Read Ntcham Exode 16 Bible Online

Exode 16 - Ntcham bible

Exode 16

¹Isirayeel yab kɔkɔ yíkì Eeliim tiŋkin ní ki bàn̄ Siini teeku kun bí Eeliim nì Siinaayi kansikinee. Isirayeel yab nín nyáń Eejipiti tiŋkin uŋmaliliiti iwiin saalku dalee ní bi bàn̄ Siini teekun.

²Kuteeun niinee ní Isirayeel yab kɔkɔ bíi wòoǹ Mooyiisi nì Aarɔn.

³Bi nìn bí-bi yii: «Ba pu ní ti-Dindaan kaa yāntì ti kpíì ŋyunti ŋun ti nìn bí Eejipiti ki kā ki kɔ́ĺ anaŋkumboon ki jīǹ tijin ki díkèe. Ama ní ni yōoǹní samaa nee kɔkɔ ki cáań kuteeun ŋkùm ń kpɔ̀-bi!»

⁴Ní ti-Dindaan bí Mooyiisi yii: «M làá tīī-ni tijin tin làá nīn nyēeń yilpu ki lítí kitiŋ kii utaa nín nì puee[37]. Kutaa kamaayee binib làá nīn fà min làá ŋmàntī-bi ŋwiin ŋubɔ jītamee ní. M là kí cɔ̄ŋkì-ni kí kpèè yii ni làá nīn tɔ́ m-marabaaa, naa làá nīn tɔ́-bi.

⁵Iwiin iluu dal, ni yaa láa fāā ki tɔ́kɔǹee, án làá bùtī mili pu kí jītíǹ ni nín kpààa fà pu ŋwiin kamaayee.»

⁶Ní Mooyiisi nì Aarɔn bí Isirayeel yab kɔkɔ yii: «Díǹ kujoou nee ní ni làá béé yii ti-Dindaan di nyántìń-ni Eejipiti tiŋkin.

⁷Fool kutaafaauee, ni làá fu ká u-nyooti, kun puee ti-Dindaan gbìl̄ ni nín bíi gbùkum̄ puee. Ní taa dàkafì yii timbi ní ni wòoǹ. Timbi di sá bilab ní ni wòoǹ-ti?»

⁸Mooyiisi gíti bí-bi yii: «Ti-Dindaan làá tīī-ni kujoou nee tinan ní ŋmɔ́, ní kutaafaauee ú fu tīī-ni tijin ní jī kí díkí, kun puee u gbìl̄ ni-gbukumii pu. Ní taa dàkafì yii timbi pu ní ni gbùkum̄. Timbi kaa pée sá tiba, an sá ti-Dindaan pu ní ni bíi gbùkum̄.»

⁹Ní Mooyiisi bí Aarɔn yii: «Tùkù Isirayeel samaau kɔkɔ bí sútiń kí dāan̄ ti-Dindaan nimbiin, kun puee u gbìl̄ bi-gbukumii pu.»

¹⁰Ŋyunti ŋun Aarɔn fōō dinyɔɔbundi ki bíi sòoǹ nì bee, ní bi fātì bi-nimbiin ki túĺ kuteeu pú. Dicilpu kpalaayee ní ti-Dindaan nyooti cílìń bi-pu ditagbancancaal poon.

¹¹Ní ti-Dindaan bí Mooyiisi yii:

¹²«M gbìl̄ Isirayeel yab gbukumii pu. An puee tùkù-bi yii: <Kujoou nee, ni làá ŋmɔ́ tinan kí báĺ, ní fool kutaafaauee, ní fu jī tijin kí díkí ní kí béé yii man di sá ni-Dindaan ni-Nimbɔtiu.>»

¹³Kujoouee ní inoon iba, i bí kii njikpacimamuee dɔ́miń[38] ki kpátìi gbí Isirayeel yab kaaŋu pu, ní kutaafaauee dimalindi bīiǹ bi-kaaŋu boon ki māntìi tú.

¹⁴Dimalindee nín fóotèe ní mbilimu mbilimu mubɔ dōoǹ ki pīiǹ ki kpátìi gbí an kɔkɔ.

¹⁵Isirayeel yab kée kaa nyí kun an sée, ní ki bàlifī tɔb yii: «Ba wanti dee ní?» Ní Mooyiisi kíí-bi yii: «Tijin tin ti-Dindaan tīī-ni ní jēe dee[39].

¹⁶Ti-Dindaan nín yóoǹ mara uŋyee sèé: <Ní fāā min unil kamaa ŋūǹ kí jēe. Báà ŋma ń fāā u-cindin niliu kamaa yil pu disambil diba kí sāā u-nib nyɔkɔm.>»

¹⁷Isirayeel yab nìn ŋá míǹ. Biba nìn fāā tikpil ki lákatì ní biba mun fāā fiii an kaa bàn̄.

