Read Ntcham Judith 12 Bible Online

Judith 12 - Ntcham bible

Judith 12

¹Ooloofeerni nìn yāntì bi cáá Judiiti ki kɔ́ǹ laakin u-sambiliŋ ŋin sá animbilee bée ní ki tīī mara bí tīī-u tijin tin u yaa là kí jēe nì ndaam min u yaa là kí nyɔ̀ee.

²Ama ní Judiiti bí yii: «Maa làá jī tiba, án nín làá ŋá pu án taa kpántí ditaŋkpagbéetikaal kí tīī-mee[33], ama tin m cáańee làá bà-mi ḿ jī.»

³Ooloofeerni bí-u yii: «Tijin tin a cáań nee yaa láa dóòyee, la ní ti làá gíti ká ti-juti kí tīī-si ní? Di sá yii a-yab báà ubɔ kaa bí ti-kansikin.»

⁴Ní Judiiti kíí-u yii: «Kii a nín bí dimaŋfalin nee, m-dindaan, man a-tɔntɔnliu kaa làá jī tijin tin m cáań nee kí dóó kí wàatī ní ti-Dindaan ń nín dī m-pu kí ŋá tin u bɔ́ntèe.»

⁵Ooloofeerni janjakpilib nìn cáá-u ki kɔ́ǹ tanti ubɔn, ní u dōoǹ ki gèen̄ ki tin cáa sāā kunyataasiiu. Ntaafaabɔmbɔminee ní u yíkì.

⁶U nìn tú bí tùkù Ooloofeerni yii: «M-dindaan ń pɔ̄ man a-tɔntɔnliu nsan ḿ cùú mèè.»

⁷Ní Ooloofeerni kpáafì bijanjaliibi bin cí-uee bí pɔ̄-u nsan ú nyā. Judiiti nìn gbíntì dinaapaalin niin ki kāl̀ iwiin ita. Kunyeeu kamaayee, u nìn cá Beetulii bùmbikin ki fùul̀ dinyimbunimbilin.

⁸U yaa nìn dū u-ba ki múĺ nnyimin ki nyáńee, u nìn mèé ti-Dindaan Isirayeel Nimbɔtiu yii ú kpòotī-u[34] ú ŋmā kí fīī u-nibul yab.

⁹U yaa nìn ŋá u-ba circir ki dóòyee, u nìn gbíntí u-tantiun kí cáá sāā ŋyunti ŋun ní bi làá cáań-u u-jinti kujoou cee púee.

¹⁰Ŋwinnanaati dalee ní Ooloofeerni ŋá tican ki yíiń u-tɔntɔnliibi ŋmaniŋma kaa yíiń u-janjakpilib báà ubɔ.

¹¹U nìn bí Bagoowasi, ufaal un nìn kpèé u-tuuŋŋi kɔkɔee yii: «Cùú ká ueebrunimpu un bí a-cee nee kí páb́-u ú dāan̄ ti-cee ti nì u ń kpāfì kí jī kí nyɔ̀.

¹²Di sá yii an làá nīn sá icoo bɔti ki tīī-ti ti yaa yāntì unimpu un bí kii unee búntì taa dōoǹ nì u. Di sá yii ti yaa kaa yíiń-u míǹ puee, u làá dāá bèel̀-ti.»

¹³Bagoowasi nìn nyáń Ooloofeerni cee ní ki kɔ́ Judiiti cee ki bí-u yii: «Unimpunyaan nee ń taa gùgufì kí dāan̄ m-dindaan cee bí tīī-u tinyool u-nimbiin, kí nyɔ̀ ndamam dipɔɔpindin ní kí kpántí díǹ kii Asuur yab sapɔmbi bin bí Neebukadineesaar dumpuee ubɔ.»

¹⁴Ní Judiiti kíí-u yii: «Man di sá ŋma kí kpákáǹ m-dindaan? Tin tin fáatiǹ-uee, m làá ŋá malaa ní kí tīī-u, ní án làá nīn sá mmɔn ki tīī-mi kí cáá sāā m-kúm dal.»

¹⁵U nìn yíkì ki dū u-wanti ki pēeǹ ní ki dū u-nimpuwanti kɔkɔ ki nyɔ̄kɔntì u-ba. U-tɔntɔnliu nìn kɔ́ ki kpátì ipigban in Bagoowasi nìn tīī Judiiti ú nīn dɔ̀ an pu ki jīǹ tijinee ki bíl̀ Ooloofeerni nimbiin.

¹⁶Judiiti nìn kɔ́nní ki dōoǹ igbanee pu. Ooloofeerni pɔbil nìn yíkì u-pu ní an ŋá-u nyàaa. Waa nìn gíti ŋūǹ kí cúú u-ba ní ki nìn là kí dòon̄ nì u. Kí pée yòon̄ ŋwiin ŋun u wál̀-uee, u pée nyàab̄ ŋyuntimɔnti ŋun ní u làá ŋmàtiǹ-uee ní.

¹⁷Ooloofeerni nìn bí-u yii: «Nyɔ̀ ní ti nì si ń fàal̀.»

¹⁸Judiiti nìn bí-u yii: «M làá nyɔ̀ ukpil, kun puee kí yòon̄ dalin kin bi màl̄-mee, maa làá ká tinyool kii díǹ nee.»

¹⁹U nìn yōoǹ tijin tin u-tɔntɔnliu nìn bɔ́ntèe ki jíń ki nyùn̄ u-nimbiin.

²⁰Ooloofeerni nìn bí dipɔɔpindin u-pu ní ki nyùn̄ ndamam tikpil. Kí yòon̄ daliŋkin bi màl̄-uee, waa láá nyùn̄ ndamam míǹ ŋwimbaanti.