Read Ntcham Exode 19 Bible Online

Exode 19 - Ntcham bible

Exode 19

¹Isirayeel yab nín nìn nyáń Eejipiti tiŋkinee, iŋmal ita wimpeepeekaaŋu deedee ní bi bàn̄ Siinaayi teekun.

²Bi nìn yíkì Reefiidiim ní ki dūu bàn̄ Siinaayi teekun ki ŋātì ŋkaa niin ki túĺ dijool.

³Ní Mooyiisi dàb̄ dijool ki nín cá Unimbɔti cee. Ti-Dindaan nìn bíń dijoolee yilpu ki yíiń-u ní ki bí-u yii: «Á tùkù Jaakɔb naantiibi Isirayeel yab yii:

⁴<Ni ká tin m ŋá Eejipiti tiŋkee, nì m nín yōoǹ-ni m-feeŋyi pu kii ukaalunee ki cáań-ni m-ceeyee.

⁵Kɔŋkɔnnee ni yaa pílifì m-nyɔkɔ, ki ŋúb́ m-pooŋyee, inifunaan kɔkɔ kansikinee, nimbi di làá nīn sá man m-ba bindi pu nibul. Di sá yii man di yì kitiŋ kɔkɔ.

⁶Ama nimbee, ni làá nīn sá man beelin saraaŋaliibi, ní kí nīn sá ditimbundi din sá man yal ki tūǹ m-tundee[48].> Tibɔti tin a làá cáá nàatī Isirayeel yabee dee.»

⁷Mooyiisi bāańee ní ki yíiń Isirayeel yab kpilib ní ki dū tibɔti tin kɔkɔ ti-Dindaan tùkūń-uee ki bíl̀ bi-nimbiin.

⁸Ní dinibul kɔkɔ kíí yii: «Tin kɔkɔ ti-Dindaan lēe, ti làá ŋá míǹ.» Ní Mooyiisi gíiǹ bi nín kíí puee ki tùkū ti-Dindaan.

⁹Niinee ní ti-Dindaan bí Mooyiisi yii: «Kpèè, m làá dāan̄ a-cee kí nīn kāń ditagbancancaal din gbìfèe poon kí sòoǹ nì si ní dinibul ń nīn gbìl̀ m nín bíi sòoǹ nì see, án nín làá ŋá pu bí nīn cáá a-pu dimákal baabadalee.» Ní Mooyiisi cáá Isirayeel yab nín kíí puee ki tùkū ti-Dindaan.

¹⁰Ní ti-Dindaan bí Mooyiisi yii: «Cù samaa cee kí tùkù-bi yii bí nīn bí circir díǹ nì fool, kí fíntí bi-wampeeŋkaati.

¹¹Bí bɔ́ntí bi-ba kí nīn cí winta dal, di sá yii yaadalee, m làá kpákatiń kí nīn bí Siinaayi jool pu, dinibul kɔkɔ nimbiin.

¹²Á yóoń-bi kikpaanyɔkɔ kí màntīí tū dijool, ní kí tùkù-bi yii: <Ubɔ ń taa dàb̄ dijool, kí taa gbēē di-kpaanceetiŋu.> Un kamaa yaa gbēē-dee làá kpú.

¹³Baa làá gbēē udaan, ama ataŋkpee àá ipiin ní bi làá dūú yāŋkì-u kí kpɔ̀. An yaa sá unilaaa, kuwaŋkuluuaaa, udaan ń taa ŋmátí. Bi yaa láa búń ŋyin baba ní biba dāa ŋūǹ kí jɔ̄m̀ dijool[49].»

¹⁴Mooyiisi kpákatìń dijool puee ní ki yāntì samaa kɔkɔ bɔ́ntì ki bí circir, ní ki fíntì bi-wampeeŋkaati.

¹⁵Míǹ boonee ní u bí samaa yii: «Ní bɔ́ntí, iwiin ita nee poonee, ubɔ ń taa gbēē unimpu.»

¹⁶Winta dal kutaafaauee ní ditagbancancaal din gbìfèe dɔ́miń ki yúl̀ dijool pu, ní utaa bí ki tátí ki ŋmóò[50] dijoolee pu. Bi nìn gbìl̀ ŋyin búǹ ki pɔ̄ɔ̄ kpaŋkpam. Tifaandi nìn kɔ́ samaa kɔkɔ dinaapaal pu ní bi-wunti jìkì.

¹⁷Mooyiisi nyántì samaa kɔkɔ dinaapaal pu bí cù Unimbɔti nimbiin, ní bi bàn̄ ki yúl̀ dijool taapu.

¹⁸Siinaayi jool kɔkɔ nìn kpántì ŋŋminyiim ŋma ní, kun puee ti-Dindaan nìn kpákatìń ŋŋmi poon. Ŋŋminyiimee nìn nyēē ki jɔ́ḿ kii kipaai ŋminyiimee, ní dijool kɔkɔ nìn cīŋkì tiŋan tiŋan.

¹⁹Ní ŋyinee mɔ̀tīi búǹ ki pɔ̄ɔ̄ kpaŋkpam. Mooyiisi nìn sòoǹ ní Unimbɔti kíikí-u mpɔn itaatantati poon.

²⁰Míǹ ní ti-Dindaan nìn kpákatìń Siinaayi jool yilpu kúnti kunti, ní ki yíiń Mooyiisi u jɔ́m̀ u-cee niin.

²¹Ti-Dindaan nìn bí Mooyiisi yii: «Kpákatí kí cù samaa cee kí tùkù-bi yii bí taa ŋá kìrikiri yii bi là kí wāl̀-mi, án yaa sá fám, bi-kansikin binib tikpil làá kpú.

²²Bisaraaŋaliibi bin làá sútiń kí pìl̄-mee gba ń bɔ́ntí bi-ba kí nīn bí circir, án yaa sá fám, m làá kpɔ̀-bi.»

²³Ní Mooyiisi bí ti-Dindaan yii: «Samaa kaa ŋūǹ kí jɔ̄m̀ Siinaayi jool pu, kun puee a yóoǹ-ti mara yii tí yóoń kikpaanyɔkɔ kí màntīí tū dijool ní samaa ń nīn yúń kudandaŋu.»

²⁴Niinee ní ti-Dindaan bí Mooyiisi yii: «Kpákatí, si nì Aarɔn ń fàtīí jɔ̄mìń. Ama bisaraaŋaliibi nì samaayee ń taa ŋá kìrikiri yii bí làá jɔ̄mìń man cee, án nín làá ŋá pu bí taa kpúee.»

²⁵Ní Mooyiisi kpákatìń samaa cee, ní ki dū an bɔtee ki tùkū-bi.