Read Ntcham Exode 24 Bible Online

Exode 24 - Ntcham bible

Exode 24

¹Unimbɔti bí Mooyiisi yii: «Jɔ̄mìń m-cee, sii nì Aarɔn nì Nadaab nì Abiyuu nì Isirayeel yab kpilib imuŋku ita nì saalaayee. Ni yaa dòoń ki dáá bíń ndanee, ní gbàan̄.

²Ama sii Mooyiisi baba ń sútiń kí pìl̄-mi. Bin kíǹee ń taa sútiń, ní samaa mun ń taa nóó-si kí jɔ̄mìń.»

³Mooyiisi nìn cáá tibɔti nì marab bin kɔkɔ ti-Dindaan dàkā-uee ki máafì samaa. Ní samaa kíí nì kinyɔɔbaantii yii: «Tibɔti tin kɔkɔ ti-Dindaan sòon̄ee, ti làá ŋá míǹ.»

⁴Mooyiisi nìn ŋmàn̄ tibɔti tin ti-Dindaan tùkū-uee. Kutaa wúntì kutaafaau pɔ̀lpɔlee, ní Mooyiisi máń nsaraafan dijoolee taapu. U nìn dū ataŋkpee saalaa nì ali, Isirayeel naakɔti nín sá puee, ní ki máń.

⁵U nìn dū Isirayeel naacimpɔmbi biba ki tú bi cūtìi ŋá bisaraawɔkaabi. Bi nìn kūū inajaa mun ki ŋá mpèé saraabi.

⁶Mooyiisi nìn dū tiwaŋkutee fatikuu dijandi ki ŋá disambilin, ní ki dū dijandi din kíǹee ki kpáatìi pɔ̀l̄ nsaraafan pu.

⁷Boonee ní u yōoǹ dipoondi taŋkpapilinti ki kàan̄ mpɔn ki tīī samaa. Ní samaa kɔkɔ bí yii: «Tin kɔkɔ ti-Dindaan lēe, ti làá gbìl̄ kí tīiǹ-u kí ŋá míǹ.»

⁸Niinee Mooyiisi dū fatiku ki yāaǹ samaa pu ki bí yii: «Kpèèmaan, fatiku nee di sá dipoondi din ti-Dindaan pūtì ki pōoǹ-ni ki tīī-ni marabee daaŋku[89].»

⁹Mooyiisi ŋá míǹ ki dóòyee ní Aarɔn nì Nadaab nì Abiyuu nì Isirayeel yab kpilib binib imuŋku ita nì saalaayee nín jɔ́ḿ dijool yilpu.

¹⁰Bi nìn ká Isirayeel yab Nimbɔtiu. U-taaŋi taapuee, an nìn bí kii dikɔl din bi dū ataŋkpamɔnti ŋin bi yíì safiir ŋi wāĺ kílkil ki bɔ̀ǹ kii kutagbɔŋuee ki nákáǹee ní.

¹¹Ti-Dindaan kaa nìn yāntì Isirayeel yab kpilibee kpíì. U nìn yāntì bi kpēē úǹ Unimbɔti, boonee ní bi jíń ki nyùn̄.

¹²Ti-Dindaan bí Mooyiisi yii: «Jɔ̄mìń m-cee dijool pu kí dāá yūĺ niin. M làá dū marab bin m ŋmàn̄ ataŋkpee pilinti puee kí tīī-si, á cáá dàkà Isirayeel yab.»

¹³Niinee ní Mooyiisi yíkì kutaafaau u nì Joosuwa un u dūu ŋàl̄ u-bee, ní bi nín jɔ́ḿ Unimbɔti jool pu.

¹⁴U tùkū Isirayeel kpilib yii: «Ní cīití-ti doo, timbi ń cù kí gítiń. Aarɔn nì Uur làá nīn bí ni-cee. Ubɔ yaa cáá tibee, udaan ń ká-bi.»

¹⁵Ní Mooyiisi nín jɔ́ḿ, ní ditagbandi dɔ́miń ki bīiǹ dijool pu.

¹⁶Ti-Dindaan nyooti nìn bí Siinaayi jool pu ní ditagbandi nìn bīī di-pu míǹ ki tin cáa sāā iwiin iluu. Ŋwinluluúti dalee ní ti-Dindaan yíiń Mooyiisi ditagbandee poon.

¹⁷Ti-Dindaan nyooti tin nìn dɔ́miń Isirayeel yab ceeyee nìn bí kii ŋŋmi ŋun pɔ̄ɔ̄ kpaŋkpamee ní dijoolee yil pu.

¹⁸Mooyiisi nìn kɔ́ ditagbandee poon ki nín jɔ́ḿ dijool pu. U nìn gbíntì dijool pu niin ki ŋá iwiin imuŋku ili, ŋwiimpu nì kunyeeu[90].