Read Ntcham Judith 10 Bible Online

Judith 10 - Ntcham bible

Judith 10

¹Judiiti nín kúuǹ ki yíiń Isirayeel Nimbɔtiu míǹ ki gbēeǹ ní ki sòon̄ tibɔti gbanti kɔkɔ ki dóòyee,

²ní u yíkì laakin u bàà dɔ̄ dicincibilee ní ki yíiń u-tɔntɔnliu unimpu ní ki kpákatì kudii kun poon u kàal̀ ŋwiŋŋuŋfikaa dal nì jiŋaalib yuntiŋuee.

³U nìn cúú kutuku un u bàà pēēyee ki pēetì ní ki lēē tikpiipuwan tin u lōōyee ki bíl̀. U nìn fùl̄ ní ki nyàab̄ ŋkpam min sɔ́fì tiŋanee ki ŋmītì. U nìn cāatì u-yikpiti ní ki nyàab̄ kiŋaabiki ki cúú ní ki dū jiŋaal wanti tin u nìn pèentí ŋyunti ŋun ní u-cal Manasee nìn bée ki pēeǹ.

⁴U nìn nyàab̄ anaataka ki táká, ki nyàab̄ tiléeŋkaal ki léeǹ, ki nyàab̄ abɔmbil nì kibɔmbiki ki fúuń, ki nyàab̄ falfatib ki túuń ní ki dū u-wannyɔkɔntikaati kɔkɔ ki nyɔ̄kɔntì u-ba ní ki nyáantì u-ba kí ŋmā kí dáaĺ bininjab bin kɔkɔ yaa wál̀-uee.

⁵U nìn nyàab̄ ndamam ntúun ki tīī u-tɔntɔnliu nì ŋkpam dibool. U nìn nyàab̄ ɔɔji yim nì asubikulim kalaau nì kpɔnɔb nì waagaasii. U nìn dū tíǹ gbanti kɔkɔ ki bóob́ tiŋan ní ki dūu túǹ u-tɔntɔnliu.

⁶U nìn nyáń ki cá Beetulii punyɔkɔki watil pú ní ki ká Oosiyasi nì kitiŋ kpilib Kabriisi nì Kaarmiisi niin bi yú ki cí.

⁷Bi nín ká u-nimbiin cúu kpántì nì u-bɔkutil mun kpántèe ní bi pàkā-u u-nyaaŋku pu ki bí yii:

⁸«Ti-naanjab Nimbɔtiu ń dàkà-si u-laŋŋaŋfitiiku á ŋmā kí ŋá tin a bɔ́ntì kí ŋée Isirayeel yab jilmau nì Jeerusaleem nyooti pu!»

⁹Ní u jáam̀ Unimbɔti ní ki bí-u yii: «Tīīmaan mara bí pìitī-mi kitiŋ punyɔkɔki. M làá nyā kí cùú ŋá tin ni sòon̄ nì mee.» Niinee ní bi tīī binaacimpɔmbi mara yii bí pìitī-u kii u nín lī puee.

¹⁰Bi nìn ŋá míǹ, ní Judiiti nyáń nì u-tɔntɔnliu. Kitiŋee nib nìn pée kpèé-u ní áli u dāa kpákatì dijool ki cūtìi pūntì ditantakal. Míǹ boonee ní baa ti wál̀-u.

¹¹U nì u-tɔntɔnliu nìn pée còom̄ ní cáaa ditantakalin ki cá ní Asuur yab janjaliibi bin nìn bí ki kpèé niinee dɔ́miń ki túŋkì-bi.

¹²Bi nìn cúú-u ní ki bālifì-u yii: «Bilab jandi ní a bí ní? A nyánní la? A cá la ní?» Ní u kíí yii: «M sá Eebru yab sapɔɔŋwu ubɔ ní m sáǹ-bi, kun puee bi bíi bɔ́ntí kí dū bi-ba kí ŋá ni-ŋaan.

¹³M dɔ́miń kí ká ni-janjakpiliu Ooloofeerni kí tùkù-u ibaamɔn bɔti, ní kí dàkà-u nsan ŋun u ŋūǹ kí dī kí já kí fōō ajoon pu tiŋki kɔkɔ u-janjaliibi ubɔbɔ ń taa kpúee ní.»

¹⁴Bijanjaliibee nìn pílifì tin u sòon̄ee ní ki kpēē u-nimbiin. Bi nìn ká yii u ŋān̄ kunyaaŋŋu. Bi nìn bí-u yii:

¹⁵«A nín ŋá malaa ki kpákatìń ki dū a-ba ki dàkā ti-kpiliuee, a fīī a-ba ní. Kɔŋkɔnnee, nín̄ cá u-tantiun. Ti-kansikin biba làá céeǹ-si kí cáá-si kí cùnnì u-cee.

¹⁶A yaa bàn̄ u-nimbiinee, á taa fàŋkì. Ama á pée tùkù-u tin a sòon̄ nì ti nee, u làá ŋá-si tiŋan.»

¹⁷Bi nìn lēē bi-kansikin bininjab dilaataal ki kútì u nì u-tɔntɔnliu pu, ní bi céeǹ-u ki cáa cūnnì Ooloofeerni tantiu caŋin.

¹⁸Binib nìn kóoǹ an kɔkɔ pu ki kpáfì dinaapaalin, di sá yii bi nìn sòon̄ ki nāatì tɔb yii Judiiti dɔ́miń. Binib nìn dɔ́miń ki ŋá kulaguŋu ki māntìi tú-u. Ŋyunti gbantee úǹ nìn yú Ooloofeerni tantiu boon kí cí bí sòoǹ nì u u-bɔti.

¹⁹Bi nìn bí ki kpèé u-nyaaŋku ní ki pàkà Isirayeel yab u-pu, ní ki nìn sòoǹ ki tùkù tɔb yii: «Ŋma di ŋūǹ kí kpèè dinibul din cáá binimpoobi nee juti fámee? An kaa ŋān̄ bí yàntī Isirayeel yab ubɔbɔ ń nīn bí dimaŋfalin! Bin làá kíń kí nīn bí dimaŋfalinee dāa ŋūǹ kí ŋmàtiǹ kitiŋ kɔkɔ!»

²⁰Bin kɔkɔ nìn dɔ̄ Ooloofeerni ceeyee nìn nyáń ki kpáaǹ u-janjakpilib kɔkɔ, ní bi cáá Judiiti ki kɔ́ǹ u-tantiun.

²¹Ooloofeerni nìn dɔ̄ u-dooŋu pu, sabɔrɔ un bi dū ŋŋaaman ki lùn̄ee taapu ki ŋùŋfī. Bi nìn dū sindaariya nì ataŋkpamɔnti ŋin bi yíì eemeeroodi nì ataŋkpamɔnti aba mun ki nyūntì-u.

²²Bi nìn sòon̄ nì u Judiiti pu ní u nyáń ki yúl̀ u-tantiu nyɔkɔpu u-tɔntɔnliibi ŋúb́ animbil fitilab ki līī u-nyɔkɔpu.

²³Ŋyunti ŋun Judiiti bāań u nì u-janjakpilib nimbiinee, ní bi-kɔkɔ bíi kpèé u-nimbiin nyaaŋku. U nìn tātìi dōoǹ dicincibil Ooloofeerni nimbiin, ama ní u-tɔntɔnliibi yáatì-u kitiŋ ki síiǹ.