Read Ntcham Exode 14 Bible Online

Exode 14 - Ntcham bible

Exode 14

¹Ti-Dindaan bí Mooyiisi yii:

²«Tùkù Isirayeel yab bí fàtīí gítí Pii-Ayirooti tiŋki caŋin, Miigidool nì dimɔɔl kansikin. Bí gāā bi-tantib kí kàl̄ niin kí nīn túĺ Baal-Seefɔn tiŋkin, dimɔɔl caŋin.

³Faaroo làá sòoǹ ni-pu yii: <Naŋkɔnampu Isirayeel yab gáatì ki túĺ ti-tiŋki laaba pú ki tú ki yìiǹ ní kuteeu dū-bi ki náĺ.>

⁴M làá lùkutì Faaroo ní ú jàń ni-boon. Di sá yii Faaroo nì u-janjaliibi di làá yàntī bí ká man nyooti. Niinee Eejipiti yab làá béé yii man di sá ni-Dindaan.» Ní Isirayeel yab ŋá kii ti-Dindaan nín lī puee.

⁵Bi nìn tùkū Faaroo yii Isirayeel yab yíkì. Niinee ní u nì u-kpambaliŋ landɔkɔŋu cúu kpántì bi-pu, ní bi bí yii: «Ba ní ti ŋá nan ní? Ba pu ní án nín bàà sá tí nīn ŋúb́ Isirayeel yab bí nīn sá ti-yumbuyee, ti yāntì bi nyáń ki búntì ní?»

⁶Niinee ní Faaroo kpàl̄ u-janjatɔrɔkub taamui, ki yōoǹ u-janjaliibi bi nín jì bi-boon.

⁷U nìn yōoǹ u-tɔrɔkub bin sá bimɔmmɔntiibee alaataa aluu ki kpáaǹ Eejipiti tɔrɔkub bin kíǹee kɔkɔ. Tɔrɔku kamaa poonee, bijanjaliibi bita di nìn bí.

⁸Ti-Dindaan nìn pɔ́ɔkì Eejipiti bɔtiu Faaroo pɔbil, ní u yíkìi bíi jì Isirayeel yab boon, ama ní bíǹ nìn nyáń Eejipiti tiŋkin nì dibatɔl nì ifaal.

⁹Eejipiti yab janjaliibi nì Faaroo janjatɔrɔkub taamui nì bijanjaliibi bitanjakaliibi yíkìi kùl̄ ki páaǹ Isirayeel yab boon. Bi nìn cúú-bi dimɔɔl caŋin, Pii-Ayirooti watil pú ki túĺ Baal-Seefɔn tiŋki, laakin bi nìn gāā bi-tantib ki kāl̀ee.

¹⁰Ŋyunti ŋun Isirayeel yab dāa béè yii Eejipiti yab bíi jìń bi-boonee, nì bi nín dāa ká yii Faaroo nì u-naacimbi tóobiń-bee, bi nìn fāŋkì tikpil ní ki nìn bíi kūuntí ki yíì ti-Dindaan.

¹¹Bi nìn bí Mooyiisi yii: «Itaŋkpiifal kaa bí Eejipiti tiŋkinaaa? Ba pu ní a cáań-ti tí kpú kuteeun doo? Ba pu ní a yāntì ti yíkìń Eejipiti tiŋkin ní?

¹²Ti nín nìn dáá bíń Eejipiti tiŋkinee, ti nìn tùkū ki cántì-si yii: <Yàntī-ti tí nīn sá Eejipiti yab yumbui. An sɔ́ tí nīn tūǹ atuun ki tìì Eejipiti yab ki jítiǹ tí kpú kuteeun.>»

¹³Mooyiisi nìn kíí samaa yii: «Taa fàŋkìmaan! Nín̄ kāmaan soooo! Ni làá ká díǹ wiiŋŋu ti-Dindaan nín làá fīī-ni puee. Di sá yii Eejipiti yab bin ni wāĺ díǹ nee, ni pée gíti kpá kí ká-bi jaanjaan.

¹⁴Nimbi dee, nín̄ kāmaan soooo, ti-Dindaan làá já kí tīī-ni.»

¹⁵Ti-Dindaan bí Mooyiisi yii: «Ba pu ní a kūuntí ki yíì-mi? Tùkù Isirayeel yab yii bí yīkì kí nīn còom̄ ki cá.

¹⁶Sii yòon̄ a-kpandɔŋu kí dūú tàntī dimɔɔl pu kí cúú-dì kí búkutí mili nsan ń dòon̄ Isirayeel yab ń dùtī ŋkulimmi.

