Read Ntcham Judith 3 Bible Online

Judith 3 - Ntcham bible

Judith 3

¹Bi nìn tú ituun Ooloofeerni cee bí sòoǹ nì u ŋgbansɔŋfi poon yii:

²«Timbi ubɔtikpaan Neebukadineesaar tɔntɔnliibi sèé a-nimbiin. Á dū-ti kí ŋá a nín là puee.

³Kpèè ti-naakpaapɔɔku nì ti-tiŋki kɔkɔ nì bilee kpaaŋŋi nì ti-picaŋkpunti nì ti-ŋɔcaŋkpunti nì ti-nacaŋkpunti nì ti-sati di dɔ̄ a-nimbiinee. Á dū tíǹ gbanti kɔkɔ kí ŋá a nín là puee.

⁴Ti-tiŋkpaammu nì bin kóò mu-poonee sá a-yumbui ní. Dāan̄ kí kɔ́ mu-poon kii a nín là puee.»

⁵Ituunee nìn dūu bāań Ooloofeerni cee ní ki dū tibɔtee ki bíl̀ u-nimbiin.

⁶Ooloofeerni nì u-janjakitil nìn sīntì ditiŋkugbandi. U nìn nyàab̄ binib ki cíitì ntimu mun bi máń agun ki māntìi túee ní ki nìn lēē mu-poon bininjab bin pɔ̄ɔ̄yee bí tūtuǹ u-janjaliibi.

⁷Ntimu gbantin nì ntimu mun nìn māntìi tú-muee, bi nìn fōō-u tiŋan nì mbeefuulimu ní ki nìn bɔ̀ɔ́ ŋgaŋgamu ki ŋōō[6] u-nimbiin.

⁸U nìn nāaǹ bi-timmu, ki gāatì bi-waasufii, di sá yii u nìn fōō mara yii ú kúntí kitiŋ pu waaŋi kɔkɔ án nín làá ŋá pu atimbun kɔkɔ nib ń nīn jáaḿ Neebukadineesaar baba nì u-baba, ní isoon kɔkɔ nib nì inibool kɔkɔ ń nīn jáaḿ-u kii bi nín jáaḿ diwaal puee[7].

⁹Míǹ boonee u dūu bàn̄ Eesdreelɔn[8] tantakal nyɔkɔpu, an kaa dátiǹ Dootayiim tiŋki kin bí Juudee joofɔkɔŋi nyɔkɔpuee.

¹⁰Bi nìn ŋātì dinaapaal Geebayii nì Siitoopooliisi kansikin. Bi nìn gbíntì niin ki kāl̀ uŋmal ubɔ kí ŋmā kóoǹ u-janjakitil wanti kí kpāfì.