¹⁸Ní bi dū disambilee ki ŋmāntì báà ŋma jinti, ní un fāā tikpilee kaa ká tiba ki páaǹ, ní un fāā fiiiyee kaa lóò tiba[40]. Báà ŋma nìn pée ká min làá ŋmàntī ú jēe ní.

¹⁹Mooyiisi bí-bi yii: «Ubɔ ń taa kíń tijin kí kpāafì fool kutaafaau pu.»

²⁰Ama biba kaa nìn pílifì Mooyiisi nín nìn lī puee, ní ki kíǹ tijin ki kpáafì kutaa wúntì. Ku wúntèe ní an sūū ki ŋá akoosibil. Niinee ní Mooyiisi fōō diŋuul bi-pu.

²¹Kutaafaau sá kamaayee, báà ŋma nìn fà min làá ŋmàntī ú jēe ní. Ŋwìiń yaa nìn píĺee ní un kíǹee ń dùntī.

²²Iwiin iluu dalee ní bí fāā bi nín nìn kpààa pée fà puee mili pu, unil kamaa yil puee asambil ali. Ní Isirayeel yab kpilib dɔ́miń ki tùkū Mooyiisi an bɔti.

²³Ní Mooyiisi bí-bi yii: «Ti-Dindaan nín yóoǹ mara uŋyee dee. Fool fu sá ŋwiŋŋuŋfikaa ní, ŋwiin ŋun sá ti-Dindaan wiiŋŋuee[41]. Ní ŋàan̄ tin ni làá ŋàan̄ee, kí tɔ́kɔń tin ni làá tɔ́kɔńee. Tin yaa kíǹee, ní dūú kpāafì kí yóoń fool kutaafaau pu.»

²⁴Ní bi bɔ́ntì tijin ki yóoǹ fool pu, kii Mooyiisi nín bí yii bí ŋá puee. Ku wúntèe an kaa sūūyaaa, akoosibil mun kaa kɔ́.

²⁵Ní Mooyiisi bí-bi yii: «Jīmaan tijin tin ni fu ŋá foolee díǹ, kun puee díǹ di sá ŋwiŋŋuŋfikaa ki tīī ti-Dindaan. Ni yaa nyáń mmɔŋki díǹ, naa làá ká báà tiba dɔ̄.

²⁶Ni làá nīn pée fà tijin míǹ ní iwiin iluu, see ŋwinluluúti ŋun sá ŋwiŋŋuŋfikaayee dal baba ní naa làá ká tiba ki fāā.»

²⁷Nì míǹ kɔkɔee, Isirayeel yab kansikin biba nìn nyáń ŋwinluluúti dal kí bàà tí cùú fāā ní kaa ká.

²⁸Ní ti-Dindaan bí Mooyiisi yii: «Ni làá nīn pée yíití m-marab nì m-dàkatam yéè kí tin cáá sāā ŋyunti ŋulɔŋu ní?

²⁹Ní béé yii m tīī-ni ŋwiŋŋuŋfikaa ní dūú kàl̄ kí ŋùŋfì ní. An pu ní m tìì-ni iwiin iluu dal iwiin ili jinti, án nín làá ŋá pu winluli dalee, báà ŋma ń nīn kā u-dumpu kí taa nyā kí cù laabee.»

³⁰Ní Isirayeel yab kíǹ ki kàal̀ ŋwinluluúti dal ki ŋùŋfī.

³¹Isirayeel yab nìn pú tijin gbanti diyindi yii maana. U nìn bí mbilimu mbilimu ki pīiǹ, ní ki mɔ̄ kii tisiil kalaauee.

³²Ní Mooyiisi bí yii: «Kpèèmaan ti-Dindaan nín lī puee sèé yii: <Ní lēē tijinee disambil diba kí kpāafì kí dāá nīn cáa dàkà ni-naantiibi bi mun ń ká ti-Dindaan nín nìn nyántìń-ni Eejipitee tijin tin u nìn cáa kpīintí-ni kuteeunee.>»

³³Ní Mooyiisi bí Aarɔn yii: «Fāā tijinee disambil diba kí ŋá diboolin ki cáá yóoń ti-Dindaan nimbiin, kí kpāafì-tì ni-naantiibi mun ń dāá yīkìí ká[42].»

³⁴Kii ti-Dindaan nín nìn bí Mooyiisi ń ŋá puee, Aarɔn nìn cáá tijinee nì dibool ki yóoǹ ti-Dindaan Poondi daaŋku[43] nimbiin án ŋmā kí nīn bí ki téetí-bi.

³⁵Isirayeel yab nìn jíń tijin gbanti míǹ ní abin imuŋku ili, áli ki tin kɔ́ kitiŋ kin binib kóòyee. An dàkà yii bi pée jíń tijin gbanti míǹ ní ki tin bàn̄ Kanaan tiŋki kpaanyɔkɔ[44].

³⁶Bi-sambil din bi nìn cáa ŋmàntī tijinee saalaa di sá bi-gɔŋgɔŋwu.