Read Ntcham Exode 22 Bible Online

Exode 22 - Ntcham bible

Exode 22

¹«Unaayuu yaa bíi wìil̄ digundi kunyeeu kí kɔ́ kudiin kí yɔ̀ tiwan ní bi yaa fáá ki kūū-uee, un kūū-uee kaa ŋá nnikpaakoon.

²An yaa sá ŋwiimpu ní u bíi ŋáań míǹ ní bi kūū-uee, un kūū-uee ŋá nnikpaakoon. Unaayuu máaǹ kí pà kun u yùn̄ee pu ní. U yaa kaa cáá báà tibee, bí dū-u kí nyāfì kí pà kun u yùn̄ee pu.

³«Ubɔ yaa yùn̄ unaa àá kimaŋ àá upii àá uŋoobu ní bi yaa ká kuwaŋkuluu gbanti unaayuu ŋaan ku dáá wāĺee, unaayuuyee máaǹ kí téeǹ kuwaŋkuluu kun u yùn̄ee mili pu.»

⁴«Ubɔ yaa yāntì u-waŋkuti kɔ́ u-juti saakun, àá u-juti fiinyi kpaabun ki ŋmɔ́ee, ú dāá lēē u-saakun àá u-fiinyi kpaabun subimɔntiŋ kí téeǹ.

⁵«Ubɔ yaa sēē u-kpaabun ŋŋmi ní an fōō ikuŋkum ki tin kɔ́ ubɔ saakun, ki wùn̄ bilee un bi cáńee, àá un baa láá cáńee àá un kaa láá lòon̄ee, un sēē ŋŋmee ń pà tin ŋŋmi wùn̄ee pu.

⁶«Ubɔ yaa tīī u-juti animbil àá tiwan tin pɔ̄ɔ̄ kudaauee yii ú dūú yóoń-u, ní unaayuu kɔ́ un fōō tiwanee dumpu ki yùn̄ tiwan gbantee, bi yaa cúú unaayuuyee, ú pà tiwan tin u yùn̄ee mili pu.

⁷Bi yaa kaa ká unaayuuyee, un fōō u-juti wanti ki yóoǹ u-ceeyee ń sútí kí pìl̄ Unimbɔti, kí pùtī yii waa gbēē u-juti wanti.

⁸Tibɔti tin kɔkɔ pu ní ni kpákà ní ibaamɔn kaa nyáńee, an yaa sá unaa pu àá kimaŋ pu àá upii pu àá tiwampeeŋkaal pu àá tiwan tiba tin wáŋkì bi dūu túǹ ubɔ puee, binib bili bin bíi kpákà mimmee ń cáań bi-bɔti Unimbɔti nimbiin. Un ní Unimbɔti yaa sāā diŋambil yii úǹ di yì dibɔkpilee ń pà tin pu bi kpákèe mili pu.

⁹«Ubɔ yaa dū u-maŋki àá u-naau àá u-piiiu àá u-ŋoobuu àá kuwaŋkuluu kubɔ ki kpāaǹ u-juti, ní kuwaŋkuluuee kpíì àá ku fōō tiweendi àá bi yùn̄-ku, ní báà ubɔ kaa ká kí lēē mmɔ́ɔnee,

¹⁰u-juti ń pùtī Unimbɔti yii waa gbēē u-bɔɔ wanti ní u-bɔɔ ń gbìl̄ kí tīiǹ-u. Mimmee waa ti pà kuwaŋkuluu gbanti pu.

¹¹Ama u-cee ní bi yaa yùn̄ kuwaŋkuluu gbantee, ú nyàab̀ kuwaŋkuluu kí téeǹ uwandaan.

¹²Upeecuncuti di yaa cúú kuwaŋkuluu gbantee, ú cáań ku-laakin kíǹee kí dàkà án nīn sá seera. Niinee waa ti pà kuwaŋkuluu kun an cúúyee pu.

