Read Ntcham Esther (hébreu) 1 Bible Online

Esther (hébreu) 1 - Ntcham bible

Esther (hébreu) 1

¹Ŋyunti ŋun Asuweerusi nìn sá ubɔtee ní tibɔti nee jítì. Asuweerusi gbanti nìn jíń dibeel ntimu dilaataal nì mmuŋku nì mululi pu ní, kí yòon̄ Indiya tiŋki kí tin cáá sāā Kusa tiŋki.

²Ŋyunti gbanti ní ubɔti Asuweerusi kāl̀ u-beejal pu Suusi ditiŋyil.

³U-beel bintataatiil poonee ní u ŋá tican ki yíiń u-kàliŋkpilib nì u-tɔntɔnliibi nì Peeriisi nì Meedi yab janjakpilib nì ntimu yidambi nì mu-kàliŋkpilib.

⁴Ní u nyántì u-gaajawanti nì tiwannyaandi tin dàkà u-beel nyootee ki dàkā-bi ŋwiin ŋubɔ ŋubɔ dilaataal nì imuŋku inaa.

⁵Iwiin gbanti boonee ní ubɔti ŋá binib bin kɔkɔ bí Suusi ditiŋyilinee tican ubɔti mɔŋkiŋu, kí yòon̄ binikpaambi kí tin cáá sāā ŋwaamu bi jíń áli iwiin iluli.

⁶Bi nìn dū gulfa ki lùn̄ bisatapimbi nì bimambi gàaa, ní ki dū gulfaman ki lùn̄ iŋmii ki dūu bɔ́ tikúti bɔmbiyaamun, ki dū satabee ki sākaǹ jaantalkub bin bi dū kaaluubi ki nákáǹee pu. Ní ki dū kaaluubi nì tin jìl̀ee nì bikaaluubɔmbi ki ŋàl̄ kitiŋ, ní ki dū sindaariya lambammu nì tikúti lambammu ki yóoǹ an pu.

⁷Sindaariya kɔŋkɔnnyɔkaabi poon ní bi nìn tìì binib ndaam, ní kɔŋkɔnnyɔkaabee nìn bí tɔbin. Mbɔtidaamee nìn pùub̀ ní. Nì tiniti ní bi nìn bàtī ndaamee ki tìì binib.

⁸Ubɔti nìn pú nsan yii báà ŋma ń nyɔ̀ ndaam u nín là puee, di sá yii u nìn síiǹ u-tɔntɔnliibi mara yii bí ŋá min un sá kamaa lèe kí tīī udaan.

⁹Unimpubɔti Fastii mun nìn bɔ́ntì tican dibɔticindi poon ki yíiń binimpoobi.

¹⁰Bi bí jiŋaal poon míǹ iwiin iluli dalee, ndaam nyāatì ubɔti. Niinee ní u yíiń Meewuman nì Biisita nì Arboona nì Biigita nì Abagita nì Seetaar nì Karkasi, u-tɔntɔnliibi biluli bin sá bifaabi ki bí u-cindinee.

¹¹Ní u bí-bi yii bí cùú yíiń unimpubɔti Fastii ú dāan̄ kí nīn cíkiń u-beefuuliiki. U nìn là kí dū u-nyaaŋku kí dàkà abɔtibil nì bikàliŋkpilib bin u nìn yíiń ticanee, di sá unimpubɔtee nìn ŋān̄ kunyaaŋŋu tikpil.

¹²Bifaabi cūtìi tùkū unimpubɔti Fastii ubɔti nín lī puee, ama ní u yíì kaa cūtì. Niinee ubɔti fōō diŋuul ŋkpitim pu.

¹³Ní u bālifì u-kpootiliibi tibɔti gbanti pu, kun puee tin yaa nìn pée sá dibeel pu bɔtee, biciŋfitiibi bin nyí marab nì min máaǹ bí ŋée di kpèé-tì.

¹⁴Bikpootiliibi biluli bin nìn bí ki nákáǹ ubɔtee di nìn sá Kaarseena nì Keetaar nì Adimata nì Taarsiisi nì Meereesi nì Maarseena nì Meemukan. Binib biluli gbanti di nìn sá Peeriisi nì Meedi kàliŋkpilib bin pu ubɔti nìn mákée, bíǹ di nìn kā ipaaŋkpaan ubɔti gɔminau poon.

¹⁵Ní ubɔti bí-bi yii: «Man ubɔtikpaan, m tú m-faabi unimpubɔti Fastii cee ki tīī-bi dinyɔɔbundi yii bí yíiń-u, ní u yíì kaa dɔ́miń. Mara poonee ditafadaaldi dilal ní u máaǹ ní?»

¹⁶Ní Meemukan fōō dinyɔɔbundi ubɔti kàliŋkpilib nimbiin ki bí yii: «An kaa sá ubɔti baba ní unimpubɔti Fastii kpēē fám, ama an sá ki kpáaǹ bikàliŋkpilib nì anibul ŋin kɔkɔ bí ubɔti Asuweerusi tiŋki jaaŋŋi kɔkɔnee ní.

¹⁷Di sá yii binimpoobi làá gbìl̄ tibɔti tin unimpubɔti ŋá nee, ní ki mun dāa kíǹ ki kpèé bi-calib fám, ní kí dūú kpáĺ yii: <Ubɔtikpaan nìn tú bí yíiń unimpubɔti Fastiiyee, u nìn yíì ní kaa cūtì.>

¹⁸Díǹ gba Peeriisi nì Meedi kàliŋkpilib nimpoobi làá gbìl̄ unimpubɔti nín ŋá tiŋyee. Míǹ mbaantiim ní bi mun làá kpèè timbi a-kàliŋkpilib bin sá bi-calibee fám, kun làá dāá yàntī bininjab ń fōō aŋuuyee dee.

¹⁹A yaa bàà kíikée, ti-baa ubɔti, á bàà síiń mara yii Fastii ń taa ti gbóonní a-cee, ní kí fàtīí lēē unimpubɔti un jítiǹ-uee. Mara gbantee, bí ŋmà-u Peeriisi nì Meedi yab marabin ubɔ ń taa ŋmā kí kpìtī-u.

²⁰Ŋyunti ŋun mara un sii ubɔti yóoǹee yaa bàn̄ a-beekpaandi jaaŋŋi kɔkɔnee, binimpoobi kɔkɔ, bikpaambi nì ŋwaamu dāa kíǹ ki tɔ́ bi-calib ní.»

²¹Nlandɔkɔee nìn mɔ́ɔkiǹ ubɔti nì u-kàliŋkpilib, ní ubɔti ŋá kii Meemukan nín kpōotì-u puee.

²²U nìn ŋmàn̄ tigbɔn ki tīī u-beel tinjaŋŋi kɔkɔ, kitiŋ kamaa nì ki-ŋmaŋmabiti nì ki-sooŋyi poon. Bi nìn ŋmàn̄ yii uninja kamaa ń nīn sá uyidaan u-dicaŋkun, kí páb́ bí nīn sòoǹ u-nibul sooŋyi.