Read Ntcham Exode 10 Bible Online

Exode 10 - Ntcham bible

Exode 10

¹Ti-Dindaan bí Mooyiisi yii: «Cù Faaroo cee, di sá man di pɔ́ɔkì u nì u-kpambaliŋ pɔbiliŋ kí ŋmā kí nyāntí m-maamaacidaanti bi-kansikin bí ká.

²Ní si mun ń ká kí dāá māafì a-biyaamu nì a-naantiibi m nín dátì Eejipiti yab tafal puee nì m nín ŋá maamaacidaanti tin bi-tiŋkinee. Min làá yàntī ní béé yii man di sá ni-Dindaanee dee.»

³Mooyiisi nì Aarɔn cūtìi ká Faaroo ní ki bí-u yii: «Ti-Dindaan Eebru yab Nimbɔtiu nín lī puee sèé: <Kí tin sāā ŋyunti ŋulɔŋu ní a làá gbèen̄ a-pɔɔgbifiŋŋu kí sìntī a-ba taapu kí tīī-mi ní? Yàntī m-nibul ń nyā kí cùú jāam̀-mi.

⁴A yaa yíì kaa yāntì m-nibul nyáńee, fool m làá fu tɔ̄ń inaakitoon a-tiŋki kɔkɔ pu.

⁵I làá dāan̄ kí kpátí kí bìin̄ kitiŋ kɔkɔ pu bí taa ti wāl̀-kì. I làá dāá ŋmɔ́ ki céetí tin nìn kíǹ utaaja kaa bíil̀ee, nì isufi in bí tisatinee.

⁶Inaakitoon làá dāan̄ kí gbí a-diiŋŋin nì a-kpambaliŋ kɔkɔ diiŋŋin nì Eejipiti yab kɔkɔ diiŋŋin. Doooo a-naanjab ki dāa dūu sāā a-baabi, bi nín kíĺ ki bí kitiŋ pu ki dāa dūu sāā díǹ nee, baa láá ká an bɔti juti ki ká.» Mooyiisi lī mimmee ní ki nyáń Faaroo cee ki búntì.

⁷Faaroo kpambaliŋ bí-u yii: «Kijapaai nee làá nīn pée cāabìń-ti mbusu ní. An puee yàntī binib nee ń nyā kí cùú jāam̀ bi-Dindaan bi-Nimbɔtiu. Aa ká yii an bíi nàantí ti-tiŋkaaa?»

⁸Ní bi fātìi yíiń Mooyiisi nì Aarɔn Faaroo cee, ní u bí-bi yii: «Nín̄ cámaan! Ní cùú jāam̀ ni-Dindaan ni-Nimbɔtiu. Ama, bilab nì bilab di cá ní?»

⁹Ní Mooyiisi kíí-u yii: «Ti nì ti-nipɔmbi nì ti-jaŋkpilib nì ti-nimpunaatiibi nì ti-jipɔmbi nì ti-bisalib nì ti-ŋoobui nì ti-piii nì ti-naai kɔkɔ di làá cù. Kun puee an sá ti-Dindaan jiŋaaliu ní ti làá cùú jī kí tīī-u tinyool.»

¹⁰Ní Faaroo bí-bi yii: «Baaa! M yaa yāntì ni nì ni-nimpoobi nì ni-biyaamu búntèe, ni-Dindaanee lafun bí ni-cee! Ni cáá ilandɔkɔkpiti páaa!

¹¹M yíì kpataaa! Bininjab baba ń cùú jāam̀ ni-Dindaan, kun puee kun ni mēē-mee dee.» U lī mimmee ní bi jìn̄-bi Faaroo cee ki nyántì.

¹²Ní ti-Dindaan bí Mooyiisi yii: «Tàntī a-ŋal Eejipiti tiŋki pu inaakitoon ń dāan̄ kitiŋ pu kí ŋmɔ́ kí céetí kitiŋ pu mooti kɔkɔ, nì tin kɔkɔ kíǹ utaaja kaa bíil̀ee.»

¹³Mooyiisi tāntì u-ŋal Eejipiti tiŋki pu, ní ti-Dindaan yāntì kubuŋu kubɔ nyánní ŋwìiń nyalaŋki pú ki jítì kitiŋee pu ŋwiimpu nì kunyeeu kɔkɔ. Kutaa wúntèe ní kubuŋuee cáań inaakitoon.

