Read Ntcham Exode 13 Bible Online

Exode 13 - Ntcham bible

Exode 13

¹Ti-Dindaan sòon̄ nì Mooyiisi ki bí-u yii:

²«Á dū Isirayeel yab biseebiyaamu bininjab kɔkɔ kí sú-mi. Di sá yii unimpu kamaa biseebiki kininjabiki nì kuwaŋkuluu kamaa bipeepeekaaki kijaka sá ki tīī man ní[29].»

³Mooyiisi bí Isirayeel nibul yii: «Ní nīn téetímaan ŋwiin nee pu, ti-Dindaan nín dū u-ŋampɔŋŋu ki nyántì-ni kuyuŋun Eejipiti tiŋkin puee. Yaadalee ní taa ŋmɔ́ kpɔnɔb bin poon bi ŋá ŋkpɔnɔnyɔkɔee.

⁴Ni bíi nyēē Eejipiti tiŋki poon díǹ Ifin ŋmaliu un bi yíì Abiibee wiiŋŋu ŋubɔ dee[30].

⁵Ti-Dindaan yaa cáá-ni ki kɔ́ǹ Kanaan yab nì Eeti yab nì Amɔɔr yab nì Eefi yab nì Jeebusi yab timmunee, ní dāá nīn ŋáań akoobil nee dibindi kamaa uŋmal nee poon ki tìì ti-Dindaan tinyool. Kitiŋ gbanti ní ti-Dindaan nìn pōoǹ ni-naanjab yii u làá dūú tīī-nee. Kitiŋ gbanti poon ní nnaabiim nì tisiil còol̀.

⁶Ní dū iwiin iluli kí ŋmɔ́ kpɔnɔb bin kaa cáá ŋkpɔnɔnyɔkɔee. Ŋwinluluúti dalee, ní jī jiŋaal kí tīī ti-Dindaan tinyool.

⁷Iwiin iluli gbanti poonee, ní taa ŋmɔ́ kpɔnɔb bin poon bi ŋá ŋkpɔnɔnyɔkɔee. Ni-tiŋki kɔkɔ poonee, bí taa ká ni-cee kpɔnɔ un poon bi ŋá ŋkpɔnɔnyɔkɔee àá ŋkpɔnɔnyɔkɔ ŋu-ba.

⁸Jiŋaal gbanti poonee, ní dāá māafì ni-biyaamu yii: <Ti ŋáań míǹ ti-Dindaan nín nìn ŋá min ki tīī-ti ti nín nìn nyáń Eejipiti tiŋkin puee ní.»

⁹Jiŋaal gbanti ń dāá nīn sá-ni diteetil, kí dāá nīn sá-ni kudaaŋŋu ni-ŋalii nì ni-yigbeeŋi pu, ní kí nīn téetí-ni yii ni máaǹ kí nìn sòoǹ ti-Dindaan marau pu, kun puee an sá nì u-ŋampɔŋŋu ní u nyántì-ni Eejipiti tiŋkin.

¹⁰Dibintil kamaa jiŋaal nee wiiŋŋu yaa bāańee, ní ŋá min mara nee bí yii ní ŋée.

¹¹Ti-Dindaan làá cáá-ni kí kɔ́ǹ Kanaan tiŋkin kii u nín nìn pūtì ki pōoǹ ni nì ni-naanjab yii u làá dū-kì kí tīī-ni puee.

¹²Niinee ní dāá dū ni-biseebiyaamu nninjabiyaamu kí sú ti-Dindaan. Ni-waŋkuti bipeepeekaamu njamu mun sá ti-Dindaan wanti ní.

¹³Ní dū upii àá uŋoobu kí kpántí kimaŋ bipeepeekaaki kijaka. Ni yaa kaa kpántèe, ní nyīī kí gíí ki-sil kí kpú. Ama ni-nibul poon biseebiyaamu nninjabiyaamuee, ní pà mu-pu[31].

¹⁴Boonee ni-biyaamu yaa láa bíi bàlifī-ni yii ba pu ní ni ŋáań mimmee, ní dāá kíí-bi yii: <Kun pu ti ŋáań mimmee di sá yii ti-Dindaan nìn dū u-ŋampɔŋŋu ní ki nyántì-ti kuyuŋu poon Eejipiti tiŋkin.

¹⁵Faaroo nìn yíì kpataaa yii u kpá kí líí-ti tí búntí. Niinee ti-Dindaan yāntì Eejipiti yab biseebiyaamu nninjabiyaamu nì bi-waŋkuti bipeepeekaamu njamu kpíì kɔkɔ. An pu ní ti cáá ti-waŋkuti bipeepeekaamu njamu ki ŋáań saraa ki tìì ti-Dindaan, ní ki pà ti-biseebiyaamu nninjabiyaamu pu.>

¹⁶Míǹ puee tin ti bíi ŋáań nee ń nīn sá-ni kudaaŋŋu ni-ŋalii nì ni-yigbeeŋi pu, kí nīn téetí-ni yii ti-Dindaan nìn dū u-ŋampɔŋŋu ní ki nyántì-ti Eejipiti tiŋkin.

¹⁷Faaroo nín nìn yāntì Isirayeel yab nyáń u-tiŋkinee, Unimbɔti kaa nìn yāntì bi dī Fiiliistii yab tiŋki saŋŋu, niin mun di kaa bàà dátì[32]. Unimbɔti nìn lī u-ban yii: «Binib nee yaa ká kujaau nsanni, bi-pɔbil làá yīkì ní bí bí yii bi làá fàtīí gítí Eejipiti tiŋkin.»

¹⁸An pu ní Unimbɔti nìn yāntì bi dūu dī kuteeu pú ki pɔ́tì ki tin nyáń Tikati mɔɔl pu. Isirayeel yab nìn nyáń Eejipiti tiŋkin ki nóó tɔb akiti akiti kii bijanjaliibee.

¹⁹Mooyiisi nìn kpáaǹ Jooseefi kpabiŋ, kun puee Jooseefi nìn bí u-nabiyaamu yii: «Unimbɔti làá jòoń-ni ní nyā kitiŋ nee poon. Ní pùtī yii ni làá dāá kpáaǹ m-kpabiŋ[33].»

²⁰Isirayeel yab nìn yíkì Sukooti tiŋki ní ki cūtìi gāā bi-tantib Eetaam tiŋki, kuteeu kúntilaŋki.

²¹Ti-Dindaan u-ba di nìn līī bi-nyɔkɔpu. Ŋwiimpuee, u nìn bí ditagbancancaal poon ní ki dàkà-bi nsan, ní kunyeeuee ditagbancancaalee ń kpántí ŋŋmi ki ŋmíntí-bi. An pu ní bi nìn ŋūǹ ki còom̄ ŋwiimpu nì kunyeeu.

²²Ditagbancancaalee kaa sútí kí wàatī dinibul ŋwiimpu ní ditagbancancaal din sá ŋŋmee mun kaa sútí kí wàatī-bi kunyeeu.