Read Ntcham Esther (hébreu) 4 Bible Online

Esther (hébreu) 4 - Ntcham bible

Esther (hébreu) 4

¹Maardoosee nín gbìl̄ tin kɔkɔ jítèe, ní u dáaĺ ki cátì tiwan tin u pēēyee, ki dū kutukub ki pēeǹ, ki dū ŋfantam ki pùkū u-ba, ní ki nyáń kitiŋin ki gbáà ibiil mpɔn ki yáliŋkí.

²U bàn̄ ubɔti mɔŋkiŋuee ní ki yúl̀, kun puee ubɔ kaa cáá nsan kí nīn pēē kutuku kí kɔ́ ubɔti cindi.

³Míǹ ní kitiŋ jaaŋŋi laakin kamaa ní mara un ubɔti yóoǹee yaa bàn̄ee, an sá dikpool ní Juuda yab cee. Bi nìn bōob̀ nnyɔmu, ní binib tikpil sūǹ ki yáliŋkí, ní ki pēē kutukub ki dɔ̄ ŋfantamin ki bíntí.

⁴Eesiteer tɔntɔnliibi bisapɔmbi nì u-faabi cūtìi tùkū-u tin bi kée, ní u-pɔbil bíil̀ tikpil. Ní u nyàab̄ abɔkuti ki tīī-bi bí cáá tīī-u, ú pèetī kutukub bin u pēēyee kí dū abɔkuti ŋin u tīī-uee kí pèen̄, ama ní Maardoosee yíì.

⁵Niinee Eesiteer yíiń Ataaki, ufaal un ubɔti nìn tīī-u ú nīn bí ki tútúǹ-uee ki tú ú cùú bàlifì Maardoosee kí béé kun di yì-tì ní u bíi ŋáań mimmee.

⁶Ní Ataaki nín cá ki bàn̄ ki ká-u u yú mmɔŋkijaa, ubɔti naakooku nyɔkɔpu.

⁷Ní Maardoosee máafì-u tin kɔkɔ jítèe, nì animbil ŋin nyɔkɔm Amaani pōoǹ ubɔti yii bi yaa kūū ki céetì Juuda yab u làá cáá ŋá ubɔti nimbiliŋ dakaaunee.

⁸Ní u dū kugbɔŋu kun bi ŋmàn̄ Suusi an gbītì an kɔkɔ yii bí kpɔ̀ kí céetí Juuda yabee ki tīī-u ú cáá dàkà Eesiteer, ú béé tin poon bi bée, kí ká ubɔti kí gbàam̀-u ú sɔ̄ u-nibul Juuda yab saai.

⁹Ní Ataaki cáá tibɔti tin Maardoosee sòon̄ee ki tùkū Eesiteer.

¹⁰Ní Eesiteer bí Ataaki yii ú cùú tùkù Maardoosee yii:

¹¹«Ubɔti tɔntɔnliibi kɔkɔ nì anibul ŋin kɔkɔ bí ubɔti tinjaŋŋi poonee nyí yii ubɔti yaa kaa yíiń sii ubɔ ní a jítìi kɔ́ u-cindinee, see bí kpɔ̀-si, an sá mara ní. Ama sii un ní ubɔti yaa tāntì u-bɔtikpandɔŋu ŋun sá sindaariyee ki túĺee, sii di ŋmátí. Man ŋá iwiin mmuŋku nì saalaa dee ubɔti kaa yíiń-mi m cūtì u-cee.»

¹²Ní Ataaki cáá Eesiteer nín lī puee ki tùkū Maardoosee.

¹³Ní Maardoosee kíí Eesiteer yii: «Á taa dàkafì yii a nín bí dibeecindinee puee, sii baba di làá ŋmátí Juuda yab kɔkɔ kansikin.

¹⁴A yaa kaa ŋá tiba agìń yuntii in poon ti bí nee, Unimbɔti làá jòò Juuda yab kí fīī-bi, ama ní sii nì a-baa dicaŋkun yab kɔkɔ ń kpú. Ŋma tin ká an yaa kaa sá tin bí nee pu ní a kpántì unimpubɔti?»

¹⁵Ní Eesiteer kíí Maardoosee yii:

¹⁶«Á cù kí kpāfì Juuda yab bin kɔkɔ bí Suusi tiŋkinee, bí bóob́ kinyɔkɔ kí mèè Unimbɔti kí tīī-mi. Ní taa jī kí taa nyɔ̀ iwiin ita ŋwiimpu nì kunyeeu. Ma mun nì m-tɔntɔnliibi binimpoobi làá bóob́ kinyɔkɔ míǹ mbaantiim. Boonee ní ḿ cùú ká ubɔti nì min kɔkɔ mara yú yii ubɔ kaa cée, ní an yaa sá ŋkúmaaa, ḿ kpú.»

¹⁷Ní Maardoosee cūtìi ká u-yab ní ki ŋá kii Eesiteer nín bālifì yii bí ŋá puee.