Read Ntcham Judith 16 Bible Online

Judith 16 - Ntcham bible

Judith 16

¹Judiiti nìn bí yii: «Ní bɔ̀ɔ̀maan ŋgaŋgamu kí gāā nlan kí tīī m-Nimbɔtiu, cākafìmaan cancakantib kí gāā nlan kí tīī ti-Dindaan, ní náań-u inyɔŋki laŋŋu, yòom̄maan-u yilpu kí yíiń u-yindi.

²Di sá yii ti-Dindaan sá Unimbɔti un di yàntī tijáti gbèentée ní. Úǹ un ŋàtī u-naapaaŋi u-nibul kansikinee. U fīī-mi ki nyántì bin nìn jì-mee ŋaan.

³Asuur yab nyánní ŋgan pú jooŋŋi ki dɔ́miń, bi nìn dɔ́miń nì bi-janjaliibi cutimaanyi. Bi-wíiŋŋu nìn pìintí ibun nsan ní bi-taamui nì bi-tanjakaliibi nìn bìintí ŋgbantamu kɔkɔ pu.

⁴Bi nìn bíi sòoǹ yii bi làá tūū m-tiŋki ŋŋmi, kí dū kitàataajiki kí pɔ̀fì m-nipɔmbi, kí dū m-bipɔmmu kí lúkú kitiŋ, kí dū m-biyaamu kí kpántí iyumbu, ní kí tɔ̀kɔ̄ m-sapɔmbi bin kaa nyí uninjee.

⁵Ti-Dindaan Mpɔŋkɔdaan dūu dī unimpusaaleen pu ki pīiǹ-bi nsan.

⁶Binipɔmbi di kaa jáń ki pɔ́ɔkiǹ bi-kpiliu, kaa sá bininjab bin pɔ̄ɔ̄yee di fáá-u, kaa tí sá tijawɔkɔl mun di jáń nì u, ama Meerarii bisal Judiiti di dū u-nimbiin nyaaŋku ki líì-u.

⁷U nìn cúú dikpiipool bɔkutil ki pēetì kí ŋmā kí tīī Isirayeel yab bin wunti nìn yɔ̄tèe kunyannyaau. U nìn dū ŋkpam min sɔ́fèe ki ŋmītì u-nimbiin,

⁸ki dū kiŋaabiki ki cúú u-yikpiti ní ki dū dibɔkutil din bi dū gulfa un bí fálfalee ki lùn̄ee ki pēeǹ kí ŋmàtiǹ-u.

⁹U-naatakaŋ nìn dáaĺ u-nimbikpeeŋu ní u-nyaaŋku kɔ́ u-naŋki. Kitàataajiki nìn gūutì u-sil ki lēē diyil.

¹⁰Dipɔbil din u nìn cááyee nìn kɔ́ǹ Peersi yab tifaandi ní u-ninjati nìn kɔ́ǹ Meedeesi yab dinyoondi.

¹¹Niinee m-yab bin bi nìn kpēē ki sīŋkiǹee fáá ijanjakuŋkuunti ní bíǹ fāŋkì yɔ́kɔ́ yɔkɔ. M-nibul din nìn pɔ̄fiǹee nìn fáá ibiil ní bíǹ kɔ́ dinyoondin. Bi nìn kúuǹ mpɔn ní bíǹ kaa ti nyí tin poon bi bée.

¹²Bin sá kii inimpuyumbu jipɔmbee sāā ki pūtì-bi ní bin sá kii iyumbu in sáǹee biyaamu tīī-bi tiweendi. Man Dindaan jaaku kubɔn ní bi kpíì.

¹³M làá gāā nlampɔɔn kí tīī m-Nimbɔtiu[35], ti-Dindaan, a sá ukpaan ní ki cáá tinyool, a-pɔŋŋu sá maamaaci pɔŋŋu ní ubɔ kaa ŋūǹ kí já kí pɔ̄ɔkiǹ-si.

