Read Ntcham Judith 13 Bible Online

Judith 13 - Ntcham bible

Judith 13

¹Kunyeeu mɔ́ ki síkitèe ní u-tɔntɔnliibi ŋá malaa ki nyáń. Bagoowasi nìn dū tanti ki kpàl̄ boon pú. U nìn jìn̄ bin bí niinee ubɔ ń taa ti kɔ́ u-dindaan cee ní bi búntì ki cūtìi dōoǹ. Tiŋmanee, bi-kɔkɔ nìn pée gīī ní púb, kun puee bi nìn nyùn̄ ndaam tikpil.

²Judiiti baba di nìn kíǹ Ooloofeerni cee tantin. Úǹ nìn nyùn̄ ndaam ki gbí ki dɔ̄ u-dooŋu pu pái.

³Judiiti nìn tùkū u-tɔntɔnliu yii ú nīn yú kudidooŋkaau boon kí nīn kpèé u nín làá nyā pu kii u nín kpàà ŋáań pu baabadalee. U nìn lī yii u làá nyā kí cùú mèè. Míǹ mbaantiim ní u nìn sòon̄ nì Bagoowasi.

⁴Bitɔntɔnliibi kɔkɔ nìn nyáń. Báà ubɔ, kí yòon̄ kibiki kí cáá sāā ukpaan kaa nìn kíǹ kudidooŋkaaun. Judiiti nìn yú ki kɔ́ĺ Ooloofeerni dooŋu ní ki lī u-pɔbilin yii: «Ti-Dindaan, Unimbɔti Mpɔŋkɔdaan, kpèè nì kulaŋŋaŋfitiiu atuun ŋin ní m làá dū m-ŋalii kí tɔ̄ kí tīī Jeerusaleem tinyool nee.

⁵Di sá yii ŋyunti bāań á fīī a-nibul dee. Yàntī ḿ ŋmā kí ŋá tin m bɔ́ntèe kí ŋmā kí nà binannanliibi bin yíkìi jáà nì tee.»

⁶Niinee ní u cōom̀ ki cūtì ndoo yilpu pú, Ooloofeerni yil caŋin ní ki yōoǹ u-tàataajiki

⁷ní ki sútìi pìl̄ ndoo ki cúú u-yikpiti ní ki lī yii: «Ti-Dindaan, Isirayeel Nimbɔtiu, tīī-mi díǹ mpɔn.»

⁸U nìn dū kijikee ki gāā Ooloofeerni sil nì u-pɔŋŋu kɔkɔ ŋfunyɔm mili ní ki tūkutì u-yil.

⁹Míǹ boonee ní u bíntì dinikpilee ki bíl̀ ndoo taapu ní ki cúú sabɔrɔee ki sākatì. Míǹ boonee ní u nyáń ki dū Ooloofeerni yil ki tīī u-tɔntɔnliu,

¹⁰ní úǹ dūu ŋá u-tɔkɔlin, laakin tijin kàal̀ee. Bi-liitil nìn nyáń dicilpu kí cùú mèè kii bi nìn kpààa ŋáań puee. Bi nìn nyáń dinaapaal pu, ki cōom̀ ki māntì kibùmbiki, ki nín jɔ́ḿ Beetulii jool ní ki tin bàn̄ kitiŋ punyɔmmu caŋin.

¹¹Judiiti páaǹní ndanee ní ki téeń ki tùkū bijanjaliibi bin cí mpunyɔmuee yii: «Pìitīmaan! Pìitīmaan kipunyɔkɔ! Unimbɔti, ti-Nimbɔtiu bí ti-cee kí dàkà Isirayeel u-pɔŋŋu ní kí dàkà binannanliibi u-kpabil kii u nín ŋá pu díǹ nee.»

¹²Niinee, ŋyunti ŋun ní u-tiŋkin ninjab gbìl̄ u-neel puee, ní bi ŋá malaa ki kpákatì ki nín cá bi-tiŋki punyɔkɔki watil pú, ní ki yíiń kitiŋ kpilib ki kpáfì.

¹³Ní bi-kɔkɔ, kí yòon̄ ŋwaamu kí cáá sāā bikpaambi sáǹní ki dɔ́miń, di sá yii baa nìn fōō ki kíí yii u bāań. Bi nìn nín cá kipunyɔkɔpu ki pīitì ní ki fōō binimpoobee. Bi nìn kpāā ŋŋmi kí ŋmā kí wāl̀ ní ki nìn māntìi gɔ́ń-bi.

¹⁴Judiiti nìn téeń ki tùkū-bi yii: «Nyɔ̄ŋkìmaan Unimbɔti. Nyɔ̄ŋkìmaan Unimbɔti un kaa cúú u-laŋŋaŋfitiiku ki páatì Isirayeel nibul pu, ama ní ki dī m-pu ki nàn̄ ti-nannanliibee.»

¹⁵Míǹ boonee ní u cúú diyil ki nyántì ditɔkɔlin ki dàkā-bi ní ki bí-bi yii: «Kpèèmaan Asuur yab janjakpikpaaŋwu Ooloofeerni yil sɔ̀. Kpèèmaan sabɔrɔ un poon u dɔ̄ ŋyunti ŋun u nyùn̄ ndaam ki gbée mun sɔ̀. Ti-Dindaan dī unimpu pu ní ki kūū-u.

¹⁶M pūtì ti-Dindaan un bí dimaŋfalin ní ki wúń m-pu m-saŋŋu kɔkɔ poon nee yii m-nimbiin nyaaŋku kɔ́-u ní ki yāntì u wáŋkì, ama waa gbēē-mi kí kɔ́ǹ-mi tijɔkɔndi nì icoo.»

¹⁷Ní an ŋá samaa kɔkɔ bitii. Bi nìn bōoǹ ní ki jáam̀ Unimbɔti ní ki lī dicilpu yii: «Ti-Nimbɔtiu, ti nyɔ́ŋkí-si, sii un di nāaǹ díǹ a-nibul nannanliibee.»

¹⁸Ní Oosiyasi bí Judiiti yii: «M-bisal, yilpu Nimbɔtiu ń bìin̄ a-pu kí jītíǹ kitiŋ kɔkɔ pu nimpoobi. Inyɔŋki sá ki tīī ti-Dindaan Unimbɔti, kutagbɔŋu nì kitiŋ náanliu! Úǹ un kpōotì-si a gāā ki tūkutì ti-nannanliibi kpiliu yilee.

¹⁹Di sá yii a-mákal làá nīn pée kā binib bin làá nīn téetí Unimbɔti pɔŋŋu puee pɔbiliŋin ní ki cá jaanjaan.

²⁰Unimbɔti ń yòon̄-si yilpu kí nīn cá jaanjaan ní kí ŋá-si tiŋan. Kun puee aa tāaǹ a-maŋfal bi nín kpēē ki sīŋkiǹ a-nibul puee pu, ama a yíkì ki jáń kujaau tí taa lítí, ní ki cōom̀ nsan ŋun tèen̄ cáaa ti-Nimbɔtiu nimbiinee.» Ní samaa kɔkɔ kíí yii: «Ameeni. Án ŋá míǹ.»