Read Ntcham Judith 15 Bible Online

Judith 15 - Ntcham bible

Judith 15

¹Asuur janjaliibi bin nìn bí bi-tantibinee nín gbìl̄ tin bāańee ní an ŋá-bi bitii.

²Bi nìn fāŋkì ní bi-wunti gbáà kpàkpa. Báà ubɔ kaa nìn gíti kíí kí yūĺ u-juti cee, ama bi-kɔkɔ nìn sáǹ ki fá dinaapaal dicilpu. Bi nìn sáǹ ki nóó nsàmbiyaamu mun di dɔ̄ ditantakalin nì ajoon pu tiŋkinee.

³Bin nìn ŋātì bi-naapaal ajoon pu tiŋkin ki māntìi tú Beetulii tiŋkee mun nìn lēē itaaci ki ŋá. Niinee Isirayeel yab bin kɔkɔ ŋūǹ kí já kujaauee páatìi jéetì bi-pu.

⁴Oosiyasi nìn tú binib Beetoomeestayiim nì Beebaayi nì Kooba nì Koola timmun nì Isirayeel tiŋki kɔkɔn bí bāakì kí lī tin di jítèe, ní ki mēē yii bi-kɔkɔ ń páatíí jēetí binannanliibi pu kí pɔ̀-bi.

⁵Isirayeel yab nín gbìl̄ mimmee ní bi páatìi jéetì bi-pu dicilpu ki jìn̄-bi ki tin nyáń Kooba. Jeerusaleem yab nì bin kóò ajoon pu tiŋkinee kɔkɔ mun nìn dūu bāań, di sá yii bi nìn tùkū-bi tin di nìn jítì bi-nannanliibi naapaal puee. Galaadi yab nì Galiilee yab nìn kpìlìń-bi dijandi diba pú ki pɔ̀n̄-bi áli Damaasi tiŋki nì ntimu mun māntìi tú-kèe.

⁶Beetulii yab bin nìn kíǹee nìn páatìi jéetì Asuur yab naapaal pu ki fúkúl̀ ní ki nìn ká tigaajawan tikpil.

⁷Isirayeel yab pɔ̀n̄ Asuur yab ki dóò ki fātìi gítìńee ní ki mun yōoǹ tin kíǹee. Bin nìn kóò ajoon pu tiŋkin nì ditantakalin timbilimmun nì tisatinee nìn fúkúl̀ ki ká tigaajawan tikpil, di sá yii an nìn bí ki náań ní.

⁸Usaraaŋakpil Yooyakiim nì Isirayeel kpilib bin kóò Jeerusaleemee nìn dɔ́miń kí kpēē tiŋan tin ní ti-Dindaan ŋá ki tīī Isirayeelee, kí kpáàa wāl̀ Judiiti kí jāam̀-u.

⁹Bi nín kɔ́ u-ceeyee ní bi kpáfì dicilpu ki pàkā-u ní ki bí-u yii: «Sii di yōoǹ Jeerusaleem tiŋki kin sá Isirayeel nyooti nì ti-nibul mɔŋŋuee yilpu.

¹⁰Sii a-ba di ŋá míǹ, a ŋá Isirayeel tiŋan ní an mɔ́ɔkiǹ Unimbɔti u-ba tin a ŋée pu. Ti-Dindaan Mpɔŋkɔdaan ń bìin̄ a-pu kí nīn cá jaanjaan!» Ní samaa kɔkɔ bí yii: «Ameeni! Án ŋá míǹ.»

¹¹Isirayeel yab nìn dū iwiin mmuŋku nì saalaa ní ki fúkúl̀ Asuur yab naapaal. Bi nìn dū Ooloofeerni tantiu nì u-sambiliŋ ŋin sá animbilee nì u-dooi nì u-kɔŋkɔnnyɔkaabi nì tin kɔkɔ pée bí poonee ki tīī Judiiti. U nìn fōō ní ki dū dijandi ki túǹ u-mambooŋwu ní ki dū dijandi din kíǹee ki túǹ tɔrɔkub ní itaamu dátí.

¹²Isirayeel nimpoobi nìn dɔ́miń ki kpēē-u ní ki pàkā-u. Biba gba nìn gāā-u nlan. U nìn yōoǹ tifaal tin bóob́ abɔn abɔnee ki tīī binimpoobi bin nìn bí u-ceeyee.

¹³Judiiti nì binimpoobi bin nìn bí u-cee gbantee nìn dū ɔliifi faati ki lùn̄ mbeefuulimu ki cíkiǹ. Judiiti nìn līī samaa kɔkɔ nyɔkɔpu ní binimpoobi kɔkɔ gà ilan ní u kpòotī. Isirayeel ninjab kɔkɔ nìn ŋúb́ tijanjawan ki cíkí tifaal beefuulimmu ki pá ki gà ilan nì dipɔɔpindi.

¹⁴Niinee Judiiti tóoń nlan kí jāam̀ ti-Dindaan Isirayeel yab kɔkɔ kansikin ní samaa kɔkɔ kíí mpɔn.