Read Ntcham Exode 12 Bible Online

Exode 12 - Ntcham bible

Exode 12

¹Ti-Dindaan bí Mooyiisi nì Aarɔn Eejipiti tiŋkin yii:

²«Uŋmal un poon ni bí nee ń nīn sá-ni uŋmapeepeekaa iŋmal poon. U làá nīn sá-ni dibindi poon ŋmapeepeekaau ní.

³Ní kpāfì Isirayeel samaau kɔkɔ kí sòoǹ nì bi yii: <Uŋmal nee poon iwiin saalaayee, kudicaŋu àá kunaakoou kamaa ń lēē dipibil àá diŋɔbil diba.

⁴Kudicaŋu kubɔ nib yaa kaa náaǹ kí ŋmɔ́ kí dóó kuwaŋkuluuee kɔkɔ yaadalee, bí ká kudicaŋu kun pìlīǹ-bee yab bí sòoǹ kí gbìlīǹ tɔb kí béé bi-nib nyɔkɔm kí lēē kuwaŋkuluu kun bi làá ŋmā kí ŋmɔ́ kí dóó yaadalee.

⁵Kuwaŋkuluu kun bi làá kpɔ̀ee máaǹ kí nīn sá uja ki cáá dibindi diba, ku-laaba ń taa nīn wɔ̀b̄. Án ŋūǹ kí nīn sá diŋɔbil àá dipibil.

⁶Ní kpāafì kuwaŋkuluu gbanti áli uŋmal poon ŋwiin ŋubɔ kpá saalku dal. An joopɔŋkuee, Isirayeel samaau kɔkɔ ń kóoǹ kí kpāfì ní kudicaŋu kamaa ń kpɔ̀ ku-waŋkuluku.

⁷Kudii kun kamaa poon ní ni kūū kuwaŋkuluu ki ŋmɔ́ee, ní dū fatiku kí ŋmìtī idɔ ili in pu punuu nákée nì ndɔ ŋun làl̄ punuu yilpuee.

⁸Ní ŋɔ̄fì tinan gbanti, ní kunyeeuee, ní ŋmɔ́-tì nì kpɔnɔ un baa ŋá ŋkpɔnɔnyɔkɔee nì tifaal tin tūee.

⁹Ní taa ŋmɔ́-tì tikaal, kí taa tɔ́kɔń-tì mun, ama ní ŋɔ̄fì-tì kí kpáaǹ diyil nì ayaka nì ina.

¹⁰Ní taa ŋmɔ́-tì kí kíń fool. Tin yaa kíǹ kutaa wúntèe, ní dūú wà ŋŋmi.

¹¹Ni nín làá nīn bí min kí jī tijin gbantee sèé: ní gbìn̄ dambalab ni-cammu án cúú ni-wampeeŋkaati, kí táká ni-naatakaŋ, kí nīn ŋúb́ ni-kpandɔi ni-ŋaan, ní kí jī tijin gbanti malaa malaa. Dilákatil jiŋaaliu un ni làá jī kí tīī man ni-Dindaan tinyoolee dee.

¹²«Kunyeeu gbantee, m làá dāá jītí Eejipiti tiŋkin kí kpɔ̀ Eejipiti tiŋki biseebiyaamu kɔkɔ, kí kíĺ binib kí dāá sāā tiwaŋkuti. M làá dāá dáaĺ Eejipiti yab waaŋi kɔkɔ tafal. Man di sá ni-Dindaan.

¹³Ama adiin ŋin nimbi kóòyee, fatiku di làá nīn sá-ni diwundi. M yaa láa ká fatikuee ní ḿ lákatí ni-pu, ní nimbi ń ŋmátí ŋkúm tafadaaldi din m dūu tɔ́ Eejipiti yab puee[23].

¹⁴«Ní dáań ŋwiin nee kí yóoń kí nīn téetí ŋu-pu, ŋú kpántí-ni jiŋaal ní nīn jīǹ ki tìì man ni-Dindaan tinyool. Jiŋaal gbanti ń kpántí-ni mara ní nīn jīǹ míǹ kí nīn pée cáa cá jaanjaan.»

¹⁵Ní ŋmɔ́ kpɔnɔb bin kaa cáá ŋkpɔnɔnyɔkɔee iwiin iluli. Kí kíĺ ŋwimpeepeekaa dalee, bí taa ti ká ŋkpɔnɔnyɔkɔ ubɔ dumpu. Kí yòon̄ ŋwimpeepeekaa dal kí cáá sāā iwiin ilulee, un yaa ŋmɔ́ kpɔnɔ un bi ŋá ŋkpɔnɔnyɔkɔee, bí nyāntí-u Isirayeel nibul kansikin.

¹⁶Ŋwimpeepeekaa dalee, ní kóoǹ kí kpāfì kí jāam̀-mi, ní ŋwinluluúti dal muee, ní tí kóoǹ kí kpāfì kí jāam̀-mi. Ní taa tɔ̄ ditundi diba ŋwiin gbanti, see tijin tin ni làá ŋá báà ŋma ń jēe baba.

