Read Ntcham Esther (hébreu) 2 Bible Online

Esther (hébreu) 2 - Ntcham bible

Esther (hébreu) 2

¹Míǹ jítì boon, ubɔti Asuweerusi ŋuul sɔ̄ŋkèe, ní u téetì Fastii nín nìn ŋá-u miŋyee, nì u mun nín nìn síiǹ-u laakiŋyee.

²Niinee ní bin sá ubɔti kpambaliŋee bí-u yii: «An máaǹ tí nyàab̀ bisapɔmbi bin ŋān̄ kunyaaŋŋu tikpil kaa nyí uninjee kí tīī ubɔti.

³An puee ubɔti ń lēē u-tiŋki jaaŋŋi kɔkɔn bikàlimbi bí nyàab̀ bisapɔmbi bin ŋān̄ kunyaaŋŋu tikpil kaa nyí uninjee. Bí cáań-bi Suusi ditiŋyil, kí kɔ́ǹ-bi binimpoobi diiŋŋin. Bí dū-bi kí ŋúbiǹ Eegee, ubɔti faaliu un cí u-nimpoobee, ní úǹ ń tīī-bi ikpafi in ŋáŋkí tiwunee bí nīn ŋmìtī.

⁴Ní usapɔɔn un yaa fáatì ubɔtee ń kpántí unimpubɔti kí fōō Fastii yil.» Tibɔti gbantee nìn mɔ́ɔkiǹ ubɔti ní u yāntì bi ŋá míǹ.

⁵Ujuudaja ubɔ nìn bí Suusi tiŋki kin sá ditiŋyilee poon, bí yíì-u Maardoosee. U sá Beenjameen naakookun. U-naanjab di sá Yaayiir nì Simeeyii nì Kiisi.

⁶Kijapaayee nìn kútì binib bin Babiloon bɔtiu Neebukadineesaar nìn cúuń kuyuŋu Jeerusaleem tiŋkin ki kpáaǹ Juuda yab bɔtiu Yookooniyayee poon.

⁷Maardoosee nìn fōō u-baawaai bisal u kā u-cee, bi yíì-u Adaasa àá Eesiteer. U-na nì u-baa nìn kpíì, ní Maardoosee fōō-u ki ŋúb́ kii u-bisalee. Usapɔɔnee nìn ŋān̄ tikpil.

⁸Bi nín dū ubɔti nín lī puee nì u-marau ki báakì ntimu poon yii ubɔti nyàab̀ bisapɔmbee, ní bi kóoǹní bisapɔmbi tikpil ki cáań ki kpáfì Suusi tiŋki kin sá ditiŋyilee poon, ní Eegee kpèé-bi. Bi cáań Eesiteer mun ubɔti cindi, ki dū-u ki ŋúbiǹ Eegee un cí ubɔti nimpoobee.

⁹Eesiteer nìn kɔ́ kijapaayee, ki ká diyimɔɔl u-cee, ní u nyàab̄ ikpafi in u làá nīn ŋmìtī u-wunti ń nīn ŋān̄ee nì tin u làá nīn jīǹee malaa ki tīī-u. U nìn lēē bisapɔmbi bin bí ubɔti cindinee biluli ki tīī-u bí nīn bí u-cee ki tútúǹ-u, ní ki kpēē ubɔti diiŋŋi kudimɔntiiu ki cáá-bi ki kɔ́ǹ niin.

¹⁰Eesiteer kaa nìn nyántì u-ba ki dàkā yii u sá dinibul dinee àá u-nyeeŋŋu sá doo, kun puee Maardoosee nìn kpáafì-u yii ú taa pée tùkù ubɔ u-nyeeŋŋu.

¹¹Baabadalee, Maardoosee pée cá binimpoobi diiŋŋi mɔŋkiŋu ní ki kpèé yii Eesiteer bí mana àá bi ŋúb́-u mana.

