Read Ntcham Exode 1 Bible Online

Exode 1 - Ntcham bible

Exode 1

¹Isirayeel[1] jipɔmbi bin nìn nóoń-u ki dɔ́miń Eejipiti nì bi-dicaŋŋee yiŋŋi sèé:

²Rubeen nì Simeeyɔn nì Leefii nì Juuda

³nì Isakaar nì Sabulɔn nì Beenjameen

⁴nì Daani nì Neefitalii nì Gaadi nì Aseer.

⁵Jaakɔb nib kɔkɔ nìn kpáfì binib imuŋku ita nì saalaa ní. U-jipɔɔn Jooseefi úǹ nìn pée bí Eejipiti.

⁶Boonee ní Jooseefi nì u-nabiyaamu nì u-yuntiŋu nib kɔkɔ dāa kpíì.

⁷Míǹ boonee Isirayeel yab màl̄ ki būtì tikpil ki gbí kitiŋee ní ki ká mpɔn tiŋan pu[2].

⁸Ubɔtipɔɔn ubɔ nìn kāl̀ dibeel Eejipiti tiŋki pu, kaa pée nyí Jooseefi pu tiba.

⁹Ubɔtee nìn bí u-samaau yii: «Kpèèmaan, Isirayeel yab kpántì dinibul dikpaandi ki cáá mpɔn tiŋan pu ki jítiǹ-ti.

¹⁰Tí nyàab̀maan nsan kí bàtī bi-wíiŋŋu pu, án nín làá ŋá pu ní kujaau yaa láa nyánnée, bí taa cùú kūtì ti-nannanliibi pu bí jáǹ-ti ní kí sāǹ kí nyā ti-tiŋkinee.»

¹¹Niinee ní bi lēē bikàliŋkpilib ki tɔ́ bi-pu bí tīī-bi atuun ŋin pɔ̄ɔ̄yee bí nīn tūǹ. Bi nìn yāntì bi máń Piitoom nì Ramseesi timmu mun poon bi làá nīn kpáafí Faaroo[3] jintee.

¹²Ama bi yaa bíi sàantí Isirayeel yabee, ŋyunti gbanti ní bíǹ mɔ̀tīi bùtī ki jīǹ mpaan. An pu ní Eejipiti yab nìn kíǹ ki fàŋkí-bi.

¹³Niinee Eejipiti yab mɔ̄tìi bíi sàantí Isirayeel yab tikpil kii iyumbuee.

¹⁴Bi nìn yāntì Isirayeel yab wunti túŋkì nì atuun ŋin pɔ̄ɔ̄yee tɔ̄tam, an dàkà yii bi nìn búù titan ki māā brikisib ki tūǹ asaatuun. Eejipiti yab nìn cáá atuun ŋin kɔkɔ pɔ̄ɔ̄yee ki cáa nyìitī-bi mpɔn.

¹⁵Eebru yab nìn cáá bimatimmaanliibi bili bi nìn yíì ubɔ yii Siifira nì ki yíì un kíǹee Puya. Eejipiti bɔtiu nìn bí bi-kansikin ubɔ yii:

¹⁶«Ni yaa bíi màantí Eebru yab nimpoobi ubɔ ní ki yaa ká yii an sá kibininjabiki ní u bíi màal̀ee, ní fáá-kì kí kpɔ̀, ama an yaa sá kibinimpubikee, ní yàntī-kì.»

¹⁷Ama bimatimmaanliibee nìn fàŋkí Unimbɔti. An puee baa nìn pílifiǹ Eejipiti yab bɔtiu ní ki nìn yàntī bi màal̀ mbininjabiyaamu kaa kù-mu.

¹⁸Ní ubɔti yíiń bimatimmaanliibee ní ki bí-bi yii: «Ba pu ní ni ŋá míǹ, ki yàntī Eebru nimpoobi màal̀ naa fátí ki kù mbininjabiyaamu ní?»

¹⁹Bimatimmaanliibee nìn kíí Faaroo yii: «Eebru nimpoobi kaa sá kii Eejipiti nimpoobee. Bíǹ màal̀ bi-biyaamu sɔkɔmii kí dóó kí wàatī ní umatimmaanli ń nín bà.»

²⁰Unimbɔti nìn bīiǹ bimatimmaanliibi boon, ní Isirayeel yab mɔ̀tīi bùtī ki cáá mpɔn tikpil.

²¹Kii bimatimmaanliibee nín nìn fāŋkì Unimbɔti puee, u nìn bīiǹ bi-boon bi-dicaŋŋi būtì.

²²Niinee Faaroo yóoǹ u-yab kɔkɔ mara yii: «Ni yaa ká Eebru nimpoobi ubɔ màl̄ kibininjabikee, ní fōō-kì kí cáá tɔ̄ Niil mɔɔlin. An yaa sá kibinimpubikee, ní taa kpɔ̀-kì[4].»