Read Ntcham Judith 5 Bible Online

Judith 5 - Ntcham bible

Judith 5

¹Bi nìn dɔ́miń ki tùkū Asuur yab janjakpiliu Ooloofeerni yii Isirayeel yab bíi bɔ́ntí kí já kujaau, ní ki nìn dū ajoon pu saŋyi ki pīiǹ, ki nìn máń agun ki māntìi tú ajoofɔkɔ yilpu ní ki nìn píĺ píĺ titalindi kitiŋ kin tèen̄ee pu.

²Niinee ní u fōō mbum ŋkpitim pu ní ki yíiń Moowaab yab kpilib nì Amɔn yab janjakpilib nì Meediiteeranee tiŋkugbandi timmu yab gɔminab.

³U nìn bí-bi yii: «Kanaan yab, tùkùmaan-mi, dinibul dilal di kóò ajoon tiŋki pu gbanti ní? Ntiŋkpaamu mulɔmu ní bi kóò ní? Bi-janjakitil wíiŋŋu sá mana? Bi-pɔŋŋu nì bi-kpabil nyánní la ní? Ŋma di sá bi-bɔtiu un di kpòotī bi-janjakitilee ní?

⁴Ba pu ní bi yíì kaa dɔ́miń kí tūŋkiǹ-mi kii anibul ŋin kɔkɔ bí ŋwìiń jeetilaŋki púee nín ŋá puee ní?»

⁵Amɔn yab kɔkɔ bɔtikpaaŋwu Akiyɔɔr kíí-u yii: «M-dindaan, pīlifì tin làá nyā man a-tɔntɔnliu nyɔkɔnee. M làá sòoǹ nì si nì ibaamɔn tin m nyí dinibul din kóò ajoon pu tiŋkin ki pìlīǹ-si nee bɔti. Nnyimɔn kaa làá nyā man a-tɔntɔnliu nyɔkɔn.

⁶Dinibul gbantee sá Caldee yab naantiibi biba ní.

⁷Bi nìn péé péé ki kāl̀ Meesoopootamii ní, kun puee baa nìn là kí nīn jáaḿ bi-baabi waaŋi ŋin nìn bí Caldee tiŋkinee.

⁸Bi nìn dū bi-naanjab saŋŋu ki fá ní ki jáaḿ yilpu Nimbɔtiu, Unimbɔti un ní bi nìn béèyee. Bi nìn jìn̄-bi ki wāatì bi-waaŋi ní bi nìn sáǹ ki kɔ́ Meesoopootamii ní ki kāl̀ niin an yúntì.

⁹Bi-Nimbɔtiu nìn tùkū-bi yii bí nyā laakin bi kóò gbantee kí fàtīí gítí Kanaan tiŋkin. Bi bàn̄ niinee ní ki kāl̀ ní ki ká sindaariya nì animbil nì tiwaŋkuti tikpil[14].

¹⁰Bi nìn sīntì Eejipiti tiŋkin, di sá yii ŋkùm miba nìn nyáń Kanaan tiŋki kɔkɔ pu[15]. Bi bàn̄ niinee ki gbíntì ki kāl̀ ní ki ŋmátì. Bi bí niin mimmee ní ki dūu būtì ki ŋá dinibul din nib baa ŋūǹ kí kàaǹee.

¹¹Ama Eejipiti bɔtiu nìn yíkì ki bíi jáà nì bi. U nìn ŋá nciin kí ŋmā kí wɔ́b́-bi nì brikisib mātam. U nìn sīntì-bi taapu ní ki dū-bi ki kpántì iyumbu[16].

¹²Bi nìn kúuǹ ki yíiń bi-Nimbɔtiu, ní úǹ dū iween in kaa cáá nnyɔkɔee[17] ki tɔ́ bi-pu. An puee Eejipiti yab dāa jìn̄-bi ní ki wāatì bi-ba.

¹³Unimbɔti nìn yāntì Tikati mɔɔl fóotì bi-nimbiin[18]

¹⁴ní u kpōotì-bi ki dī Siinaayi jool nì Kadeesi Barneeya tiŋki saŋŋu pu. Bi nìn jìn̄ bin kɔkɔ nìn kóò kuteeunee,

¹⁵ní ki dɔ́miń ki kāl̀ Amɔɔr yab tiŋki pu. Bi nìn kūū ki céetì Eesbɔn yab[19]. Bi nín dūtì Jɔɔdan buŋŋuee ní bi fōō ajoon pu tiŋki kɔkɔ.

¹⁶Bi nìn jìn̄ Kanaan yab nì Peeriisi yab nì Jeebusi yab nì Siikeem yab nì Giirgaasi yab kɔkɔ ki fōō bi-tiŋki. Bi kɔ́ niin an yúntì.

¹⁷Bi yaa kaa nìn yīntiǹ bi-Nimbɔtiuee, bi pée bí dipɔɔpindin ní, di sá yii Unimbɔti un bí bi-ceeyee ná ikpiti ní[20].

¹⁸Ama bi yaa nìn kākatì bi-ba ki wāatì nsan ŋun u nìn cátì ki bíl̀-bee, bi nìn kù-bi tikpil tijáti kupaau poon ní kí cúú-bi kí cùnnì kuyuŋu kitincaŋin. Bi-nannanliibi nìn gbáń ki wīī bi-Nimbɔtiu diiku, ní ki fōō bi-tiŋkpaammu ki kíǹ ki kóò.

¹⁹Too kɔŋkɔnnee, bi nín fātìi gítìń bi-Nimbɔtiu ceeyee, ní bi yíkìń ntimu mun poon bi nìn yàl̄ ki kɔ́ee ki gítì bi-dumpu. Bi fātìi fōō Jeerusaleem, laakin bi-Nimbɔtiu diiku bée ní ki kɔ́ ajoon pu tiŋki, di sá yii báà ubɔ kaa nìn bí ŋi-pu.

²⁰Kɔŋkɔnnee, m-kpiliu nì m-dindaan, binib nee yaa yīntiǹ bi-Nimbɔtiu ní ti yaa lafun dáań ki ká yii bi ŋá ikpitee, ti ŋūǹ kí cùú jáǹ-bi.

²¹Ama bi yaa kaa yīntiǹ bi-Nimbɔtiu, m gbàam̄ sii m-kpiliu yii á taa gbēē-bi. An yaa kaa sá míǹ, bi-Dindaan nì bi-Nimbɔtiu làá wúń bi-pu, ní kí kɔ́ǹ-ti icoo kitiŋ kɔkɔ nib nimbiin.»

²²Ŋyunti ŋun Akiyɔɔr sòon̄ ki dóòyee ní samaa un māntìi tú ujanjakpil tantiuee kíĺ ki bíi gbùkum̄. Ooloofeerni janjakpilib nì bin kɔkɔ kóò Meediiteeranee tiŋkugbandee nì Moowaab yab bí yii bí kpɔ̀ Akiyɔɔr.

²³Bi bí yii: «Taa fàŋkí Isirayeel yab. Di sá yii dinibul gbanti kaa cáá mpɔn kaa cáá dikpabil kí já kujaau kun pɔ̄ɔ̄yee.

²⁴Ukpil Ooloofeerni, ti làá cùú jáǹ-bi, ní a-janjakitiŋ làá já kí pɔ̄ɔkiǹ-bi ní sɔ́kɔ sɔkɔ.»