Read Ntcham Exode 21 Bible Online

Exode 21 - Ntcham bible

Exode 21

¹Ní ti-Dindaan gíti kútì ki lī yii: «Marab bin a làá yóoń Isirayeel yabee sèé.

²Ni yaa làá dāá dā uyumbu ní u sá ueebrujee, ú dāá dū abin aluu kí tɔ̄ ditundi kí tīī-ni, dibinluluútiilee ní yàntī ú nyā kí tɔ̄ u-ba, kí taa pà báà tiba.

³U yaa nìn sá ujaakpaati ní ni dá-u ú nīn tūǹ-ni ditundee, ú fàtīí nyā u-baba. U yaa nìn cáá unimpuee, ú nyā kí kpáaǹ u-nimpuu.

⁴An yaa sá u-kpiliu di cáá unimpu ki tīī-u ní unimpuee màl̄-u mbininjabiyaamu àá nnimpubiyaamuee, u-kpiliu di yì unimpu nì mbiyaamu, uyumbuee ń nyā u-baba.

⁵Ama uyumbuee yaa bí yii: <M néeń m-kpiliu nì m-nimpuu nì m-biyaamu, maa làá nyā kí nīn tɔ́ m-ba,>

⁶niinee ní u-kpiliu ń cùnnì-u Unimbɔti nimbiin. Ú sútí-u kí pìl̄ kudii punyɔkɔki ní kí dū u-tafal kí nákáǹ punuu àá ndɔ ŋun pu punuu nákée ní kí dū mpiin kí sāā kí cíĺ u-tafal, ní ú kpántí u-yumbuu kí nīn cáa cá jaanjaan[63].

⁷«Ubɔ yaa dū u-bisal ki nyáfì ú nīn sá uyumbuee, úǹ kaa làá nyā kí tɔ̄ u-ba kii bininjab nín bí puee.

⁸Usapɔɔnee bɔti yaa kaa fáatì u-kpiliu ú dū-u kí kpántí u-nimpuuee, u-yab ń pà kí fàtīí fōō-u. U-kpiliuee kaa cáá nsan kí dū-u kí nyāfiǹ uniyaŋyan. U yaa ŋá mimmee, u nyáń usapɔɔnee boon.

⁹U yaa dá-u ki tīī u-jipɔɔn cááyee, ú ŋá kii mara nín lī yii bí ŋá bisapɔmbi puee.

¹⁰Boonee u yaa láa fātìi cáá unimpuliliitee, ú taa láa bàtī unimpukpiki nín cáá nsan kí fōō tiŋyee báà tiba pu, an dàkà yii tijin jandi nì tiwampeeŋkaal jandi nì uninja nì unimpu dooŋu jandi.

¹¹U yaa yíì kaa bíi ŋáań tiwan tita nee ki tìì-uee, unimpuee cáá nsan kí nyā kí tɔ̄ u-ba kí taa pà báà tiba.»

¹²«Un di yaa fáá ki kūū u-jutee, bí kpɔ̀ udaan[64].

¹³U yaa kaa píĺ-u ki yóoǹ ní an sá yìkíl̄ yikil ní udaan dūu dīntiǹ-uee, m làá lēē mpaan ŋubɔ ŋun poon ní u làá sāǹ kí cùú báĺee[65].

¹⁴Ama un di yaa nyí ní ki ŋá nciin ki kūū u-jutee, báà udaan yaa sáǹ ki cūtìi kɔ́ m-saraafaŋŋu, ní nyāntí-u kí kpɔ̀-u[66].

¹⁵«Un di yaa fáá u-baa àá u-nee, bí kpɔ̀-u.

¹⁶«Un di yaa yùn̄ unil ki nyáfì àá u bí u-ceeyee, bí kpɔ̀-u[67].

¹⁷«Un di yaa sīī u-baa àá u-nee, bí kpɔ̀-u[68].»

¹⁸«Binib bili di yaa bíi jáà ní ubɔ fáá u-juti àá u yá-u ditaŋkpal ní u fōō tiweendi kaa kpíìyee,

¹⁹u yaa láa yíkì ki ŋūǹ kí nyīī ŋkpandɔ kí nyā mmɔŋki kí còom̀ee, un fáá-u ní u fōō tiweendee nyáń tibɔtin. Ama an sá ú pà u-juti tundi din u bàà làá tɔ̄ an gbēeǹee pu, ní kí cáaǹ-u ú pɔ̄ɔkì kɔkɔ.

