Read Ntcham Judith 11 Bible Online

Judith 11 - Ntcham bible

Judith 11

¹Ooloofeerni bí-u yii: «Nín̄ cáá dimákal, unimpuee, taa fàŋkì tiba, di sá yii maa láa pée ŋá unil un di lēē kí tɔ̄ ditundi kí tīī kitiŋ kɔkɔ pu bɔtiu Neebukadineesaaree tikpitil ki ká.

²Kɔŋkɔnnee, a-nibul din di kóò ajoon pu tiŋkinee yaa kaa bàà kpēē-mi fámee, maa bàà làá dúkutí m-kpaŋki kí jáǹ-bi. Ama bíǹ bi-ba di là ní an bāań-bi.

³Kɔŋkɔnnee tùkù-mi kun pu ní a sáǹ-bi ki dɔ́miń ti-ceeyee. Kéè a dɔ́miń kí fīī a-ba neeee! Nín̄ cáá dimákal, a làá nīn bí dimaŋfalin kunyeeu nee nì iwiin in bí ki dòońee.

⁴Ubɔ kaa làá ŋá-si tiba. Ama bi làá nīn ŋúb́-si tiŋan kii m-kpiliu ubɔti Neebukadineesaar tɔntɔnliibee.»

⁵Judiiti bí-u yii: «Fōō man a-yumbuu nyɔɔbuŋŋi. Man a-tɔntɔnliu làá sòoǹ nì si ní maa làá sòoǹ tinyimɔmbɔti báà tiba kí tùkù m-dindaan kunyeeu nee.

⁶A yaa pílifì man a-tɔntɔnliu nyɔɔbuŋŋi, Unimbɔti làá tɔ̄ u-tundi kí tīī-si, ní m-dindaan pée kpá kí lítí u-tuuŋŋi poon.

⁷M pūtì kitiŋ kɔkɔ pu bɔtiu Neebukadineesaar nì u-pɔŋŋu ŋun u dūu túnní-si á dūú kpòotī kinaŋ kin kamaa bí dimaŋfalinee kí tàkan̄ nsammɔnti puee yii, sii puee, an kaa sá binib ŋmaniŋma di làá nīn bí u-taapu, ama ipeel nì tiwaŋkuti nì inoon mun làá nīn bí dimaŋfalin ki tīī Neebukadineesaar nì u-dicaŋku kɔkɔ[29].

⁸Ti gbìl̄ bi sòon̄ a-nyil nì a-yábitam pu, ní bi sòoǹ kitiŋ kɔkɔ pu yii sii baba di sá unimɔnti dibeel kɔkɔn, ní a-ciiŋyi puee, a pɔ̄ɔ̄ ní ki nyáń a-ba dikɔ̀ndi kamaa poon.

⁹«Ti gbìl̄ tin Akiyɔɔr nìn sòon̄ ŋyunti ŋun a yíiń dikpafilee poon, kun puee Beetulii yab fīī-u ní u máafì-bi tin kɔkɔ u sòon̄ a-nimbiinee.

¹⁰An pu ní m-dindaan nì m-kpiliu, á taa dū tin u sòon̄ee kí ŋá bugbambu, ama á dūú kpāafì a-pɔbilin, di sá yii an sá mbaamɔn ní. Di sá yii baa dátí m-nibul tafal, ní kitàataajiki kaa ŋūǹ kí ŋá-bi tiba, an yaa kaa tin sá yii bi ŋá bi-Nimbɔtiu ikpiti.

¹¹An di bíi bàń-bi kɔŋkɔnnee. An pu ní m-dindaan kaa làá gítí u-boon ní ki làá jī dinyandi. Ŋkúm làá jēetí bi-pu, di sá yii ikpiti kɔ́ bi-kansikin ní bi gbítì bi-Nimbɔtiu ŋuul kii ŋyunti ŋun ní bi yaa ŋá ikpitee.

