Read Ntcham Exode 2 Bible Online

Exode 2 - Ntcham bible

Exode 2

¹Uninja ubɔ nìn sá Leefii naakookun ní ki fātìi cáá unimpu Leefii naakookun.

²Unimpuee nìn cáá dipool ní ki màl̄ kibininjabiki. U nìn ká yii kibikee ŋān̄ tikpil ní u dū-kì ki bál̀ áli iŋmal ita[5].

³Ŋyunti ŋun waa nìn gíti ŋūǹ kí yàntī kí nīn gbíntìi kā dibalinee ní u nyàab̄ kikabiki kin bi dū papiirusi[6] ki lùn̄ee, ki dū aŋɔ ki póoń, ki dū kibiki ki tākaǹ poon ní ki cáa nēeǹ dikal taapu dimɔɔgbandi.

⁴Kibikee niisal nìn cūtìi yúní ndan fiii kí kpèè tin làá jītí ki-puee.

⁵Míǹ boonee Faaroo bisal cūtì dimɔɔlin kí fàl̀. Ŋyunti gbantee, binimpoobi bin céeǹ-uee bíi kpàkaǹ dimɔɔl, ní úǹ ká kikabikee nēē dikal taapu, ní u tú u-yumbusapɔɔŋwu ú cùú yòon̄ní.

⁶U cúu púkutèe kibininjabiki di kā poon ki sūǹee. An nìn kɔ́-u falaa ní u bí yii: «Eebru yab biki dee.»

⁷Ní kibikee niisal bālifì Faaroo bisal yii: «Ḿ cù Eebru nimpoobi cee kí nyàabìń-si umatimpɔɔn ú lòò-si kibiki gbantaaa?»

⁸Ní Faaroo bisal kíí-u yii: «Iiin.» Ní kisapɔmbikee cūtìi nyàabìń kibikee ki-ba na.

⁹Ní Faaroo bisal bí unimpuee yii: «Yòon̄ kibiki nee kí lòò-kì kí tīī-mi, m làá dāá pà-si ditundi gbanti pu.» Ní unimpuee yōoǹ kibikee ki lōō.

¹⁰Kibikee dāa wíiǹee ní unimpuee cáań-kì ki tīī Faaroo bisal. Úǹ nìn fōō-kì ki dūu ŋá u-ba biki ní ki pú-kì diyindi yii Mooyiisi. Di sá u bí yii: «Nnyimin ní m nyántìń-kì.»

¹¹Mooyiisi wíiǹee, dalbee ní u cūtì kí màntì u-nabiyaamu Eebru yab pu. U bàn̄ee ki lafun ká atuun ŋin bi tūǹee nín pɔ̄ɔ̄ ki cáá agìń miŋyee. U nìn ká ueejipitija bíi gbáà u-nabiki ueebruja ubɔ.

¹²U nín fātìi kpēē ajan kɔkɔ pu kaa ká báà ubɔee, ní u fáá ki kūū ueejipitijee ní ki kūtì dibul ki dū-u ki síb́.

¹³Kutaa wúntì u tí gítì bi-ceeyee ki ká Eebru yab ŋmaniŋma bili bíi jáà. Ní u bí un bɔti kaa ŋān̄ee yii: «Ba pu ní a gbáà a-juti míǹ?»

¹⁴Ní úǹ fātìi kíí-u yii: «Ŋma di kāaǹ-si á nīn sòoǹ ti-bɔti ní? Àá a là kí kpɔ̀ ma mun kii a nín fu kūū ueejipitija puee ní?»

¹⁵Mooyiisi nín béè yii an bɔtee gbītì an kɔkɔee ní u fāŋkì. Faaroo gbìl̄ tin jítèe ní ki bíi nyàab̀ kí kpɔ̀ Mooyiisi. Ní Mooyiisi sáǹ ki cūtìi kóòń Madiyan yab tiŋkin, ki kā ki kɔ́ĺ lɔkɔ ubɔ[7].

¹⁶Madiyan tiŋki tandaaŋwu nìn cáá bisapɔmbi biluli. Bi nìn dɔ́miń kí lúń nnyim kí sìtī laakin tiwaŋkuti nyùee kí nyùntī bi-baa piii nì u-ŋoobui.

¹⁷Ama ní bipikpaaliibi dɔ́miń ki jìn̄-bi. Ní Mooyiisi yíkì ki mɔ́tì bi-pu ní ki lúń nnyim ki tīī bi-waŋkuti nyùn̄.

¹⁸Bi fātìi bàn̄ mmɔŋki bi-baa Reewuyeel ceeyee ní úǹ bālifì-bi yii: «Ba ŋá ní ni fātìń mmɔŋki díǹ malaa míǹ?»

¹⁹Ní bi kíí-u yii: «Ueejipitija ubɔ di fīī-ti bipikpaaliibi ŋaan ní ki lúń nnyim ki nyūntì ti-waŋkuti.»

²⁰Ní bi-baa bālifì-bi yii: «Uninja gbanti bí la? Ba ŋá ní naa cáań-u? Cùú yíiḿmaan-u ú dāan̄ kí jī tijin.»

²¹Ní Mooyiisi lēē yii u làá nīn kíǹ ki kóò uninja gbanti cee. Ní uninjee dū u-bisal Seefoora ki pú Mooyiisi cáá.

²²Unimpuee màl̄-u kibininjabiki, ní u pú-kì diyindi yii Geersɔm, an taapu di sá yii <Unicaan niin>, di sá u bí yii u sáǹ ki kpántì unicaan kinicantiŋ poon.

²³An yúntì boonee ní Eejipiti bɔtiu dāa kpíì. Isirayeel yab nìn bí ki fátí diniindi bi-yuŋku poon ki gbáà ibiil, ní bi-kuŋkuuntii bàn̄ áli Unimbɔti cee.

²⁴Unimbɔti nìn gbìl̄ bi-yaliŋkii pu ní ki téetì u nín nìn pūtì ki pōoǹ Abraam nì Isaaki nì Jaakɔb puee[8].

²⁵Unimbɔti nìn kpēē Isirayeel yab falaau ní ki súń bi-saai.