Read Ntcham Judith 4 Bible Online

Judith 4 - Ntcham bible

Judith 4

¹Isirayeel yab bin kóò Juudee tiŋkinee nìn gbìl̄ tin kɔkɔ Asuur yab bɔtiu Neebukadineesaar janjakpiliu Ooloofeerni ŋá atimbun ŋin kíǹee nì u nín fúkúl̀ bi-waadiiŋŋi ki kpéelikì-ŋi puee.

²Bi nìn fāŋkì-u tikpil tikpil, ní bi kíǹ ki bíi yáliŋkí Jeerusaleem nì bi-Nimbɔtiu Diiku pu.

³Di sá yii bi nín nyánní kuyuŋun ki fātìi gítìń[9] nee, an kaa yúntì, ní bi dáá pée kóoǹ Juuda yab ki kpáfì dee. Bi nín nìn kɔ́ǹ kunimbɔtidii nì ku-sambiliŋ nì ku-saraafaŋŋu tijɔkɔndee, bi dáá fātìi dū tíǹ gbanti kɔkɔ ki sú ti-Dindaan dee.

⁴Niinee ní bi lēē ituun ki tú Samaarii nì Koona nì Beeti-Oorɔn nì Abeel-Mayiim nì Jeeriikoo nì Kooba nì Ayiisɔɔr nì Saleem timpiliŋki pu timmu kɔkɔ.

⁵Bi nìn gbáb́ ki bīiǹ ajoofɔkɔ yilpu, ki máń agun ki māntìi tú ntimbilimu mun nìn bí niinee, ní ki nyàab̄ tijin ki kpáafì kujaau pu, di sá yii bi nìn cáń bi-kpaajinti an kaa yúntì.

⁶Ŋyunti gbantee, Yooyakiim di nìn sá usaraaŋakpil Jeerusaleem. U nìn ŋmàn̄ kugbɔŋu ki tīī bin kóò Beetulii nì Beetoomeestayiim timmunee. Ntimu gbanti nìn bí Eesdreelɔn nyɔkɔpu ki bíitiǹ kitimpiliŋ kin pìlīǹ Dootayiim tiŋkee ní.

⁷U nìn bí-bi yii bí fōō dijool pu saŋyi in bi dì ki cá Juudee tiŋkinee. Isan gbanti kaa nìn wāā, an puee an nìn sá sɔkɔmii bí ŋmā kí cúú binib bin táá bili bili ki là kí jītí niinee.

⁸Isirayeel yab nìn ŋá kii usaraaŋakpil Yooyakiim nì Isirayeel yab tindaŋkpilib bin bí Jeerusaleemee kɔkɔ nín tīī-bi mara yii bí ŋá puee.

⁹Isirayeel yab kɔkɔ nìn kúuǹ ki yíiń ti-Dindaan nì bi-pɔŋŋu kɔkɔ ní ki nìn bóob́ kinyɔkɔ nì bi-pɔŋŋu kɔkɔ.

¹⁰Bininjab nì bi-nimpoobi nì bi-biyaamu nì bi-waŋkuti nì binicambi bin nìn kóò bi-puee kɔkɔ nì bi-paadambi nì bi-yumbui, bi-kɔkɔ nìn dū kutukub ní ki pēeǹ kí dàkà bi-nimbaaku[10].

¹¹Isirayeel ninjab nì binimpoobi nì mbiyaamu nì bin nìn kóò Jeerusaleemee kɔkɔ nìn gbāaǹ bi-tabiŋyiliŋ pu kunimbɔtidii nyɔkɔpu, ki dū ŋfantam[11] ki pùkū bi-yil ní ki kpátì kutukub bin bi nìn pēēyee ki bíl̀ ti-Dindaan nimbiin.

¹²Bi nìn dū kutuku ki fìn̄ nsaraafan ki māntìi tú ní dicilpuee ki kúuǹ ki yíiń ti-Dindaan mpɔn yii ú taa yàntī binannanliibi ń cúú bi-naantiibi nì bi-nimpoobi kí nàan̄ kitiŋ kin ní u dūu tīī-bi difakalee. Bi nìn gíti gbāam̀-u yii ú taa yàntī bin kaa sá Juuda yabee ń kɔ́ǹ circir paaŋŋu tijɔkɔndi kí nīn cáa bèel̄.

¹³Ti-Dindaan nìn pílifì bi-wimmeem ní ki ká bi-nimbaaku. Samaa nìn nìkī dinyɔɔboobil iwiin kupaau Juudee tiŋki kɔkɔn nì Jeerusaleem, ti-Dindaan Mpɔŋkɔdaan circir paaŋŋu nyɔkɔpu.

¹⁴Usaraaŋakpil Yooyakiim nì ti-Dindaan saraaŋaliibi kɔkɔ nì bin kɔkɔ bí ti-Dindaan tundinee nìn dū kutukub ki pēeǹ kí dàkà bi-nimbaaku. Bi nìn ŋá bisaraawɔkaabi bin bi ŋáań baabadalee[12] nì ipoon saraabi nì samaa nín cáań nlammɔntiim saraabi biŋyee.

¹⁵Bi nìn dū ŋfantam ki pùkū ŋŋaabu ŋun fìn̄ bi-yilee ní ki nìn kūuntí ki yíì ti-Dindaan nì bi-pɔŋŋu kɔkɔ yii ú sɔ̄ Isirayeel yab saai kí ŋá-bi tiŋan[13].