dāan̄ tí jī tinimpucan jiŋaaliu.

³A nyí tiŋan yii m-baa tin kā ki kàaǹ iwiin. Ŋwiin ŋun an bàà sá tí gítée ŋubɔbɔ yaa páaǹ, u làá kíĺ kí nīn bíi dàkafī tikpil. Kí kūtì muee, a nyí Raguweel nín pūtì puee, maa làá ŋmā kí lákatí u nín pūtì puee pu.»

⁵Niinee Rafayeel yōoǹ bitɔntɔnliibi binaa nì igutaamu ili ki nín cá Rageesi, Meedii tiŋkin. Bi nìn gbíntì Gabayeel cee ní ki dōoǹ. Rafayeel nìn dū kugbɔŋu kun pu bi nìn nyīī ŋŋalee ki tīī-u ní ki kpáà tùkū-u yii Toobii jipɔɔn Toobiyaasi cáá unimpu ní ki yíì-u ú dāan̄ tinimpucan. Dicilpu niinee Gabayeel kàan̄-u animbil kutukub bin pu bi nìn dū njalimu ki nyīīyee. Bi kàan̄ míǹ ki dóòyee ní bi yōoǹ ki dūu túǹ igutaamu.

⁶Kutaa wúntì kutaafaau pɔ̀lpɔlee ní bi nín cá tinimpucan. Bi nìn kɔ́ Raguweel cee ní ki ká Toobiyaasi kā ki jīǹ tijin. U ká-bee ní u nyīī ki yíkì dicilpu ní ki jáam̀ Gabayeel. Gabayeel nìn kíĺ ki bíi sūǹ ní ki mēē ki bīiǹ u-pu ki lī yii: «Ubaatimɔnti, deedeedaan nì tinitidaan un cáá ujipɔnti umɔntee! Ti-Dindaan ń tīī-si dibiindi din nyánní yilpuee! Ú bìin̄ a-nimpuu nì a-nimpuu baa nì u-na pu! M jáaḿ ti-Dindaan, di sá yii m nín wál̀-see, an bí kii m-wee Toobii u-ba ní m kée.»