¹⁴A-wannaaŋkaati kɔkɔ ń jāam̀-si, di sá yii a sòon̄ ní tì dɔ́miń ki kíǹ ki bí, a túnní a-Fam ní ŋu náań-tì. Ubɔ kpá ki ŋūǹ kí jáǹ a-nyɔɔbundi.

¹⁵Ajoon làá cìŋkì kí tin bà ŋi-nyeeŋŋi ní kí cùú jēetí kí ŋmàlim̀ inyiŋfin. Ataŋkpee làá dùntī kii aŋɔee ní a-nimbiin. Ama a dàkà bin fàŋkí-see kulaŋŋaŋfitiiu ní.

¹⁶Di sá yii saraabi kɔkɔ kaa náaǹ kí nīn sɔ́fì ki fáatiǹ-si, ní bi-kpam kɔkɔ pátì bí dūú ŋá-si saraawɔkaa. Ama un di fàŋkí ti-Dindaanee sá ukpaan ní ki cá jaanjaan[36].

¹⁷Mbusu dɔ̄ ki cí atimbun ŋin yíkíi jáà nì m-nibulee. Ibɔsoon dalee, ti-Dindaan Mpɔŋkɔdaan làá dāá dáaĺ bi-tafal, kí dū bi-wunti kí tīī ŋŋmi nì akoosibil[37], ní bí nīn sūǹ ki yáliŋkí ki cá jaanjaan.»

¹⁸Ŋyunti ŋun bi bàn̄ Jeerusaleemee ní bi jáam̀ Unimbɔti. Samaa nín ŋá bi-ba circir ki dóòyee ní bi ŋá bisaraawɔkaabi nì nlammɔntiim saraabi nì saraabi biba mun.

¹⁹Judiiti nìn dū Ooloofeerni wanti tin samaa nìn dūu tīī-uee ki sú Unimbɔti. Sabɔrɔ un u nìn yōoǹ u-didooŋkaakunee, u nìn dūu sú ti-Dindaan an nīn sá dijandi din bi fōō kujaaun ki dū sú ti-Dindaanee[38].

²⁰Samaa nìn dū iŋmal ita ki fàal̄ Jeerusaleem circir laŋki nyɔkɔpu, ní Judiiti nìn gbíntì bi-cee.

²¹Iwiin gbanti boonee, báà ŋma nìn gítì u-dumpu. Judiiti nìn nín gítí Beetulii ki gbíntì niin ki kāl̀ u-kpaatantin. U nìn nyáń diyindi Isirayeel tiŋki kɔkɔ poon u-maŋfal wiiŋyi kɔkɔn.

²²Bininjab tikpil nìn là-u, ama báà uninja kaa béè-u u-maŋfal wiiŋyi kɔkɔ poon kí yòon̄ ŋwiin ŋun ní u-cal Manasee kpíì ki cūtìi ŋàl̄ u-naanjabee.

²³U nìn bíi púl̀ ki cá ní u-nyooti mɔ̀tīi wīintí. U-cal dicaŋkun ní u nìn kāl̀ ki púĺ ki dāa cáa sāā abin dilaataal nì abin aŋmoo. U nìn tīī u-yumbusapɔɔŋwu dibatɔl ní ki kpíì Beetulii tiŋkin. Bi nìn síb́-u u-cal Manasee kaakulin ní.

²⁴Isirayeel yab nìn dū iwiin iluli ní ki kāl̀ u-kpool. Kí wàatī ú kpúee, u nìn dū u-gaajawanti ki yākatì ki tīī u-cal Manasee nabiyaamu kɔkɔ nì úǹ u-ba dicaŋkun yab.

²⁵Báà ubɔ kaa nìn gíti mākaǹ kí fàaǹ Isirayeel yab ŋyunti ŋun Judiiti bí dimaŋfalinee nì ŋyunti ŋun u kpíì iwiin kupaau boonee.