¹⁷«Kpɔnɔb bin baa ŋá ŋkpɔnɔnyɔkɔee jiŋaaliu sá ní nīn jīǹ ki téetí ŋwiin ŋun m nìn nyántì m-nibul Eejipiti tiŋkinee ní. Ní nīn jīǹ jiŋaal gbanti kí nīn pée cáa cá jaanjaan. Án nīn sá-ni dibɔkpaal din kaa kpántée.

¹⁸Kí yòon̄ uŋmapeekaa poon ŋwiin ŋubɔ kpá saalku dal kujoopɔŋ kí tin cáá sāā iwiin mmuŋku nì ŋubɔ dal kujoopɔŋuee, ní taa ŋmɔ́ kpɔnɔb bin bi ŋá ŋkpɔnɔnyɔkɔee.

¹⁹Bí taa ká ubɔ dumpu ŋkpɔnɔnyɔkɔ kí cáá sāā iwiin iluli. An yaa sá unicaan àá Isirayeel yab ubɔ di yaa ŋmɔ́ kpɔnɔ un poon ŋkpɔnɔnyɔkɔ ŋmàl̄ee, bí nyāntí udaan Isirayeel nibul kansikin.

²⁰Ní taa pée jī tijin tin poon bi ŋá ŋkpɔnɔnyɔkɔee báà tiba. Báà laakin ní ni yaa pée bàn̄ ki kóòyee, ní taa ŋmɔ́ kpɔnɔb bin poon bi ŋá ŋkpɔnɔnyɔkɔee[24].»

²¹Ní Mooyiisi yíiń Isirayeel kpilib kɔkɔ ki kpáfì, ní ki bí-bi yii: «Kudicaŋu kamaa ń cùú nyàab̀ dipibil àá diŋɔbil kí kpɔ̀ kí jī Dilákatil jiŋaaliu.

²²Ní lēēmaan tifaapibiti tin bi yíì isɔpee bambiliŋ kí ŋá kibɔŋ kí dūu sēē kuwaŋkuluu kun ni kūū ki lēē fatiku ki ŋá disambil poonee. Ní dūú ŋmìtī idɔ ili in pu punuu cɔ́ee nì ndɔ ŋun làl̄ punuu yilpuee. Ni yaa ŋá mimmee, ubɔ ń taa ti nyā kí cáá sāā kutaafaau.

²³Ti-Dindaan làá jītí kí dáaĺ Eejipiti yab tafal. Ama u yaa ká fatiku mpunyɔmu puee, u làá jītí ní kaa làá yàntī ŋkúm tafadaaldi[25] ń kɔ́ ni-ciŋŋin.

²⁴Án nīn sá dibɔkpaal din làá nīn bí ki cá jaanjaanee ki tīī ni nì ni-biyaamu.

²⁵Ni yaa láa bàn̄ ki kɔ́ kitiŋ kin ti-Dindaan pōoǹ kí tīī-nee poonee, ní dāá nīn ŋáań akoobil gbanti.

²⁶Ni-biyaamu yaa láa bālifì-ni yii akoobil gbanti taapu sá yii bee,

²⁷ní dāá kíí-bi yii: <An sá saraa un ti ŋáań ki tìì ti-Dindaan Dilákatil jiŋaaliu yuntiŋuee ní. Ŋyunti ŋun ti-naanjab nìn bí Eejipiti tiŋkinee, ti-Dindaan nìn kūū Eejipiti yab. Ama u nìn lákatì timbi diiŋŋi pu kaa yúl̀, ní ki wúń ti-dicaŋŋi pu.>» Niinee ní Isirayeel yab tātìi gbāaǹ ki jáam̀ ti-Dindaan.

²⁸Míǹ boonee ní bi búntì ki cūtìi ŋá min ní ti-Dindaan tùkū Mooyiisi nì Aarɔn yii bí ŋée.

²⁹Kunyataasiiuee ní ti-Dindaan kūū Eejipiti tiŋkin mbiseebiyaamu nninjabiyaamu kɔkɔ, ki kíliń Faaroo un kā dibeejal puee jipɔŋkpiliu ki tin cáa sāā usarkadaan un kā u-sarkadiikunee jipɔŋkpiliu nì tiwaŋkuti kɔkɔ bipeepeekaamu njamu.

³⁰Faaroo nì u-kpambaliŋ nì Eejipiti yab kɔkɔ yíkì kunyeeuee, dituweel fōō ki píĺ kitiŋ kɔkɔn dàii, kun puee dicindi diba nìn kpá unil kaa kpíì di-poon.

³¹Kunyataasiiu gbantee ní Faaroo yíiń Mooyiisi nì Aarɔn ní ki bí-bi yii: «Yīkì kí nyāmaan m-tiŋkin, ni nì Isirayeel yab kɔkɔ! Cùú jāam̀maan ni-Dindaan kii ni nín bālifì puee!

