Read Ntcham Exode 17 Bible Online

Exode 17 - Ntcham bible

Exode 17

¹Isirayeel yab kɔkɔ yíkì Siini teekunee ní ki búntì, kii ti-Dindaan u-ba nín nìn bɔ́ntì bi-saŋkindi bí còom̀ puee. Bi bàn̄ Reefiidiimee ní ki kāl̀ niin, ama nnyim nìn kpá bí nyɔ̀.

²Niinee ní bi bíi nyàab̀ Mooyiisi kujaau ki lì-u yii: «Tīī-ti nnyim tí nyɔ̀!» Ní Mooyiisi bí-bi yii: «Ba pu ní ni nyàab̀-mi kujaau? Ba pu ní ni cɔ́ŋkí ti-Dindaan?»

³Nnyinnyoo nìn gbìl̄ Isirayeel yab ní bi bíi wòoǹ Mooyiisi yii: «Ba pu ní a yōoǹní-ti Eejipiti tiŋkin ní? A là nnyinnyoo ń kpɔ̀ ti nì ti-biyaamu nì ti-waŋkuti níii?»

⁴Ní Mooyiisi kúuǹ ki yíiń ti-Dindaan ki lī yii: «M làá nín ŋá dinibul nee mana dee? An kíǹ fiii bí yāŋkì-mi ataŋkpee kí kpɔ̀.»

⁵Ní ti-Dindaan bí Mooyiisi yii: «Lēē Isirayeel yab kpilib biba, kí yòon̄ a-kpandɔŋu ŋun a nìn dūu fáá dimɔɔlee kí lìntī samaa nyɔkɔpu ní nīn cá.

⁶Man làá cùú yūĺ a-nyɔkɔpu Ooreeb jool pu ditaŋkpal pu. Á fáá ditaŋkpalee ní nnyim ń nyā samaa ń nyɔ̀.» Ní Mooyiisi ŋá min ti-Dindaan tùkū-uee Isirayeel yab kpilib nimbiin.

⁷Ní bi pú niin diyindi yii Maasa nì Meeriiba, an taapu di sá <Icɔŋki> nì <Kujaau>. Di sá yii Isirayeel yab nìn nyàab̄ Mooyiisi kujaau ní ki cɔ́ŋkì ti-Dindaan mun ki lī yii: <Ti-Dindaan kalin bí ti-kansikinaaa, waa bí ní?>

⁸Amaleeki yab dɔ́miń Reefiidiim kí jáǹ Isirayeel yab.

⁹Ní Mooyiisi bí Joosuwa yii: «Lútí bininjab kansikin biba si nì bi ń cùú jáǹ Amaleeki yab. Foolee man làá fu jɔ̄m̀ kí nīn yú kigbantaŋ pu kí nīn ŋúb́ Unimbɔti kpandɔŋu m-ŋaan.»

¹⁰Niinee Joosuwa búntì kí cùú jáǹ Amaleeki yab kii Mooyiisi nín bí yii ú ŋá puee. Ní Mooyiisi nì Aarɔn nì Uur jɔ́m̀ kigbantaŋ yilpu.

¹¹Ŋyunti ŋun ní Mooyiisi yaa yōoǹ u-ŋal yilpuee, Isirayeel yab pɔ̄ɔ̄ ní, ama u-ŋal yaa sīntèe ní Amaleeki yab ń pɔ̄ɔkì.

¹²Mooyiisi ŋalii dāa gīīyee ní Aarɔn nì Uur nyàab̄ ditaŋkpal ki bíl̀ ní u kāl̀. Aarɔn nì Uur nìn ŋúb́ u-ŋalii yilpu, ubɔ nìn bí dijandi diba ní un kíǹee bí dijandi din kíǹee. Míǹ ní Mooyiisi ŋalii nìn bí yilpu áli ŋwìiń dāa dūu jéetì.

¹³Joosuwa nìn dū ntàataajimu ki jáń ki pɔ́ɔkiǹ Amaleeki yab.

¹⁴Ti-Dindaan bí Mooyiisi yii: «Ŋmà tibɔti nee kugbɔŋu poon án nīn bí bí nīn téetí. Tùkù Joosuwa yii m làá kpɔ̀ kí céetí Amaleeki yab, án nín làá ŋá pu báà ubɔ ń taa ti téetí bi-puee[45].»

¹⁵Niinee Mooyiisi máń nsaraafan niin ki pú-ŋu diyindi yii: <Ti-Dindaan di sá man jajil daaŋku>.

¹⁶Ní ki lī yii: «An nín ŋá pu Amaleeki yab yíkìi jáń nì ti-Dindaan beejalee, ti-Dindaan mun làá nīn pée jáà nì bi ní baabadal.»