¹²Ŋyunti ŋun ní usapɔɔn yaa dū ikpafi ki ŋmītì u-wunti iŋmal saalaa nì ili ki dóò kii an nín bàlifī unimpu ń dū ŋyunti ŋun kí bɔ́ntí u-bee, ní ú nín cù ubɔti Asuweerusi cee. Di sá bi nìn dù ŋkpam min bi yíì miiree ní kí nùkù bi-wunti iŋmal iluu, ní kí dū iŋmal iluu mun kí ŋmìtī binimpoobi kpafii in ŋáŋkí tiwunee.

¹³Usapɔɔn un yuntiŋu yaa bāań ú cù ubɔti ceeyee, bi tìì-u tin kɔkɔ u yaa là kí ŋúb́ kí cù ubɔti cindinee ní.

¹⁴U nìn cá kujoou ní kutaa yaa wúntì kutaafaauee ní ú fàtīí gítiń kí kɔ́ binimpoobi bililiitiibi diikun, ní ufaal Saakigaasi un cí ubɔti bɔmbee cí-bi. Baa ti gítí ubɔti cee, see un di yaa kɔ́-u ní u yíiń u-yindi yii ú dāan̄ee baba di gítí.

¹⁵Abisayiil bisal Eesiteer, Maardoosee baawaai bisal un u nìn fōō ki dūu kpántì u-bisalee, mun yuntiŋu bāań ú cù ubɔti cee. Waa nìn bālifì yii u là kí nīn ŋúb́ tiba, see tin Eegee ufaal un cí ubɔti nimpoobee sáŋkì-u yii ú yòon̄ee. Eesiteer nìn kāntí diyimɔɔl un kamaa yaa nìn pée ká-uee cee.

¹⁶Ubɔti Asuweerusi nín jíń dibeel dibinluluútiil uŋmasaalaati poon, uŋmal un bi yíì Teebeetee, ní bi cáá Eesiteer ki cūnnì ubɔti dumpu.

¹⁷Ubɔti naŋki nìn kɔ́ Eesiteer tikpil ki jítiǹ binimpoobi bin kíǹee kɔkɔ. U nìn ká ubɔti cee diyimɔɔl nì kulaŋŋaŋfitiiu ki jítiǹ bisapɔmbi bin kíǹee kɔkɔ. Ubɔti nìn dū kibeefuulii ki cíkiǹ-u, ní ki dū-u ki kpántì unimpubɔti Fastii paaŋŋu.

¹⁸Ní ubɔti ŋá tican Eesiteer pu, ní ki yíiń u-tɔntɔŋkpilib nì u-kàliŋkpilib, ní ki pú u-tiŋki jaaŋŋi kɔkɔ lampoo, ní ki ŋá binib tiniti mbɔtiyaamin.

¹⁹Bi nìn gíti nyàab̄ bisapɔmbi nliliitiim ki kpáfì ubɔti dumpu. Ŋyunti gbantee, Maardoosee bí ubɔti cindi ki sá ukàlinja.

²⁰Eesiteer kaa nìn yāntì bi béè u-nyeeŋŋu nì dinibul din u sée, kii Maardoosee nín nìn kpáafì-u puee. Eesiteer pée gbíntìi ŋúb́ tin Maardoosee nìn dàkā-uee kii u nín nìn pée bí u-cee ki ŋúb́-tì puee ní.

²¹Ŋyunti ŋun Maardoosee bí ubɔti cindin ki tūǹ u-kàlintundee, ní bifaabi bili Bigitan nì Teereesi bin nìn cí ubɔti punyɔkɔkee fōō ubɔti pu diŋuul ki nyàab̀ kí kpɔ̀-u.

²²Ama ní Maardoosee gbìl̄ an bɔti, ní ki dūu tùkū unimpubɔti Eesiteer, ní úǹ dū an bɔtee ki nāatì ubɔti.

²³Bi cɔ́ŋkì ki kpēēyee, tibɔtee lafun sá mbaamɔn, ní bi cúú bi-liitil ki lúntì idɔ pu bi kpíì. Ní bi dū an bɔtee ki ŋmàn̄ ki ŋá kugbɔŋu kun poon bi ŋmà tibɔti ki cáa kpáafée ubɔti nimbiin.