Read Ntcham Judith 6 Bible Online

Judith 6 - Ntcham bible

Judith 6

¹Binib bin nìn bí ki māntìi tú bin bíi ŋáań dikpafilee nín gbūkum̀ ki dāa ŋmíl̀ee ní Asuur yab janjakpiliu bí Akiyɔɔr binicambee kɔkɔ nì Moowaab yab kɔkɔ nimbiin yii:

²«Sii Akiyɔɔr, ŋma ní a sá? Ní nimbi bin dū ni-ba ki nyáfiǹ Isirayeel yabee, ni sá bilab ní ki sòon̄ nì ti díǹ kii Unimbɔti bɔnaatiliuee ki bí-ti yii tí taa cùú jáǹ Isirayeel yab, kun puee bi-Nimbɔtiu làá wúń bi-pu? Ŋma di gíti sá unimbɔti, an yaa kaa sá Neebukadineesaar? Úǹ di làá tɔ̄ u-janjaliibi bin cáá mpɔnee ní bí cùú kúntí-bi kitiŋ pu, ní bi-Nimbɔtiuee kaa làá kpáàa ŋmā kí fīī-bi.

³Ama timbi a-tɔntɔnliibi, ti làá já kí pɔ̄ɔkiǹ-bi kii bi sá unibambaantee ní, baa làá ŋmā kí yūĺ ti-taamui pɔŋŋu nimbiin.

⁴Di sá yii ti làá kóoǹ-bi kí kpāfì ní kí wà-bi ŋŋmi. Bi-jooŋŋi làá nyɔ̀ bi-fatikuu ní kí gbí, ní bi-nikpiliŋ ń kpátí kí gbí bi-tantakaŋin. Baa làá pée ŋmā kí yūĺ ti-nimbiin ní, ama bi làá kpú ní kɔkɔ múb. Ubɔti Neebukadineesaar, kitiŋ kɔkɔ pu dindaan nín sòon̄ míǹ. U sòon̄ ní tin u yaa sòon̄ee kaa gbíntí fám.

⁵Sii Akiyɔɔr, uamɔnja un binannanliibi dée, díǹ nee a sòon̄ kii unil un nyēē binib boonee nín sòoǹ puee ní. Too aa làá ti wāl̀ m-nimbiin kí yòon̄ díǹ kí cáá sāā ŋyunti ŋun m yaa láa tɔ̀n̄ dinibul din sáǹ Eejipiti tiŋkinee ipɔntoon ki dóòyee.

⁶M yaa láa fātìi gítìńee, m-janjaliibi nì m-janjakpilib làá dāá dū ntàataajimu nì ŋkpamu ní kí sàatì a-takakalii, ní á dāá lítí bin fōō tiweendee kansikin.

⁷M-tɔntɔnliibi làá dāá cùnnì-si ajoon tiŋkin ní bí dāá dū-si kí bíĺ ntiŋkpaamu mun bí ajoon tikiŋŋi puee kiban.

⁸Niin ní a làá nīn bí kaa làá kpú kí nīn cí si nì bi ń dāá kpú dicilpu.

⁹Kii a nín máká a-pɔbilin yii baa làá cúú-bi kuyuŋuee, taa kɔ́ kunimbaaun. M sòon̄ ní tin m sòon̄ee, tiba kaa làá gbíntí fám kaa ŋá míǹ.»

¹⁰Niinee Ooloofeerni tīī u-tɔntɔnliibi bin nìn yú u-tantiunee mara yii bí cúú Akiyɔɔr kí cáá-u kí cùnnì Beetulii kí dū-u kí ŋá Isirayeel yab ŋaan.

¹¹U-tɔntɔnliibee nìn cúú-u ki cáá-u ki nyántì dinaapaal kpaanceetiŋu ditantakal watil pú. Bi yíkì niinee ní ki dūu túĺ ajoon watil ní ki cūtìi nyáń anyimbulnimbil ŋin bí Beetulii taapu púee.

¹²Binib bin nìn kóò kitiŋ kin bí dijool yilpu kúntí kuntee nín wál̀-bee ní bi yōoǹ bi-janjawanti ní ki nyáń kitiŋee poon. Bininjab kɔkɔ nìn ŋúb́ tijaataafun ki tòó-bi ataŋkpee kaa púb́-bi nsan bí ŋmā kí dàb̄.

¹³Bi nìn fātìi gítì bi-boon dijool taapu ní ki bóob́ Akiyɔɔr ki yāntì-u dijool taapu kitiŋ niin, ní ki nín gítí bi-dindaan cee.

¹⁴Ama Isirayeel yab nìn nyáń bi-tiŋkin ki kpákatì ki bāań Akiyɔɔr cee. Bi nìn bútì-u ki cáá-u ki cūnnì Beetulii ní ki dū-u ki dàkā bi-tiŋki bɔtiibi.

¹⁵Bíǹ di sá Miika jipɔɔn Oosiyasi un sá Simeeyɔn naakookunee nì Ootiniyeel jipɔɔn Kabrii nì Meelkiyeel jipɔɔn Kaarmiisi.

¹⁶Bi nìn yíiń kitiŋ kpilib kɔkɔ. Binipɔmbi nì binimpoobi nìn sáń ní ki dòoń dikpafil. Bi nìn dū Akiyɔɔr ki síiǹ samaa kɔkɔ kansikin ní Oosiyasi bālifì-u tin di jítèe.

¹⁷Akiyɔɔr nìn kíí-bi ki máafì-bi tin bi sòon̄ Ooloofeerni nín yíiń dikpafil diŋyee poonee, nì tin úǹ u-ba sòon̄ Asuur yab kpilib ceeyee nì tilambibɔti tin Ooloofeerni sòon̄ Isirayeel yab puee.

¹⁸Niinee samaa kɔkɔ tātìi gbāaǹ Unimbɔti nimbiin, bi-yigbeeŋi cìb̄ kitiŋ ní bi kúuǹ mpɔn ki lī yii:

¹⁹«Ti-Dindaan, yilpu Nimbɔtiu, kpèè ti-nannanliibi nín cáá dilambil puee[21]. Sɔ̄ a-nibul din bi kpēē ki sīŋkiǹ nee saai. Fàtī a-nimbiin kí túĺ bin sá a-yab nee díǹ wiiŋŋu.»

²⁰Bi nìn ŋméeǹ Akiyɔɔr ní ki pàkā-u tikpil.

²¹Oosiyasi nìn yōoǹ-u samaa kansikin ki cáá-u ki cūnnì u-dumpu ní ki nìn ŋá tican ki yíiń bikpilib bí jī. Bi nìn kúuǹ ki yíiń Isirayeel Nimbɔtiu kunyeeu gbanti kɔkɔ yii ú jòoń-bi.