¹⁷Man làá pɔ̄ɔkì Eejipiti yab pɔbiliŋ bí kɔ́ dimɔɔlin kí jà ni-boon. M làá dàkà Faaroo nì u-janjaliibi kɔkɔ nì u-janjatɔrɔkub, nì u-janjaliibi bitanjakaliibi m-nyooti.

¹⁸M làá dī Faaroo nì u-janjatɔrɔkub nì u-janjaliibi bitanjakaliibi pu kí dàkà m-nyooti. Niin ní Eejipiti yab làá béé yii man di sá ni-Dindaan.»

¹⁹Unimbɔti tuuŋŋu ŋun nìn līī Isirayeel yab nyɔkɔpuee gítì bi-boon. Míǹ mbaantiim ní ditagbancancaal din nìn līī bi-nyɔkɔpuee mun gítì bi-boon.

²⁰Di nìn cūtìi yúl̀ ki pītì Eejipiti yab kitil nì Isirayeel yab kitil kansikin. Eejipiti yab jandi púee, ditagbancancaalee nìn sá dibɔmbɔndi, ama ní Isirayeel yab jandi púee, di nìn ŋmíntí kunyeeu. An puee Eejipiti yab nì Isirayeel yab kaa nìn ŋūǹ kí sútí kí pìl̄ tɔb kunyeeu gbanti kɔkɔ.

²¹Mooyiisi nìn tāntì u-ŋal dimɔɔl pu. Ti-Dindaan nìn yāntì kubuŋu kubɔ nyánní ŋwìiń nyalaŋki pú ki jítì mpɔn kunyamɔŋu ní ki téé dimɔɔl nyim. Dimɔɔl nìn cúu búkutì mili ní nsan dōoǹ ki kūń.

²²Isirayeel yab nìn cōom̀ ki jítì dimɔɔl kansikin ŋkulimmi[34], ní nnyim gāā aguŋkpaan bi-ŋaŋgiil pú nì bi-ŋaŋgan pú.

²³Eejipiti yab nìn páaǹ bi-boon. Faaroo taamui nì u-janjatɔrɔkub nì bitanjakaliibi kɔkɔ nìn kɔ́ dimɔɔlin ki dī-bi.

²⁴Ntaafaabɔmbɔmee ní ti-Dindaan un bí ditagbancancaal nì ŋŋmi poonee kpēē Eejipiti yab kitil pú, ní ki yāntì fìkil fikil kɔ́-bi.

²⁵U nìn yāntì Eejipiti yab tɔrɔkub taaŋi kpàl̄ ki pɔ́ɔkì ní disaŋkindi ŋá-bi digìńdi. Ní bi bí yii: «Tí sām̀maan Isirayeel yab, kun puee bi-Dindaan kútì bi-pu bi bíi jáà nì ti!»

²⁶Ní ti-Dindaan bí Mooyiisi yii: «Tàntī a-ŋal dimɔɔl pu nnyim ń fàtīí gítiń kí bìin̄ Eejipiti yab nì bi-janjatɔrɔkub nì bi-janjaliibi bitanjakaliibi pu.»

²⁷Mooyiisi nìn tāntì u-ŋal dimɔɔl pu. Kutaa tóob́ diwuntilee ní dimɔɔl fātìi gítì di nín nìn pée bí puee. Eejipiti yab bàà bí yii bí sāǹ ní ki dūu kɔ́ nnyimin, ní ti-Dindaan téé bi-kɔkɔ ki múĺ dimɔɔl kansikin.

²⁸Nnyim nìn fātìi gítìń ki bīiǹ Faaroo janjatɔrɔkub nì u-janjaliibi bitanjakaliibi kɔkɔ pu. Bin kɔkɔ nìn pée kɔ́ dimɔɔlin ki bíi jì Isirayeel yabee, ubambaanti kaa nìn ŋmátì.

²⁹Ama Isirayeel yab nìn cōom̀ ŋkulimmi dimɔɔl kansikin, ní nnyim gāā aguŋkpaan bi-ŋaŋgiil pú nì bi-ŋaŋgan pú.

³⁰Míǹ ní ti-Dindaan nìn dī ki nyántì Isirayeel yab Eejipiti yab ŋaan ŋwiin gbanti. Isirayeel yab nìn wāĺ Eejipiti yab nín kpíì ki dɔ̄ dɔ̄ dimɔɔgbandee.

³¹Isirayeel yab nín nìn ká mpɔn ŋun ti-Dindaan nìn dàkā Eejipiti yabee ní bi fāŋkì-u, ní ki dū bi-mákal ki ŋá u nì u-tɔntɔnliu Mooyiisi pu.