Read Ntcham Judith 2 Bible Online

Judith 2 - Ntcham bible

Judith 2

¹Neebukadineesaar nín kāl̀ dibeel abin saalku nì ata poon, uŋmapeekaa iwiin mmuŋku nì ili poon ní bi kíĺ ki bíi sòoǹ ubɔti cindin yii ubɔti là kí tɔ̀ kitiŋ kɔkɔ pu nib ipɔntoon, kii u nín nìn lī puee.

²Ubɔti nìn yíiń u-janjakpilib nì u-kpambaliŋ ki kpáfì ní an nyáń úǹ u-ba nyɔkɔn u nín lēē tin dibalin kí dáaĺ kitiŋ pu nib tafalee.

³Bi nìn kíí ki kútì u-pu. An nìn sá yii bí kúntí bin kaa nìn tɔ́ u-marauee.

⁴Ŋyunti ŋun bi kpáfì míǹ ki dóòyee ní Asuur bɔtiu Neebukadineesaar yíiń u-janjakpiliu Ooloofeerni un nìn gíti sá un pá u-puee ki bí-u yii:

⁵«Man Ubɔtikpaan[2], kitiŋ kɔkɔ pu kpiliu nín sòon̄ puee sɔ̀. Nyā kí kóoǹ binib bin máká bi-pɔŋŋu puee kí kpāfì. Á yòon̄ bijanjaliibi bin còom̄ ataa puee binib kutukub dilaataal nì mmuŋku nyɔkɔm nì bitanjakaliibi binib kutukub saalaa nì bili nì itaamu kupaau.

⁶Á cùú jáǹ ntimu mun bí ŋwìiń jeetilaŋki púee yab, kun puee baa tɔ́ tibɔti tin m sòon̄ee.

⁷Á tùkù-bi bí bɔ́ntí kitiŋ nì nnyim, kun puee m làá nyā kí jáǹ-bi m-ŋuukpaandi poon. M làá yàntī m-janjakitil kɔkɔ ń kpátíi gbí bi-timmu kɔkɔ pu ní kí dū-mu kí líiǹ-bi bí fūkul̀.

⁸Binib bin làá dāá fōō tiweendee làá dāá gbí mbùmbiyaamu, ní ibun nì amɔɔ ń dāá gbí kí páań nì bi-nikpiliŋ.

⁹M làá dāá dū bin m cúúyee kí tɔ̄ kitiŋ kúntilaŋki kuyuŋu.

¹⁰Siiyee, nín̄ cá kí já kí fōō ntimu gbanti kí tīī-mi. Bi làá gbèen̄ kujaau kí kɔ́ a-ŋaan, ama á dū-bi kí kpāafì kí síiń ŋwiin ŋun m làá dáaĺ bi-tafalee.

¹¹Ama bin kaa làá sìntī bi-ba taapu kí tīī-see, á taa sɔ̄ bi-saai. Á pɔ̀fì-bi ní kí fūkul̀ bi-wanti kitiŋ kɔkɔ pu.

¹²Di sá yii m pūtì mama m-ba maŋfal nì m-beel pɔŋŋu yii tin m sòon̄ee, m cáá mpɔn kí ŋá míǹ.

¹³Siiyee, á taa yìntīǹ a-dindaan nyɔɔbuŋŋi báà dibaba. Ama á ŋá kii m nín kpáafì-si yii á ŋá puee, kí taa tàan̄ kí ŋá míǹ.»

¹⁴Ooloofeerni nyáń u-kpiliu nimbiin ní ki yíiń abɔtibil nì Asuur janjakpilib nì bijanjakpilib bin mun gíti pée.

¹⁵Kii u-kpiliu nín kpáafì-u puee, míǹ ní u kóoǹ binib bin bɔ́ntì ki ŋūǹ ki jáà tiŋanee kutukub dilaataal nì mmuŋku nyɔkɔm nì bitanjakaliibi kutukub saalaa nì bili bi-kɔkɔ ŋúb́ itɔfi.

¹⁶U nìn kpáfì-bi akiti akiti kii bi nín ŋáań kujakpaaŋŋun puee ní.

¹⁷Bi nìn yōoǹ igutaamu nì mmamu nì imamboon in tú bi-wantee tikpil tikpil. Bi nìn yōoǹ ipii nì inaa nì iŋoobu in bi làá nīn cáa ŋáań-bi tijinee an kaa cáá ŋkaan.

¹⁸Bi nìn bɔ́ntì tijin tikpil ki tīī unil kamaa, ní sindaariya nì animbil ŋin nìn nyáń ubɔti dicaŋkunee mun nìn náaǹ.

¹⁹Ooloofeerni nì u-janjakitil nìn kíĺ nsan ki līntì ubɔti Neebukadineesaar nyɔkɔpu, ki dū bi-janjatɔrɔkub nì bi-tanjakaliibi nì bi-janjaliibi bin còom̄ ataa puee bimɔntiibi ki kpátìi gbí ntimu mun bí ŋwìiń jeetilaŋki púee.

²⁰Binib tikpil nìn táá-bi ki cūtì. Binibee nìn wīikí kii inaakitoon àá kitiŋ pu bulee, di sá yii baa nìn ŋūǹ kí kàaǹ-bi[3].

²¹Bi nìn yíkì Niiniifi tiŋki ní ki cōom̀ iwiin ita ki túĺ Beekitiileeti tantakal. Bi yíkì Beekitiileetee ní ki cūtìi kāl̀ dijool din bí Siliisii ŋgan púee taapu.

²²U nìn yōoǹ u-janjakitil kɔkɔ, u-janjaliibi bin còom̄ ataa puee nì bitanjakaliibi nì u-janjatɔrɔkub ki yíkì niin kí nín cá ajoon pu tiŋki pú.

²³U nìn nāaǹ Puudi nì Luudi[4] timmu ní ki fúkúl̀ Rasiisi nì Isimaayeel yab bin kóò kuteeu nyɔkɔpu Keeleewɔn ŋgiil púee kɔkɔ.

²⁴U nìn jítì Eefiraati mɔɔl ki pūntì Meesoopootamii tiŋki ní ki kpéelikì ntimu mun bi máń agun ki tú mu bí Abroona buŋŋu caŋin kí cáá sāā dimɔɔlee.

²⁵U nìn jáń ki fōō Siliisii timmu ki kūū bin nìn yíkì kaa kíí bi-ba puee. Niinee ní u nín cá ki cūtìi nyáń Jafeeti timmu mun bí ŋgiil pú Arabii nyɔkɔpuee pu.

²⁶U nìn māntìi tú Madiyan yab[5], ki gāā ŋŋmi ki tūū bi-tantib ní ki kóoǹ bi-waŋkuti.

²⁷U nìn sīntì Damaasi tantakalin ŋyunti ŋun bi cēē bileeyee ní ki gāā ŋŋmi ki tūū bi-kpaaŋŋi. Bi nìn kūū bi-piii nì bi-naai, ki fúkúl̀ bi-timmu, ki nāaǹ bi-timbilimmu ní ki dū ntàataajimu ki kūū binipɔmbi kɔkɔ.

²⁸Kufaaŋŋu nìn kɔ́ bin kɔkɔ nìn pée kóò Meediiteeranee tiŋkugbandee. Bíǹ di sá bin kóò Siidɔn nì Tiir nì Suur nì Ookina nì Jaminiya timmunee. Dinyoondi nìn kɔ́ bin kóò Asootoosi nì Asikeelɔn timmunee.