Read Ntcham Judith 14 Bible Online

Judith 14 - Ntcham bible

Judith 14

¹Judiiti bí-bi yii: «M-nabiyaamu, pīlifìmaan. Yòom̄maan diyil nee kí dūú lúntí ti-tiŋki gundi yilpu.

²Kutaa yaa fu wúntì kutaafaau pɔ̀lpɔl ŋwìiń yaa fu nyáńee, báà ŋma ń fu yòon̄ u-janjawanti. Bininjab bin kɔkɔ pɔ̄ɔ̄yee ń fu nyā kitiŋin. Ní fu lēē ukpil ubɔ kí ŋá kii ni làá kpákatí kí nīn cá ditantakalin Asuur yab janjaliibi bin bí niinee cee, ama ní taa fu kpákatí.

³Asuur janjaliibi làá yòon̄ bi-janjawanti kí nīn cá dinaapaal pu kí fìntī bi-janjakpilib. Bijanjakpilib làá sāǹ kí kɔ́ Ooloofeerni tantiun kaa làá ká-u. Kufaaŋŋu làá kɔ́-bi ní bí sāǹ ni-nimbiin.

⁴Ni làá jà-bi, ní ni nì bin kɔkɔ kóò Isirayeel tiŋki kɔkɔ puee ń kpɔ̀-bi bi-taatandi poon.

⁵Ama kí wàatī ní ŋá mimmee, ní yíiḿmaan-mi uamɔnja Akiyɔɔr ú dāan̄ kí wāl̀ kí béé unil un di kpēē ki sīŋkiǹ Isirayeel yab, ní ki cáań-u ti-cee doo ú kpúee.»

⁶Bi nìn cūtì Oosiyasi dumpu ki yíiń Akiyɔɔr. U nín bāań ki wál̀ samaa kansikin ubɔ ŋúb́ Ooloofeerni yilee ní u lítí kitiŋ dicincibil ní ki fìkī.

⁷Ŋyunti ŋun bi yāntì u yíkèe ní u sáǹ ki cūtìi gbāaǹ Judiiti taaŋi taapu ní ki bí yii: «Unimbɔti ń bìin̄ a-boon Juuda tantib kɔkɔn nì atimbun ŋin kɔkɔ làá gbìl̄ a-yindi kí fàŋkèe poon.

⁸Kɔŋkɔnnee, māafì-mi tin ní a ŋá iwiin nee kɔkɔ poonee.» Ní Judiiti máafì-u samaa kɔkɔ kansikin kun ní u ŋá ki yōoǹ ŋwiin ŋun u nyáń ki cáa sāā ŋwiin ŋun u bí ki sòoǹ nì bi nee.

⁹U sòon̄ ki dóòyee ní samaa fáá iwinliili ní kitiŋ fōō ki dūu píĺ dàii dipɔɔpindi poon.

¹⁰Akiyɔɔr nín ká tin kɔkɔ Isirayeel Nimbɔtiu ŋée ní u fōō Unimbɔti ki kíí tiŋman pu ní ki yāntì bi gíí-u dikpancandi ní u kpántì Isirayeel yab ubɔ ki dāa sāā díǹ.

¹¹Kù wúntì kutaafaau pɔ̀lpɔlee ní bi dū Ooloofeerni yil ki lúntì digundi pu. Uninja kamaa nìn yōoǹ u-janjawanti ní bi-kɔkɔ nyáń akiti akiti ki nín sìntī dijool tikiŋŋi pu.

¹²Asuur yab nín ká-bee ní bi tú bi cūtìi tùkū bi-janjakpilib ŋwaamu. Bíǹ yíkèe ní ki cūtìi tùkū bi-janjakpilib, bikpilib bin kpòotī binib dilaataalee nì bi-kpootiliibi kɔkɔ.

¹³Bi nìn nín kóò Ooloofeerni tantiun ní ki bí un nìn kpèé u-wanti kɔkɔee yii: «Cùú fìntī ti-dindaan, di sá yii iyumbu i-ba pu bíi sìntī kí dāá jáǹ-ti tí kpɔ̀ kí nàan̄ bi-kɔkɔ múb.»

¹⁴Bagoowasi kɔ́ ki fáá tanti punyɔkɔki, di sá yii u nìn dākafì yii Ooloofeerni nì Judiiti nìn dɔ̄ ki gèeǹ.

¹⁵Ama kii báà ubɔ nín kaa nìn kííyee puee ní u cúú ŋŋaasakaŋkaa ki wákatì ní ki nín kóò kudidooŋkaau poon. U nìn ká Ooloofeerni kpíì ki pá kijalii pu diyil kpá.

¹⁶Niinee Bagoowasi tīl̀ mbiil ki sūǹ ki yáliŋkí ki fátí mbiil mpɔn ní ki cúú u-wanti tin u pēēyee ki dáaĺ ki cátì.

¹⁷U nìn sáǹ ki kɔ́ tanti un poon ní Judiiti nìn kóòyee kaa ká-u. Niinee ní u tùl̄ ki nyáń samaa cee ki fáá mbiil yii:

¹⁸«Iyumbu yíkì kaa kíí i-ba pu. Eebru yab unimpu bambaanti ŋúń ki cáań icoo ki kɔ́ǹ ubɔti Neebukadineesaar dicaŋkun. Di sá yii Ooloofeerni dɔ̄ kitiŋ diyil kpá.»

¹⁹Asuur yab janjakpilib nín gbìl̄ tibɔti gbantee ní bi cúú tiwan tin bi pēēyee ki dáaĺ ki cátì. Baa nìn gíti nyí tin poon ní bi bée ní bi-biilii nì bi-kuŋkuuntii nìn yāntì dinaapaal kɔkɔ pu fōō ki píĺ dàii.