Read Ntcham Exode 25 Bible Online

Exode 25 - Ntcham bible

Exode 25

¹Ti-Dindaan bí Mooyiisi yii:

²«Tùkù Isirayeel yab yii bí lēē bi-gaajati tin bi cááyee poon kí ŋá-mi saraa. Bin kɔkɔ làá tīī nì dipɔbil dibee cee ní ní fōō.

³Tin m là bí cáań kí ŋá saraayee di sá sindaariya nì animbil kúti nì tasa kúti,

⁴nì bigulifamambi nì gulfab bin bí gùŋgumee nì bigulifamambi cínciŋ nì iŋaapiin in bí fálfalee nì tiŋɔkuti,

⁵nì ipigban in bi mántèe, nì igban in dàfì tikpilee, nì akasiya dɔi,

⁶nì ŋkpam min bi làá nīn cáa ŋáań fitilabinee, nì talaalu kpam min bi làá nīn cáa sìtī binib pu kí dū-bi kí sú man ni-Dindaanee, nì talaalub bin bi làá nīn tùutēe,

⁷nì ataŋkpanyaan ŋin bi yíì ooniikisee nì ataŋkpanyaan aba mun bí dūú nákań eefoodi[91] nì kilɔbiki kin pāantí usaraaŋakpil bindi puee.

⁸Isirayeel yab ń gāā-mi circir kɔŋkooŋŋu, ní ḿ nīn kóò bi-kansikin.

⁹M làá dàkà-si ni nín làá gāā ŋkɔŋkoon gbanti ń nīn bí puee, nì tin kɔkɔ làá nīn bí ŋu-poonee. Ní dāá ŋá m nín dàkā-ni puee deedee.»

¹⁰«Ní dāá dū akasiya dɔŋu kí kpáá dakaa. U-púuŋŋu ń nīn cáá meeta ubɔ nì santimeetab mmuŋku nì biŋmoo, u-waaŋŋu ń nīn cáá santimeetab biŋmoo kpá imuŋku inaa ní u-fɔkɔŋŋu ń nīn cáá santimeetab biŋmoo kpá imuŋku inaa.

¹¹Ní dū sindaariyamɔnti kí nyùntī poon nì boon, ní kí dū sindaariya kí kpākam̀ anyɔɔgbán.

¹²Ní dū sindaariya kí mɔ́ɔ́ abɔmbil anaa kí báań dakaayee kpiŋŋi naatil dijandi diba abɔmbil ali, diba mun abɔmbil ali.

¹³Ní kpítí akasiya kpandɔi kí dū sindaariya kí nyùntī-i.

¹⁴Ní dū ikpandɔee kí bɔ̄ abɔmbil ŋin bá dakaayee kpiŋŋi an càatī bí ŋmā kí nīn yòontí ki bùkuntí.

¹⁵Ikpandɔee ń nīn pée fúuń abɔmbilee poon bí taa fúutí.

¹⁶Ní dū titaŋkpapilindi tin pu m ŋmàn̄ dipoondi marab ki làá dūú tīī-nee kí tàkan̄ dakaayee poon.

¹⁷«Ní dū sindaariya kí mɔ́ɔ́ dakaayee bìil, di-púuŋŋu ń nīn cáá meeta ubɔ nì santimeetab mmuŋku nì biŋmoo ní di-waaŋŋu ń nīn cáá santimeetab biŋmoo kpá imuŋku inaa.

¹⁸Ní dū sindaariya kí mɔ́ɔ́ keerubimbi bili kí tɔ́kɔń didakaabiilee nyɔɔgbaŋŋi liitil pu.

¹⁹Ní mɔ́ɔ́ Keerubim ubɔ kí tɔ́kɔń didakaabiil nyɔɔgbandi diba nín kúntí puee, ní kí mɔ́ɔ́ Keerubim ubɔ mun kí tɔ́kɔń didakaabiil nyɔɔgbandi din kíǹee nín kúntí puee. Keerubimbi bin tɔ́kɔ́ anyɔɔgbán kúntilaŋki puee nì dakaayee bìil ń kpāfì kí nīn sá tiwambaantiil.

²⁰Bí kpátí bi-feeŋyi yilpu kí bìin̄ didakaabiil pu. Bí nīn tɔ́kɔ́ ki túĺ tɔb bi-nimbiiŋyi tīī didakaabiil pu.