¹²Baa ti cáá tijin kí jī ní kaa ti cáá nnyim mun kí nyɔ̀. An puee bi lēē yii bi làá kpɔ̀ bi-waŋkuti kí ŋmɔ́, ní tin kɔkɔ ní Unimbɔti síiǹ-bi mara yii bí taa jēe, bi lēē yii bi làá jī[30].

¹³Bi lēē yii bi làá jī bilee un bi péé péé ki cáńee nì bi-damam nì bi-kpam saalaatiiti tin bi bàà kpáafì tiŋan kí cáá sú bisaraaŋaliibi bin bí ti-Nimbɔtiu diikun ki tūǹ ditundi Jeerusaleemee. Tijin gbanti muee, samaa kansikin ubɔ kaa cáá nsan kí dū u-ŋal kí gbēē-tì[31].

¹⁴Bi nìn tú binib bikpilib bin bí Jeerusaleem tiŋkinee bíǹ ń pɔ̄-bi nsan bí ŋmā kí ŋá míǹ, di sá yii bíǹ bi-ba nìn pée ŋá míǹ ní.

¹⁵An yaa lafun ŋá yii bikpilibee pú-bi nsan ní bi jíń tijin gbantee, Unimbɔti làá dū-bi kí ŋá a-ŋaan ní á nàan̄-bi.

¹⁶An pu ní ŋyunti ŋun ní man a-tɔntɔnliu béè mimmee ní m sáǹ-bi, ní Unimbɔti tú-mi ḿ dāá tɔ̄ dituŋkpaandi, man nì si. Án làá dāá ŋá bin kɔkɔ làá gbìl̄ tibɔti nee bitii.

¹⁷Di sá yii man a-tɔntɔnliu yú yilpu Nimbɔtiu deedee ní ki jáaḿ-u kunyeeu nì ŋwiimpu[32]. Kí yòon̄ kɔŋkɔnnee kí nīn cée, m làá gbíntí sii man dindaan cee doo, ama ní man a-tɔntɔnliu làá nīn nyēē kunyeeu kamaa kí nīn mèé Unimbɔti kibùmbikin. Úǹ di làá dāá tùkù-mi ŋyunti ŋun ní bi làá ŋá ikpiti gbantee.

¹⁸M làá fàtīí gítiń a-cee, si nì a-janjakitil ń nyā kí jáǹ-bi, ní báà ubɔ kaa làá ŋmā kí yūĺ bi-nimbiin.

¹⁹Míǹ boonee ní ḿ cáá-si kí yìiǹ Juudee tiŋki kɔkɔn áli á tin gbàtī Jeerusaleem. M làá dū a-beejal kí síiń bi-kansikin ní á kpòotī-bi kii ipii in kaa cáá ukpaalee, ní báà kibɔkɔ gba kaa làá gbōol̀-si. Di sá yii an sòon̄ nì mi ki síiǹ ní bi túnní-mi ḿ dāan̄ kí tùkù-si.»

²⁰Tibɔtee nìn fáatiǹ Ooloofeerni nì u-janjakpilib kɔkɔ. Bi nìn pàkā-u u-nyil pu ní ki bí yii:

²¹«Kí yòon̄ kitiŋ kúntilaŋki kiba kí cáá sāā kin kíǹee, unimpu ubɔ kaa ti bí ki ŋān̄ ki cáá dinyil kii unee.»

²²Ooloofeerni bí-u yii: «Unimbɔti béè ní ki túnní-si doo, a-nibul nimbiin kí ŋmā kí dū mpɔn kí ŋá m-ŋaan ní ḿ nàan̄ bin bin kpēē m-dindaan Neebukadineesaar fámee.

²³Siiyee, a ŋān̄ kunyaaŋŋu ní ki ŋūǹ ki sòoǹ tiŋan mun. A yaa ŋá kii a nín lī puee, a-Nimbɔtiu làá kpántí m-Nimbɔtiu. Sii a-ba làá nīn kóò ubɔti Neebukadineesaar dumpu ní á nyā diyindi kitiŋ kɔkɔ pu.»