¹⁴Ní i dɔ́miń ki gbí kitiŋ kɔkɔ pu laaba kaa kíǹ. I nìn dɔ́miń ki wīikí tikpil tikpil, baa láá ká an naakitooŋyee wíiŋŋu míǹ dalba, kaa làá gíti ká míǹ mun dalba.

¹⁵I kpátìi bīiǹ kitiŋ kɔkɔ pu bɔ̀mmm ní baa ti wāĺ-kì. Ní i ŋmɔ́ ki céetì kitiŋee pu mooti nì isufi in nìn kíǹ utaaja kaa bíil̀ee biliŋ. Kumɔsɔŋu kaa nìn kíǹ kitiŋ pu, míǹ ní kufaasɔŋ kaa nìn kíǹ busubu pu tisatin nì Eejipiti tiŋki kɔkɔ poon[21].

¹⁶Niin niin ní Faaroo tú bi yíiń Mooyiisi nì Aarɔn ní ki bí-bi yii: «M yīntiǹ ni-Dindaan ni-Nimbɔtiu ki yīntiǹ ni mun.

¹⁷Ní gíti dū m-kpitii kí pɔ̄-mi min bí nee mun, kí mèè ni-Dindaan ni-Nimbɔtiu ú tí kàkatī ŋkúm tafadaaldi nee kí wàatī-mi.»

¹⁸Mooyiisi nyáń Faaroo ceeyee ní ki mēē ti-Dindaan.

¹⁹Ti-Dindaan nìn yāntì kubuŋkpaaŋŋu kubɔ nyánní ŋwìiń jeetilaŋki pú ki kpāā inaakitoon kɔkɔ ki cáa tɔ́ Tikati mɔɔl poon. Eejipiti tiŋki kɔkɔ poonee, baa nìn gíti kāntí unaakitoon báà ubambaanti.

²⁰Ama ti-Dindaan nìn pɔ́ɔkì Faaroo pɔbil, an yāntì waa nìn pú Isirayeel yab nsan bí nyā.

²¹Ti-Dindaan bí Mooyiisi yii: «Yòon̄ a-ŋal yilpu, dibɔmbɔndi ń dāá bìin̄ Eejipiti tiŋki pu, kí nīn gbìfì unil ń ŋmā kí gbēē-dì nì u-ŋal.»

²²Ní Mooyiisi yōoǹ u-ŋal yilpu, ní dibɔmbɔŋkpaandi diba dɔ́miń Eejipiti tiŋki kɔkɔ pu áli iwiin ita[22].

²³Iwiin ita gbanti poonee, Eejipiti yab báà ubɔ kaa nìn ŋúń ki wál̀ u-juti, kaa nìn ŋúń ki céefì u-taal ki nyáń. Ama ní laakin Isirayeel yab kóòyee wāĺ bɔ́mbɔŋ.

²⁴Ní Faaroo yíiń Mooyiisi ki bí-u yii: «Nín̄ cámaan! Cùú jāam̀maan ni-Dindaan. Ni ŋūǹ kí kpáaǹ ni-biyaamu. Ama ni-piii nì ni-ŋoobui nì ni-naai íǹ làá gbíntí doo.»

²⁵Ní Mooyiisi kíí-u yii: «Sii a-ba di làá tīī-ti tiwaŋkuti tin ti làá dūú ŋá mpèé saraau nì bisaraawɔkaabi kí tīī ti-Nimbɔtiueeee?

²⁶Ti làá kpáaǹ ti-waŋkuti, báà kubɔ kaa làá kíń. Di sá yii tiwaŋkuti gbanti kansikin ní ti làá tin lēē tin sá tí dūú ŋá saraabi kí tīī ti-Dindaan ti-Nimbɔtiuee. Taa láá nyí tin ní ti làá dūú ŋá saraabee, see ti yaa bàn̄ laakin ti cée.»

²⁷Ama ní ti-Dindaan mɔ̄tìi pɔ́ɔkì Faaroo pɔbil ní waa là kí pɔ̄ Isirayeel yab nsan bí nyā.

²⁸Ní Faaroo bí Mooyiisi yii: «Nyā m-cee doo! Á taa ti dāan̄ m-cee dalba dalba! Daliŋkin ní a yaa ti dɔ́miń ki yúl̀ m-nimbiinee, a làá kpú ní!»

²⁹Ní Mooyiisi kíí-u yii: «A nín lī puee, an ŋān̄! Maa làá ti dāan̄ kí yūĺ a-nimbiin!»