Read Ntcham Judith 9 Bible Online

Judith 9 - Ntcham bible

Judith 9

¹Judiiti nìn tātìi dōoǹ dicincibil ki dū ŋfantam ki pùkū u-yil ní ki lēē kutuku un u nìn dūu lōoǹee. An nìn sá kujoou ŋyunti ŋun ní Jeerusaleem tiŋkin bi tùutī talaalu kunimbɔtidiinee ní. U nìn kúuǹ ki yíiń ti-Dindaan mpɔn ki lī yii:

²«Ti-Dindaan, m-naanja Simeeyɔn Nimbɔtiu, sii un di nìn tīī-u kitàataajiki ú dūú kpɔ̀ binicambi kí tɔ̀ bi nín nìn gbēē usapɔɔn un kaa nyí uninja ki kɔ́ǹ-u tijɔkɔndee pɔntooŋyee. Bi nìn bīitì u-tapandi pu ki kɔ́ǹ-u icoo ní ki gbēē u-biil ki yāntì u fá u-jilmau! A nìn lī yii: <An kaa ŋáań míǹ>, ama ní bi ŋá míǹ.

³An pu ní a nìn dū bi-kpilib ki líiǹ ŋkúm. Bi nìn mɔ́ntì-bi ki téeǹ, di sá yii ndoo ŋun pu bi nìn yāntì usapɔɔnee fá u-jilmauee pu ní bi nìn kūū-bi bi-fatikuu yāaǹ. A nìn fáá iyumbu ki kpáaǹ bi-kpilib ní ki fáá bibɔtiibi bi-beejaliŋ pu.

⁴A nìn yāntì bi cúú bi-nimpoobi ki kpáà búntì, ní bi-bisalib kpántì iyumbu. Tiwan tin bi nìn cááyee, a-bineeŋkaamu di nìn dūu yākatì. Bi nìn cáá difaŋgiil kí nīn tɔ́-si. Bi nìn gíí diŋuul tijɔkɔndi tin bi nìn kɔ́ǹ bi-dicaŋkuee pu[27]. Áù Unimbɔti, m-Nimbɔtiu, fōō man un sá ukpiipu nee wimmeem.

⁵Di sá yii tin jítì dooooyee, tin bíi jītí díǹ nì tin làá fu jītí foolee, sii di ŋá tíǹ gbanti kɔkɔ. Si di lèekī tin bíi jītí díǹee nì tin làá fu jītí foolee, ní ki ŋá tin pée kā a-landɔkɔŋun yii a làá ŋée.

⁶Tin a bɔ́ntì ki làá ŋée dòoń ní ki lì yii: <Ti sèé.> Di sá yii a bɔ́ntí a-tuuŋŋi kɔkɔ ní a nyí ibɔsoon in a làá sòoǹee kí wàatī ní kí nín sòoǹ.

⁷Kpèè Asuur yab dɔ́miń nì mpɔn, ní bi bí ki yòontí bi-ba bi-taamui nì bi-tanjakaliibi pu. Bi cáá dilambil bi-janjaliibi bin còom̄ ataayee pu. Bi máká bi-gbampɔɔŋi nì bi-kpammu nì bi-tɔfii nì bi-jaantafunti pu. Baa béè yii sii ti-Dindaan di ŋūǹ kí yàntī tijáti ń gbèen̄[28].

⁸«A-yindi di sá ti-Dindaan. Dū a-kpabil kí gbá kí wìil̀ bi-pɔmbɔti ní kí dū a-ŋuul kí nàan̄ bi-pɔŋŋu. Di sá yii bi lēē yii bi làá kɔ́ǹ a-circir paaŋyi tijɔkɔndi, tanti un poon ní a-nyooti bée, ní kí dū bi-janjawanti kí fáá kí kéetí a-saraafaŋŋu yiŋyi.

⁹Kpèè bi nín yòontí bi-ba yilpu puee kí dū a-ŋuul kí sìtī bi-yiliŋ pu. Tīī man ukpiipu ŋaliŋu mpɔn ḿ ŋmā kí ŋá tin m bɔ́ntì kí ŋée.

¹⁰Yàntī m-nyimɔmbɔti ń fáá uyumbu un yú ki kɔ́ĺ ukpilee nì ukpil un yú ki kɔ́ĺ utɔntɔnlee. Dū unimpu ŋal kí nà bi-lambil.

¹¹Di sá yii kaa sá nniwíin di dàkà a-pɔŋŋu, àá bipɔndambi di dàkà a-kpabil. A sá bin sīntì bi-ba taapuee Nimbɔtiu ní, ní ki sá ŋwaamu jòońliu, ní ki sá biwɔfib mɔtiliu, ní ki sá bin bi dūu fée wunliu ní ki sá bin kaa ti cáá dimákalee fiiliu.

¹²Tiŋman, tiŋman, m-baa Nimbɔtiu, Isirayeel gaajawanti Nimbɔtiu, yilpu nì taapu kpootiliu, inyiŋfi náanliu, tiwannáaŋkaal kɔkɔ bɔtiu, fōō m-wimmeem.

¹³Yàntī m-nyimɔmbɔti ń kpɔ̀ kí tīī bin bin bɔ́ntì ŋkpitim pu kí jáǹ a-poondi nì a-circir diiku nì Siiyɔn jool nì a-biyaamu tiŋki kin bi yèe tiweendi.

¹⁴Dàkà atimbun kɔkɔ nì tinaakɔti kɔkɔ yii sii di sá Unimbɔti Mpɔŋkɔdaan ní ki cáá dikpabil, ní ubɔ kaa ti bí laaba ki wúń Isirayeel nibul pu.»