Read Ntcham Esther (hébreu) 7 Bible Online

Esther (hébreu) 7 - Ntcham bible

Esther (hébreu) 7

¹Ubɔti nì Amaani búntì unimpubɔti Eesiteer cee kí jī tican.

²Ŋwinliliiti dal bi jíń ki nyùn̄ ki dóòyee ní ubɔti bālifì unimpubɔti Eesiteer yii: «Ba ní a là ní? Báà an yaa sá m-beel dijandi ní a yaa bālifì-mi, m làá tīī-si.»

³Ní unimpubɔti bí yii: «Too ti-baa ubɔti, m yaa ká diyimɔɔl a-cee ní an yaa fáatì-see, á dā man nì m-nibul maŋfal kí líí. Tin páb́-mi m là kí mèè-see dee, ti-baa ubɔti.

⁴Di sá yii bi dū man nì m-nibul ki nyáfì bí kpɔ̀ kí céetí-ti. An yaa bàà sá yii bi dū-ti ki nyáfì tí bàà kpántí iyumbu, maa bàà lì tiba a-cee, kun puee tíǹ kaa bàn̄ tibɔti ḿ cáań kí páb́ ubɔti.»

⁵Niinee ní ubɔti bālifì unimpubɔti Eesiteer yii: «Ŋma di sá-u ní ki cáá nlandɔkɔ gbanti? Udaan bí la?»

⁶Ní Eesiteer kíí-u yii: «Un páb́-ti ki sá ti-nannanliuee di sá Amaani unikpiti nee!» Niinee ní dinyoondi kɔ́ Amaani ubɔti nì unimpubɔti nimbiin.

⁷Ní ubɔti fōō diŋuul ní ki yíkì ki yāntì tijin ki nyáń ki yú mmɔŋki. Ní Amaani gbíntì Eesiteer cee ki bíi gbàam̄-u kí fīī u-maŋfal, kun puee u nìn ká yii ubɔti nín yíkì miŋyee, an sá ŋkúm di dɔ̄ ki cí-u.

⁸Ní u lítì kilambaŋ kin pu Eesiteer nìn kēe taapu ki bíi gbàam̄-u. Ubɔti nyánní mmɔŋki ki fātìi kóońee ki ká Amaani kudii kun poon bi bàà bíi jīǹ ticanee, u dɔ̄ dicincibil laakin Eesiteer kēe, ní ubɔti téeń mpɔn yii: «Kijapaai nee là kí dòon̄ nì Eesiteer mpɔn man nimbiin m-diikunaaa?» Ubɔti tin pée lì míǹ kaa láá ŋmíl̀ee bi dɔ́miń ki cúú Amaani ki dū tiwan ki bīiǹ u-nimbiin.

⁹Ní Arboona, ubɔti faabi kansikin ubɔ lī ubɔti cee yii: «Ti-baa bɔti, Amaani u-ba bɔ́ntì ndɔ ŋubɔ kí dū Maardoosee un mɔ́tì ubɔti puee kí lúntí, ndɔ gbanti dìin̄ u-mɔŋkiŋu. Ŋu-fɔkɔŋŋu sá meetab mmuŋku nì biŋmoo.» Ní ubɔti bí yii: «Bí dū Amaani kí lúntí ndɔ gbanti pu.»

¹⁰Ní bi dū Amaani ki lúntì ndɔ ŋun u nìn bɔ́ntì ki yóoǹ bí dū Maardoosee kí lúntée. Niinee ní ubɔti ŋuul sɔ̄ŋkì.