³²Yòon̄ kí kpáam̀maan ni-waŋkuti kɔkɔ kii ni nín bālifì puee kí nīn cámaan. Ní mèèmaan kí bìin̄ m-pu.»

³³Eejipiti yab dākafì yii bi làá kpú kí dóó ní, an pu ní bi nìn jì Isirayeel yab bí nyā bi-tiŋkin malaa malaa.

³⁴An puee Isirayeel yab nìn yíkèe, bi nìn tú bukpɔnɔsaa bun kaa jɔ́m̀ee ní, ní ki dū kikabiki kin bi cáa nùkù bukpɔnɔsaayee ki póob́ abɔkutin ki dūu būkuǹ.

³⁵Isirayeel yab nìn ŋá kii Mooyiisi nín nìn tùkū-bi puee. Bi nìn mēē Eejipiti yab sindaariya nì animbil wanti nì tiwampeeŋkaal.

³⁶Ti-Dindaan nìn yāntì Isirayeel yab ká diyimɔɔl Eejipiti yab cee, di sá bi nìn kíí ki tīī Isirayeel yab tin bi mēēyee. Míǹ ní Isirayeel yab nìn dī ki fúkúl̀ Eejipiti yab[26]!

³⁷Isirayeel yab nìn yíkì Ramseesi tiŋkin ki búntì Sukooti tiŋkin. Bininjab nìn sá kii kutukub alaataa aluu nyɔkɔm ní ki còom̄ ataa pu. Baa nìn kàan̄ ki kpáaǹ mbiyaamu nì binimpoobi.

³⁸Biniyaŋyambi tikpil mun nìn nóó-bi ki búntì ní bi nìn cáá tipicaŋkpun nì tiŋɔcaŋkpun nì tinacaŋkpun tikpil.

³⁹Bi nìn dū bukpɔnɔsaa bun bi nìn cáań Eejipiti tiŋkinee ki ŋá kalaabi bin kaa cáá ŋkpɔnɔnyɔkɔee, di sá yii bi nín nìn jìn̄-bi Eejipiti tiŋkinee puee, baa nìn ŋúń ki kāl̀ ki cíitì bukpɔnɔsaayee ń jɔ̄m̀. Baa nìn ŋúń ki bɔ́ntì tijin tin bi làá nīn jīǹ ki còom̄ nsanee.

⁴⁰Isirayeel yab nìn kāl̀ Eejipiti tiŋkin abin alaataa anaa nì mmuŋku nì saalaa ní[27].

⁴¹Ŋwiin ŋun ní an sāā abin alaataa anaa nì mmuŋku nì saalaa gúlgulee ní ti-Dindaan nibul nyáń Eejipiti tiŋkin ki nóó tɔb akiti akiti kii bijanjaliibee.

⁴²Ti-Dindaan nìn cíitì kunyeeu gbanti kɔkɔ ní ki nyántì Isirayeel yab Eejipiti tiŋkin. An puee, kí nīn cáa cá jaanjaanee, Isirayeel yab máaǹ kí nīn kàal̀ kunyeeu gbanti kí taa gèeǹ, di sá yii ti-Dindaan di yì kunyeeu gbanti.

⁴³Ti-Dindaan bí Mooyiisi nì Aarɔn yii: «Kpèè, Dilákatil jiŋaaliu marab sèé: <Unicaan báà ubɔ kaa cáá nsan kí jī jiŋaal gbanti jinti.

⁴⁴<Á gíí uyumbu un a dá nì animbilee dikpancandi kí wàatī ní ú nín jī jiŋaal gbanti jinti.

⁴⁵<Unicaan un kɔ́-see nì upaadaan kaa cáá nsan kí jī jiŋaalee jinti.

⁴⁶<Ní nīn kā adiinni ní kí ŋmɔ́ jiŋaalee nanti. Ubɔ ń taa kpáaǹ tinan kí nyā mmɔŋki. <Ní taa wīī kuwaŋkuluuee kpabil báà diba[28].

⁴⁷<Isirayeel samaau kɔkɔ ń jī jiŋaal gbanti.

⁴⁸<Unicaan un kɔ́-nee yaa là kí jī Dilákatil jiŋaaliu kí tīī ti-Dindaan tinyoolee, ú gíí u-dicaŋku yab bininjab kɔkɔ akpancan. Niinee udaan ŋūǹ kí jī jiŋaal gbanti kii Isirayeel yab ntindambiyaamuee. <Ama un kaa gíí dikpancandee ń taa jī jiŋaal gbanti.

⁴⁹«<Marab gbantee ń nīn sá ki tīī Isirayeel yab, kí nīn sá ki tīī binicambi bin kóò ni-tiŋkinee.>»

⁵⁰Isirayeel yab kɔkɔ nìn ŋá kii ti-Dindaan nín nìn tīī Mooyiisi nì Aarɔn mara yii bí ŋá puee.

⁵¹Ŋwiin gbanti ní ti-Dindaan nyántì Isirayeel yab Eejipiti tiŋkin bi nóó tɔb akiti akiti kii bijanjaliibee.