²⁰«Ukpil un di yaa dū ndɔ ki gbáń u-yumbuu uninja àá unimpu ní u kpíì u-ŋaanee, bí tɔ̀-u ipɔntoon.

²¹Ama ŋwiin ŋubɔ àá ili boon ní u yaa kpíìyee, bí taa tɔ̀-u ipɔntoon, kun puee u-kpiliu dū u-nimbiliŋ ní ki dá-u.

²²«Bininjab yaa bíi jáà ní ki cūtìi bìl̄ upɔdaan ní u màl̄ dikáal tiba kaa ŋá-uee, u-cal ń gíí dipɔndi ní un ŋá mimmee ń pà kí nóó nì bibɔsoonliibi nín sòon̄ ki síiǹ puee.

²³Ama an yaa ŋá míǹ ní unimpuee kpíìyee, see bí kpɔ̀ un ŋá mimmee kí téeǹ.

²⁴Ubɔ yaa lēē u-juti nimbilee, bí lēē u mun yal. Ubɔ yaa lēē u-juti nyindee, bí lēē u mun yal. Ubɔ yaa gūutì u-juti ŋalee, bí gùutī u mun yɔŋu. Ubɔ yaa gūutì u-juti taalee, bí gùutī u mun yal.

²⁵Ubɔ yaa wùn̄ u-juti ŋŋmee, bí wà u mun ŋŋmi. Ubɔ yaa gbáń ki léetì u-juti wuntee, bí gbá kí léetí u mun yati. Ubɔ yaa ŋá u-juti tiweendee, bí ŋá u mun tiweendi[69].

²⁶«Ukpil un di yaa fáá u-yumbuu uninja àá unimpu nimbil ní di kpíìyee, ú gíiǹ-u kí líí ú tɔ̄ u-ba. Uyumbuee ń taa pà báà tiba dinimbil din kpíìyee pu.

²⁷An yaa ti sá u-yumbuu uninja àá unimpu nyindi ní u gbáń ki lēēyee, ú gíiǹ-u kí líí ú tɔ̄ u-ba. Uyumbuee ń taa pà báà tiba bi nín gbáń-u dinyindi din lēēyee pu.

²⁸«Unaa di yaa gūū ki kūū uninja àá unimpuee, bí yāŋkì unaayee ataŋkpee kí kpɔ̀. Bí taa ŋmɔ́ unaayee nanti, ama ní kí taa ŋá unaa daan tiba.

²⁹An yaa sá yii unaayee pée gùutī binib míǹ, ní bi tùkū u-dindaan ki kpáafì-u ní waa kpēē-u tiŋan ní u gūū ki kūū uninja àá unimpuee, bí yāŋkì-u ataŋkpee kí kpɔ̀, ní kí kpɔ̀ u-dindaan mun.

³⁰Bi yaa gíí udaan dipɔndi ú pà kí dā u-maŋfalee, ú pà kunimbiŋmiiu kun bi gíí-uee kɔkɔ.

³¹An yaa sá kinaacimpɔmbiki àá kisapɔmbiki ní unaa gūū ki kūūyee, bí nóó mara gbanti ubaanti.

³²Unaa yaa gūū uyumbu uninja àá unimpuee, unaayee dindaan ń pà animbil jitɔmbi mmuŋku nì saalaa kí tīī uyumbuee kpiliu, ní bí yāŋkì unaayee ataŋkpee kí kpɔ̀.

³³«Ubɔ yaa gbìn̄ dinyimbɔbil ní kaa bīiǹ àá u bīitì kaa gíiǹ ki bīiǹ ní ubɔ naau àá u-maŋki jéetì poonee,

³⁴dinyimbɔbil daan ń pà kuwaŋkuluuee nyampooku nín sá puee, ní kí yòon̄ diwaŋkpil.

³⁵«Ubɔ naau di yaa gūū ki kūū u-juti yɔuee, bí dū unaa un gūū u-jutee kí nyāfì, ní bin yì inaayee liitil ń yàkatī animbil nì unaa un kpíìyee nanti.

³⁶Ama unaayee dindaan yaa nyí yii u-naau pée gùutī míǹ ní kaa kpēē-u tiŋanee, ú nyàab̀ unaa kí téeǹ unaa un kpíìyee yil pu kí yòon̄ dinakpil.»

³⁷«Ubɔ yaa yùn̄ unaa àá upii ki kūū àá ki nyáfèe, ú téeǹ inaa iŋmoo unaa un u yùn̄ee yil pu, ní kí téeǹ ipii inaa upii ubɔ un u yùn̄ee yil pu[70].