¹³«Ubɔ yaa cūtìi pīnnì u-juti waŋkuluku ní ku ká tiweendi àá ku kpíì kuwaŋkuluu daan boonee, un pīnnì-kuee máaǹ kí pà uwandaan.

¹⁴An yaa sá uwandaan nimbiin ní míǹ jítèe, an kaa cáá ú pà tiba. Ama u yaa nìn fōō-ku ki ŋá gbaaree, ú pà gbaara nimbiliŋ.»

¹⁵Ubɔ yaa kíil̀ usapɔɔn un kaa láá cáá bɔɔnee ki dōoǹ nì uee, ú pà usapɔɔnee cootiiku pu kí cáá-u.

¹⁶U-baa yaa yíì kpataaa yii waa làá dū u-bisal kí tīī-uee, ú pà kii bi nín pée pà bisapɔmbi bin kaa nyí bininjabee cootiiku puee[71].

¹⁷Ní kpɔ̀ unimpu un yaa ŋáań kukpaŋkpantiiu tundee[72].

¹⁸Ubɔ yaa dōoǹ nì kuwaŋkuluuee, bí kpɔ̀ udaan[73].

¹⁹Un di yaa ŋá saraabi ki tīī awaa ní an kaa sá ti-Dindaanee, bí kpɔ̀ udaan[74].

²⁰«Ní taa sàaǹ unicaan un dɔ́miń ki kɔ́-ni ki bí ni-tiŋkinee, kí taa mùul̀-u. Di sá yii ni mun nìn kāl̀ kunicaŋu Eejipiti tiŋkin míǹ ní.

²¹Ní taa sàaǹ ukpiipu nì ditaŋkpiibil[75].

²²Ni yaa bíi sàantí-bi ní bi tíminsì an bāań-mee, m làá pīlifì bi-timinsii,

²³kí fōō diŋuul ni-pu, ní kí yàntī bí kpɔ̀-ni kujaaun. Niinee ni-nimpoobi làá kpántí bikpiipoobi ní ni-biyaamu ń kpántí ataŋkpiibil.

²⁴«Man nibul kansikin ubɔ àá usoodaan ubɔ yaa dɔ́miń ni-cee ki pīnnì animbilee, ní taa páań-u animbipaaŋkaa[76].

²⁵«A yaa fōō a-juti bɔkutikpaandi ki yóoǹ a-cee toolimee, á gíiǹ kí tīī-u kí wàatī ŋwìiń ń nín jēetí.

²⁶Kun puee kun u pée cáá kí bìin̄ u-ba puee kɔkɔ dee. A yaa kaa gíiǹ ki tīī-uee, u làá gíti ká ba kí bìin̄ kunyeeu? U yaa tíminsì ki yíiń-mi, m làá pīlifì-u, di sá yii m sá usaasɔl ní[77].

²⁷«Ní taa sìì man ni-Nimbɔtiu, kí taa tɔ̄ ni-bɔtiu un kpèé ni-nibulee mbusu[78].

²⁸«Ni máaǹ kí cáań ni-kpaajinti ticɔfikaal nì ni-dapeepeekaam min ni ŋmáaḿee kí ŋá-mi saraa. «Ní dū ni-biseebiyaamu nninjabiyaamu kí sú-mi.

²⁹«Míǹ mbaantiim ní ní tí dū ni-naai nì ni-piii nì ni-ŋoobui biseemaliŋ kí sú-mi. Tiwaŋkuti gbanti yaa màl̄ee, ti-biyaamuee ń nīn bí mu-na cee kí cáá sāā iwiin iluli. Winnii dalee ní cáań-mu kí dūú ŋá saraa kí tīī-mi.

³⁰«Ni làá nīn sá binib bin bí circiree ní m-cee. An puee ní taa ŋmɔ́ upeel un upeecuncuti cúú ki tɔ̄ntèe nanti[79]. Ní dū-tì kí tīī iboo.