Read Ntcham Esther (hébreu) 3 Bible Online

Esther (hébreu) 3 - Ntcham bible

Esther (hébreu) 3

¹Míǹ boonee ní ubɔti Asuweerusi kāaǹ Ameedata jipɔɔn Amaani u-tɔntɔŋkpilib kɔkɔ pu tikpiti. Amaani gbanti nìn sá Agaagi naakookun ní[1].

²Ubɔti nìn yóoǹ bikàlimbi bin bí u-cindin ki tūǹ atuunee mara yii Amaani yaa jītée, báà ŋma ń gbàan̄ u-nimbiin kí tīī-u jilma. Ama Maardoosee nìn yíì kaa gbàantí, kaa tàtīi dòontí dicincibil Amaani nimbiin.

³Ní bikàlimbi bin kɔ kíǹ ubɔti cindinee bālifì Maardoosee yii: «Ba pu ní sii kaa tɔ́ ubɔti marau un u yóoǹee ní?»

⁴Bi pée dāantí tibɔbaantiil gbanti ní ki tùkù Maardoosee ní waa fātìi tɔ́. Ní u bí-bi yii úǹ sá ujuudaja ní. An pu ní bi dūu tùkū Amaani kí kpèè u yaa làá nīn gbíntì ki ŋáań míǹ.

⁵Amaani nín lafun dáań ki ká yii Maardoosee kaa gbàantí u-nimbiin kaa tí tàtīi dòontí dicincibil ki tìì-u jilmee, ní u fōō diŋuul u-pu.

⁶U nín béè yii Maardoosee sá ujuudajee, ní u ká nlandɔkɔ yii Maardoosee baba maŋfal ní waa làá lēē, ama u làá kúntí Maardoosee nì u-yab Juuda yab bin kɔkɔ bí ubɔti Asuweerusi tiŋki kɔkɔnee ní.

⁷Ubɔti Asuweerusi nín jíń dibeel abin saalaa nì ali, uŋmapeepeekaa un bi yíì Niisaŋyee poon ní bi tɔ́ Puur, an dàkà yii bi tɔ́ kasi Amaani nimbiin ŋwiin kamaa pu nì uŋmal kamaa pu kí kpèè ŋwiin àá uŋmal un di máaǹ ú kpɔ̀ kí céetí Juuda yabee. Ní an dūu lítì uŋmal saalaa nì uliliiti pu, uŋmal gbanti ní bi yíì Adaar.

⁸Ní Amaani bí ubɔti yii: «Dinibul diba bí ki yàl̄ ki kɔ́ a-tinjaŋŋi kɔkɔn, ki nyáń di-ba nì anibul ŋin kíǹee. Di-marab nyáń bi-ba nì anibul kɔkɔ marab, ní bíǹ kaa tɔ́ ubɔti marab. Aa cáá ipaati iba bi-pu kí yàntī bí nīn bí ŋgbansɔŋfin.

⁹Ti-baa ubɔti, an yaa bàà ŋān̄ a-ceeyee, á bàà ŋmà kugbɔŋu kí pɔ̄ kinyɔkɔ bí kpɔ̀ kí céetí-bi. Man làá ŋmàntī animbil kúti kutukub saalaa kí tīī a-kàlimbi bin bí a-cindin ki tūǹ atuunee bí dūú ŋá ubɔti nimbiliŋ dakaau poon.»

¹⁰Niinee ní ubɔti fúutì u-bɔmbiki kin cáá u-daaŋkuee u-ŋaan ki dūu tīī Juuda yab pulincɔnti Amaani un sá Ameedata jipɔɔn ki sá Agaagi naakookunee.

¹¹Ní ubɔti kíí-u yii: «M gíiǹ a-nimbiliŋ ki kpáaǹ dinibulee ki tīī-si á ŋá-bi min a lèe.»

¹²Ní bi yíiń ubɔti gbaŋŋmaliibi uŋmapeepeekaa iwiin saalaa nì ita dal. Ní Amaani yāntì bi ŋmàn̄ tigbɔn ki tīī atinjan kɔkɔ bɔtibiliŋ nì ŋi-gɔminab nì dinibul kamaa bɔtiu. Bi nìn ŋmàn̄ kugbɔŋu ki tīī dinibul kamaa di-sooŋyin nì di-ŋmaŋmabiti ní. Ubɔti Asuweerusi yindi pu ní bi ŋmàn̄, ki dū u-bɔmbiki kin cáá u-daaŋkuee ki nyīī tigbɔnee pu.

¹³Ní ubɔti tuuŋyi yōoǹ tigbɔnee ki yākatì ubɔti tinjaŋŋi kɔkɔn. Bi nìn ŋmàn̄ tigbɔnee poon yii: «Bi pú kinyɔkɔ yii uŋmal saalaa nì uliliiti poon, Adaar ŋmaliu iwiin saalaa nì ita dalee, bí kpɔ̀ kí céetí Juuda yab kɔkɔ, binipɔmbi nì bitikpilib nì binimpoobi nì mbiyaamu. An sá ŋwimbaanti ní bí kpɔ̀ kí céetí-bi kí yòon̄ bi-wanti.

¹⁴Kugbɔŋu kun bi ŋmàn̄ ki tīī kitiŋ jaaŋŋi kɔkɔee sá mara ní bi yóoǹ, ní ki tùkù anibul kɔkɔ ń bɔ́ntí ŋi-ba kí cīití ŋwiin gbanti.»

¹⁵Ní ubɔti bí yii u-tuuŋyi ń yòon̄ tigbɔnee kí cáá yàkatī malaa malaa, ní bi cáa yākatì, ní maree dūu gbītì Suusi ditiŋyil poon. Ŋyunti gbantee Amaani nì ubɔti cūtìi kāl̀ ki bíi nyù ndaam, ní Suusi tiŋki kɔkɔ kɔ́ dinimbinaamandin.