Read Ntcham Exode 18 Bible Online

Exode 18 - Ntcham bible

Exode 18

¹Mooyiisi coo Jeetroo, Madiyan tiŋki tandaaŋwu gbìl̄ tin kɔkɔ Unimbɔti ŋá ki tīī Mooyiisi nì Isirayeel u-nibulee, ki gbìl̄ min ní ti-Dindaan nyántì Isirayeel yab Eejipiti tiŋkinee.

²Ní Mooyiisi coo Jeetroo yōoǹ Mooyiisi nimpuu Siipoora un u nìn yāntì u dɔ́miń ki bí u-ceeyee,

³nì u-jipɔmbi bilee. Bi nìn yíì ubɔ yii Geersɔm, an taapu di sá yii <Unicaan niin>, di sá u lī yii: <M sáǹ ki kpántì unicaan kinicantiŋ poon[46].>

⁴Bi nìn yíì un kíǹee yii Eeliyeeseer, an taapu di sá yii <M-Nimbɔtiu di jòoń-mi>, di sá u lī yii: <M-baa Nimbɔtiu di jòoń-mi ní ki fīī-mi Faaroo ŋaan ki líì.>

⁵Mooyiisi coo Jeetroo nì Mooyiisi nimpuu nì u-jipɔmbi bāań ki ká-u kuteeun, Unimbɔti jool caŋin, laakin u nìn ŋātì ŋkaa ki kēe.

⁶Ní u tú bí tùkù Mooyiisi yii: <Man di sá a-coo Jeetroo. M cáań a-nimpuu nì a-jipɔmbi liitil tí dāá màntì a-pu.>

⁷Ní Mooyiisi túŋkì u-coo ki gbāaǹ u-nimbiin ki jáam̀-u, ní ki yíkìi kpàl̄-u. Bi bālifì tɔb laafiyau pu, ní ki nín kóò Mooyiisi tantiun.

⁸Ní Mooyiisi máafì u-coo min ní ti-Dindaan ŋá Faaroo nì Eejipiti yab Isirayeel yab puee. U nìn máafì-u agìń ŋin kɔkɔ Isirayeel yab nìn ká nsannee, nì ti-Dindaan nín nyántì-bi agìń gbanti poon miŋyee.

⁹Ní Jeetroo bíi fàal̀ tiŋan tin kɔkɔ ti-Dindaan ŋá ki tīī Isirayeel yab, nì u nín nyántì-bi Eejipiti yab yuŋkunee pu.

¹⁰Ní Jeetroo bí yii: «Inyɔŋki sá ki tīī ti-Dindaan un nyántì-ni Eejipiti yab nì Faaroo ŋaanee.

¹¹M béè kɔŋkɔnnee yii ti-Dindaan di sá ukpaan ki jítiǹ inimbɔti kɔkɔ, kun puee u nyántì u-nibul Eejipiti yab ŋaan ŋyunti ŋun bi nìn bí ki ŋáań-bi ntoomee.»

¹²Mooyiisi coo Jeetroo ŋá saraawɔkaa nì mpèé saraabi ki tīī Unimbɔti. Ní Aarɔn nì Isirayeel yab kpilib kɔkɔ dɔ́miń, ní bi nì Mooyiisi coo kpáfì ki jíń tijin Unimbɔti nimbiin.

¹³Kutaa wúntèe Mooyiisi kāl̀ kí sòoǹ binib bɔti, ní samaa dɔ́miń ki yúl̀ kutaafaau áli kujoou Mooyiisi ń ŋmā kí sòoǹ bi-bɔti.

¹⁴U-coo nín ká tin kɔkɔ án sá ú ŋá kí tīī samaayee ní u bí Mooyiisi yii: «Ba ní a bíi ŋáań dinibul nee ní? Ba pu ní a kā a-baba ní dinibul nee yú ki māntìi tú-si, kí yòon̄ kutaafaau kí cáá sāā kujoou míǹ?»

¹⁵Ní Mooyiisi kíí u-coo yii: «Binib nee dòoń m-cee ḿ bàlifì Unimbɔti ń sòoǹ nì bi tin bée ní.

¹⁶Bi yaa tí cáá tɔb tibɔti tibee, ní bí dāan̄ m-cee ní ḿ sòoǹ kí ŋāŋkì bi-kansikin, ní kí dàkà-bi Unimbɔti koobiliŋ nì u-marab nín sá puee.»

¹⁷Ní Mooyiisi coo bí-u yii: «Min a ŋáań nee kaa kítì.

¹⁸A bíi tìì a-ba digìńdi ní ki bíi tìì dinibul din bí a-cee nee mun digìńdi. Ditundi nee nyìm̀ ki jítiǹ a-pɔŋŋu ní aa ŋūǹ kí tɔ̄-dì a-baba!

¹⁹Kɔŋkɔnnee á pīlifì-mi, m làá tīī-si isaŋki ní Unimbɔti ń nīn bí a-cee. An sá yii sii ń fōō samaa yil kí yūĺ Unimbɔti nimbiin ní ki nīn cáǹ tibɔti ki nàatī Unimbɔti a-ba.

²⁰Á dàkà-bi akoobil nì marab, ní kí yàntī bí béé nsan ŋun bi máaǹ kí dēe nì tin bi máaǹ kí ŋée.

²¹Lútí dinibul kansikin biniŋmambi bin fàŋkí Unimbɔti ki bí deedee kaa pɔ̀ gandee, kí dū-bi kí kpántí samaa kpootiliibi. Biba ń nīn sá binib kutuku ubɔ kpootiliibi, biba ń nīn sá binib dilaataal kpootiliibi, biba ń nīn sá binib imuŋku ili nì saalaa kpootiliibi, biba ń nīn sá binib saalaa kpootiliibi[47].

²²Bíǹ di làá nīn sòoǹ dinibul bɔti ŋyunti kamaa. Tibɔti tin yaa jítiǹ-bee, bí cáań-tì a-cee, ní bíǹ ń nīn sòoǹ tibɔti tin kaa pɔ̄ɔ̄yee. Ŋá míǹ kí bàtī a-gìńdi pu ŋwaam bí tūtuǹ-si á túń.

²³A yaa ŋá míǹ ní Unimbɔti yaa tīī-si marabee, a làá ŋmā kí ká mpɔn kí yūĺ ní samaa ń fàtīí kpì nì dipɔɔsɔŋkil.»

²⁴Mooyiisi nìn pílifì u-coo saŋkii ní ki ŋá min kɔkɔ u lēe.

²⁵Mooyiisi kpēē Isirayeel yab kɔkɔ kansikinee ki lēē biniŋmambi ki kāaǹ bí nīn sá samaa kpootiliibi. Biba nìn sá binib kutuku ubɔ kpootiliibi, biba sá binib dilaataal kpootiliibi, biba sá binib imuŋku ili nì saalaa kpootiliibi, biba mun sá binib saalaa kpootiliibi.

²⁶Bikpilibee nìn kíǹ ki bí kutaa sá kamaa ki sòoǹ samaa bɔti. Tin yaa nìn jítiǹ-bee, ní bí cáań Mooyiisi cee, ama ní ki nìn sòoǹ bi-ba tibɔti tin kaa pɔ̄ɔ̄yee.

²⁷Míǹ boonee ní Mooyiisi kāaǹ u-coo Jeetroo, ní u fātìi nín gítí u-tiŋkin.