Read Ntcham Exode 15 Bible Online

Exode 15 - Ntcham bible

Exode 15

¹Niinee ní Mooyiisi nì Isirayeel yab gāā nlan nee ki pàkā ti-Dindaan yii[35]: «M làá gāā nlan kí pàkà ti-Dindaan, kun puee u dàkā u nín sá ukpaan puee. U téé itaamu nì bitanjakaliibi ki tɔ́ dimɔɔlin.

²Ti-Dindaan di sá man pɔŋŋu, úǹ ní m làá nīn gà ilan ki nyɔ́ŋkí. Úǹ di fīī-mi[36], úǹ di sá m-Nimbɔtiu, m làá nīn nyɔ́ŋkí-u. Úǹ di sá m-baa Nimbɔtiu, m làá yòon̄ u-yindi yilpu.

³Ti-Dindaan di sá ubaatandaan, u-yindi di sá ti-Dindaan.»

⁴«U dū Faaroo janjatɔrɔkub nì u-janjaliibi ki tɔ́ dimɔɔlin. U-janjaliibi bimɔmmɔntiibi gbíntì Tikati mɔɔlin.

⁵Nnyim bīiǹ bi-pu, bi sīntì nnyim taapu kii ditaŋkpalee.»

⁶«Ti-Dindaan, a-ŋaŋgiil cáá mpɔŋkpaan, ŋúǹ di nàantí a-nannanliibi.

⁷A lafun sá ukpaaneeee! A lábitì a-nannanliibi ki cìb̄. A yaa gíí diŋuulee, a náań nì ŋŋmi ní, ní ki wù a-nannanliibi kii timoolee.

⁸Kubuŋu kun nyēeń a-maŋfataabuŋyinee yāntì nnyim kóoǹ ki kpáfì. Nnyinjil yáatì ki yúl̀ kii digundee, nnyim min bí taapuee fōō ki pɔ́ɔkì dimɔɔl kansikin.

⁹Binannanliibi nìn lī yii: <Ti làá jà bi-boon kí tin cúú-bi, kí yàkatī ti nín jáń ki fōō tin bi-ceeyee, ní kí nīn kíǹ ki cáá tikpil an lákatí. Ti làá fúutí ti-tàataajimmu ní kí pɔ̄ɔkiǹ-bi.>

¹⁰Ama ní sii ti-Dindaan púfì ní mmɔɔnyim bīiǹ bi-pu. An cáá-bi ki sīntì taapu nnyim poon poon kii tikúbɔnee.

¹¹Óo ti-Dindaan, inimbɔti kansikinee, ŋma di bí kii sii? Ŋma di bí kii sii ki bí circir ki jìl̀ yéè? A sá un tūǹ atuŋkpaanee ki máaǹ inyɔŋki, a ŋáań maamaacib!

¹²A tāntì a-ŋaŋgiil ní kitiŋ dū-bi ki náĺ.

¹³A dū a-neendi ki fōō a-nibul ki líì. A dū a-pɔŋŋu ki kpōotì-bi ki cáa cáǹ circir tiŋki kin a cúú ki síiǹ-bee.

¹⁴Anibul gbìl̄ an bɔti ní tifaandi cúú-bi, ní Fiiliistii yab pɔbiliŋ bíil̀.

¹⁵Ijawaan kɔ́ Eedoom tiŋki bɔtiibi, Moowaab janjaliibi fāŋkì yɔ́kɔ́ yɔkɔ, ní Kanaan yab wunti kpíì.

¹⁶Dinyoondi nì tifaandi cúú-bi! Bi nín ká a-ŋampɔŋŋu ŋun a dūu jòoń-tee ní bi ŋmíl̀ fɔ́ŋfɔŋ kii ditaŋkpalee, áli a-nibul dāa jítì ki dóò, ti-Dindaan, dinibul din ní a dée.

¹⁷A cáǹ-bi a-jool din sá a-fakalee pu kí dū-bi kí kàan̄ niin. A bɔ́ntì mpaan kí nīn kóò niin, ti-Dindaan, Circir kɔŋkooŋŋu ŋun sii ti-Dindaan dū a-ŋalii ki máńee.

¹⁸Ti-Dindaan, sii di sá ubɔti kí nīn pée cáa cá jaanjaan!»

¹⁹Faaroo taamui nì u-janjatɔrɔkub nì u-tanjakaliibi nín kɔ́ dimɔɔlinee, ti-Dindaan nìn yāntì mmɔɔnyim bīiǹ bi-pu. Ama ní Isirayeel yab bíǹ dūtì dimɔɔl ŋkulimmi.

²⁰Niinee Aarɔn niisal Miiriyam un sá Unimbɔti bɔnaatiliuee yōoǹ kigaŋgaŋ, ní binimpoobi kɔkɔ mun dɔ́miń ki kútì u-pu nì bi-gaŋgammu ki bɔ̀ɔ́ ki ŋōō.

²¹Binimpoobee yaa bíi gà ilanee ní Miiriyam ń kíí-bi yii: «Gāāmaan ilan kí nyɔ̄ŋkì ti-Dindaan, kun puee u dàkā u nín sá ukpaan puee. U téé itaamu nì bitanjakaliibi ki múĺ dimɔɔlin.»

²²Mooyiisi yōoǹ Isirayeel yab bi yíkì Tikati mɔɔl ki túĺ Suur teeku watil. Bi cōom̀ iwiin ita kuteeun kaa ká nnyim kí nyɔ̀.

²³Bi nìn bàn̄ Maara ki ká nnyim, ama kaa ŋúń ki nyùn̄-mì, kun puee mi nìn tū. An pu ní bi kíǹ ki yíì niin yii Maara, taapu di sá yii <ntuntun>.

²⁴Ní samaa kɔkɔ kíĺ ki bíi wòoǹ Mooyiisi ki lì yii: «Ba ní ti làá nyɔ̀?»

²⁵Ní Mooyiisi kúuǹ ki yíiń ti-Dindaan ní úǹ dàkā-u ndɔ ŋubɔ u dūu tɔ́ nnyimin ní mi mɔ́ɔkì. Niin ní ti-Dindaan nìn tīī Isirayeel yab marab nì akoobil, niin mun ní u nìn tí cɔ́ŋkì-bi.

²⁶U nìn bí-bi yii: «Ni yaa pílifí man ni-Dindaan ni-Nimbɔtiu nín sòoǹ puee mmɔntiim, ki ŋáań tin bí deedee m-nimbiinee, ki yaa gbìl̄ m-marab ki ŋúb́ akoobil kɔkɔee, maa làá yàntī iween in m nìn dūu tɔ́ Eejipiti yab puee ń gbēē-ni. Di sá yii man di sá ni-Dindaan un cāantí-nee.»

²⁷Isirayeel yab dūu bàn̄ Eeliim tiŋkin. Inyimbul saalaa nì ili nì ibafi imuŋku ita nì saalaa nìn bí niin. Ní bi kàl̄ ki kɔ́ĺ inyimbulee.