Read Ntcham Judith 1 Bible Online

Judith 1 - Ntcham bible

Judith 1

¹Neebukadineesaar nìn kāl̀ Niiniifi kitiŋkpaaŋŋin ní ki jíń Asuur yab pu dibeel. Abin saalaa nì ali poonee, Aripakisaadi mun bí Eekibataani tiŋkin ki jīǹ Meedeesi yab pu dibeel.

²Aripakisaadi nìn yāntì bi kpítì ataŋkpee ní ki dūu máń digundi ki māntìi tú Eekibataani tiŋki. Ditaŋkpal kamaa waaŋŋu nìn sá meeta ubɔ nì dijandi ní di-púuŋŋu sá meetab bita. Digundi din bi nìn máńee púuŋŋu nìn sá meetab biŋmoo kpá imuŋku ili ní di-waaŋŋu sá meetab mmuŋku nì biŋmoo.

³U nìn máń adiin ŋin fɔ̀kɔ̀ ki pɔ̄ɔ̄yee ki nákáǹ mpunyɔmu, ŋi-fɔkɔŋŋu sá meetab imuŋku ili nì saalaa. Adiinee nyeel waaŋŋu nìn sá meetab mmuŋku nì saalaa.

⁴Mpunyɔmu mu-ba fɔkɔŋŋu nìn sá meetab biŋmoo kpá imuŋku ili ní mu-waaŋŋu nìn sá meetab mmuŋku. An nín nìn yāntì ajanjakiti nì bijanjaliibi bin còom̄ ataa pu bi dáá bíi bífí-bee nìn ŋūǹ kí tɔ́kɔń kí còom̀.

⁵Ŋyunti gbanti ní ubɔti Neebukadineesaar nìn cūtìi jáń nì ubɔti Aripakisaadi Ragawu tiŋki kin tèen̄ee pu.

⁶Bin kɔkɔ nìn kóò ajoon pu nì Eefiraati nì Tiigiri nì Idasipee tantakaŋinee nìn dɔ́miń ki kútì Neebukadineesaar pu, ki kpáaǹ bin mun nìn kóò kitiŋ kin tèen̄ ki bí Eelmaayiisi bɔtiu Ariyɔɔki taapuee. Míǹ ní atimbun tikpil nìn kóoǹ ki kpáfì kí já Keeleewuudi jipɔmbi kɔndi.

⁷Asuur bɔtiu Neebukadineesaar nìn tú ituun bin kɔkɔ nìn kóò Peersee nì bin kɔkɔ nìn kóò ŋwìiń jeetilaŋkee, nì bin kóò Siliisii nì Damaasi nì Leebanɔn nì Antiiliiban nì bin kɔkɔ kóò Meediiteeranee tiŋkugbandee cee.

⁸U nìn gíti tú ituun bin kóò Kaarmeel jool puee nì Galaadi tiŋki nì Galiilee ŋgan pú nì Eesdreelɔn timpiliŋki kikpaaŋŋi yab cee,

⁹nì bin kɔkɔ kóò Samaarii timmun nì ntimu mun bí Jɔɔdan buŋgbandi ŋwìiń jeetilaŋki pú kí cáá sāā Jeerusaleem nì Batanee nì Keeluusi nì Kadeesi nì Eejipiti mɔɔl nì Tafineesi nì Ramseesi timmu nì Geeseem laguŋgun timmu,

¹⁰kí cáá sāā Taniisi nì Meemifiisi nì bin kɔkɔ kóò Eejipiti tiŋkin kí cáá sāā Eetiiyoopii tiŋki kpaanyɔkɔee.

¹¹Ama ntimu gbanti kɔkɔ yab nìn kpēē ki sīŋkiǹ tin Asuur yab bɔtiu Neebukadineesaar nìn sòon̄ee. Bi nìn yíì kaa kútì u-pu kí já kujaau, kun puee baa nìn fàŋkí-u. Ama bi nìn yúl̀ kii unibaantee ní ki jáń nì u ní ki nìn jìn̄ u-tuuŋyi nì iŋaŋkulim nì icoo gbòooo.

¹²Neebukadineesaar nìn fōō ntimu gbanti kɔkɔ pu mbum. U nìn pūtì u-beejal nì u-beel yii u làá tɔ̀ Siilisii yab nì Damaasi yab nì Siirii yab nì Moowaab yab nì Amɔn yab[1] nì Juudee yab nì Eejipiti yab kí yòon̄ Meediiteeranee tiŋkugbandi yab kí cáá sāā Tikati mɔɔl gbandi yab kɔkɔ ipɔntoon, kí dū kitàataajiki kí kpɔ̀-bi.

¹³U nín kāl̀ dibeel abin saalku nì ali poonee ní u nì u-janjakitil bóob́ dikɔ̀ndi kí jáǹ Aripakisaadi. U nìn jáń ki pɔ́ɔkiǹ-u ki jìn̄ u-janjaliibi bin jàkà itaamuee nì bin kàal̀ janjatɔrɔkub puee.

¹⁴Neebukadineesaar nìn jáń ki fōō Meedeesi bɔtiu timmu áli ki tin bàn̄ Eekibataani tiŋki, ki fōō ki-diiŋŋi ŋin fɔ̀kɔ̀ ki pɔ̄ɔ̄yee, ki fúkúl̀ ki-nyɔŋki ki yāntì kitinnyaaŋŋi gbanti kpántì adigbuŋkati ŋma.

¹⁵U nìn cúú Aripakisaadi Ragawu jooŋŋi pu ki dū kikpaŋ ki sāā ki kūū-u ki nāaǹ-u katanjoolii.

¹⁶U nìn fātìi gítìń Niiniifi tiŋkin u nì u-janjakitil binib cutimaanyi. U nì bi nìn kpáfì ki ŋūŋfì ki jíń jiŋaal iwiin dilaataal nì mmuŋku.