²¹Ni yaa dū dipoondi taŋkpapilinti tin pu m ŋmàn̄ dipoondi marab bin m làá tīī-see ki ŋá dakaayee poonee, ní dū dibìil kí púkuń.

²²Keerubimbi bili bin tɔ́kɔ́ didakaabiil puee kansikin ní m làá lēē m-ba kí dàkà-si, ní kí tīī-si marab á dūú nàatī Isirayeel yab.»

²³Ní dū akasiya dɔŋu kí kpáá teebil, u-púuŋŋu ń nīn cáá meeta ubɔ, u-waaŋŋu ń nīn cáá meeta dijandi, ní u-fɔkɔŋŋu ń nīn cáá santimeetab biŋmoo kpá imuŋku inaa.

²⁴Ní dū sindaariyamɔnti kí nyùntī-u, ní kí dū sindaariya kí nyùntī ikpaanceeti kɔkɔ kí tū.

²⁵Ní kí kpítí kidɔpampaŋ, kí nīn wāā kii santimeetab binii kí kpākam̀ anyɔɔgbán, kí dū sindaariya kí nyùntīí tū.

²⁶Ní mɔ́ɔ́ sindaariya bɔmbiliŋ anaa kí dūú bā kí nákáǹ teebilee kpiŋŋi naatil pu, ataa cee.

²⁷Abɔmbilee làá nīn nákáǹ teebilee kpaanceetii, ní bí dū ikpandɔ kí bɔ̄ abɔmbilee poon kí ŋmā kí nīn yòontí.

²⁸Ní dū akasiya dɔŋu kí kpítí ikpandɔ, kí dū sindaariya kí nyùntī-i. Íǹ ní ni làá nīn cáa yòontí teebilee.

²⁹Ní mɔ́ɔ́ palantab nì kɔɔpub nì asambil nì itúun bí nīn cáa ŋáań ndaam ki féeń ti-Dindaan. Ní dū sindaariyamɔnti kí mɔ́ɔ́ an wanti gbanti.

³⁰Teebil gbanti pu ní ni làá nīn cáá kpɔnɔb bin ni cáa ŋáań saraayee ki pāantí m-nimbiin baabadal[92].

³¹«Ní gbá sindaariyamɔnti kí dūú mɔ́ɔ́ fitila tɔ́kɔŋkaati. U-taapu nì u-kpinjaatiŋu nì u-kpiiŋyi nì u-gbiŋŋi nì u-pumpukum kɔkɔ ń nīn sá mmɔm.

³²Ikpiin iluu ń nyānní ŋkpinjaatee pu, dijandi kamaa ń nīn cáá ikpiin ita ita.

³³Fitilab tɔ́kɔŋkaati gbanti kpiiŋyi luutil kamaa ń nīn cáá ŋkɔŋkɔŋkuŋkumu muta mun náań nì asubil ŋin bi yíì amandee nì agbin nì mpumpukum.

³⁴Ŋkpinjaatee ń nīn cáá ŋkɔŋkɔŋkuŋkumu munaa mun náań nì asubil ŋin bi yíì amandee nì agbin nì mpumpukum.

³⁵Fitila tɔ́kɔŋkaati kpinjaatiŋu laakin ikpiin iluuyee dòoń ki kpáfí ili ilee ń nīn cáá digbindi diba. Ikpin ili ipeekaa nín kpáfí laakiŋyee digbindi diba, ililiiti nín kpáfí laakiŋyee digbindi diba, itataati nín kpáfí laakiŋyee digbindi diba.

³⁶Agbin nì ikpiinee nì fitilab tɔ́kɔŋkaati jaŋŋi ŋin kíǹee ń nīn sá mmɔm. Bí gbá sindaariyamɔnti kí dūú mɔ́ɔ́ tikɔkɔ.

³⁷Ní mɔ́ɔ́ fitilab biluli[93] kí dūu tɔ́kɔń fitilab tɔ́kɔŋkaati pu, án nīn wāĺ nnimbiin pú.

³⁸Ní dū sindaariyamɔnti kí mɔ́ɔ́ tibabiti nì nsambiyaamu mun poon bi ŋáań ŋfantamee.

³⁹Ní dū sindaariyamɔnti kiiloobi mmuŋku nì saalaa kí mɔ́ɔ́ fitilab tɔ́kɔŋkaati nì ti-wanti kɔkɔ.

⁴⁰Á kpèè tiŋan kí ŋá tin bí nee kɔkɔ tí nīn bí kii min m dàkā-si dijool nee puee[94].»