Read Ntcham Exode 26 Bible Online

Exode 26 - Ntcham bible

Exode 26

¹«Á dū gulfab bin dàfì ki máǹ gùŋgumee nì bin máǹ cínciŋee nì bin máǹ wèeeeyee kí lù aŋaajan saalaa, kí lù keerubimbi kí nákań ŋi-pu.

²Aŋaajanee fɔkɔŋŋu ń nīn sá meetab ubɔ kpá saalku, ŋi-waaŋŋu ń nīn sá meetab bili. Ŋi-kɔkɔ ń nīn ŋmà.

³Á dá láá dū aŋaajan aŋmoo kí ŋáĺ kí kpāfì, ní boonee kí dū aŋmoo ŋin kíǹee mun kí ŋáĺ kí kpāfì.

⁴Á dū ŋŋaacalimu mun máǹ gùŋgumee kí kpākam̀ aŋaajan aŋmoo ŋin bi ŋáĺ ki kpáfì mpeekaamee diŋaajandi din lúŋkèe nyɔɔgbandi, nì ŋin bi ŋáĺ ki kpáfì nliliitiimee din pééyee nyɔɔgbandi.

⁵A nín ŋáĺ aŋaajan aŋmoo aŋmoo ki kpáfì puee kamaa nyɔɔgbandi ń nīn cáá ŋŋaacalimuee imuŋku ili nì saalaa, ní ajanliitilee ŋaacalimmu ń nīn ŋmà.

⁶Á dū sindaariya kí mɔ́ɔ́ titábikaal imuŋku ili nì saalaa kí cúú ajanliitil kí kpāfì, án nín làá ŋá pu tanti kɔkɔ ń dūú ŋá tiwambaantiilee.

⁷«Boonee á dū tiŋɔkuti kí lù aŋaajan saalaa nì diba kí dūú ŋá tanti liliiti un làá nīn bìintí circir kɔŋkooŋŋu puee.

⁸Diŋaajandi kamaa fɔkɔŋŋu ń nīn sá meetab saalku, ŋwaan ń nīn sá meetab bili. Ŋi-kɔkɔ fɔkɔŋŋu nì ŋi-waaŋŋu ń nīn ŋmà.

⁹Á dū ajan aŋmoo kí ŋáĺ kí kpāfì ubaanti, ní kí dū aluu mun kí ŋáĺ kí kpāfì ubaanti. Á dū diŋaajandi diluluutiilee kí kpáb́ nnimbiin pú.

¹⁰Á dū ŋŋaacalimu imuŋku ili nì saalaa kí kpākam̀ aŋaajan aŋmoo ŋin bi ŋáĺ ki kpáfèe diŋaajandi din lúŋkèe nyɔɔgbandi, nì aluu ŋin bi ŋáĺ ki kpáfèe din pééyee nyɔɔgbandi.

¹¹Á dū tasa kúti kí mɔ́ɔ́ titábikaal kí dūú nákań ŋŋaacalimu pu kí dūú cúú diŋaajandi din kíǹee kí táb́, ní án dūú ŋá tiwambaantiil.

¹²Ŋwaan puee, aŋaajan ŋin a làá dūú kpāfì kí bìin̄ circir kɔŋkooŋŋu puee, dijandi diba làá kíǹ kí nīn jòon̄ boon pú fám.

¹³Míǹ ní ŋŋaabu meeta dijandi làá kíń ŋfɔkɔn pu kí nīn jòon̄ ajanliitil pu kí bìin̄ circir kɔŋkooŋŋu kɔkɔ pu.

¹⁴Á dāá mántí tipigban kí dūú bìin̄ tanti un bīī circir kɔŋkooŋŋu puee, ní kí dū ŋgban ŋun dàfèe kí páań.

¹⁵«Á dū akasiya dɔŋu kí kpáá idɔjaati kí cóoń án nīn ŋúb́ circir kɔŋkooŋŋu.

¹⁶Idɔjaatee fɔkɔŋŋu làá nīn sá meetab biŋmoo, ní i-waaŋŋu ń nīn sá santimeetab biŋmoo kpá imuŋku inaa.

¹⁷Á cáká idɔ ili in làá càatēe taapui í nīn kɔ́ĺ tɔb ili ili. Á ŋá idɔjaatee kɔkɔ pu míǹ.

¹⁸Á kpáá idɔjaati mmuŋku circir kɔŋkooŋŋu ŋgiil pú.

¹⁹Á dū animbil kúti kí mɔ́ɔ́ titílkaal imuŋku ili. Tíǹ pu ní a nín kpáá idɔjaati puee làá nīn tɔ́kɔ́. A nín kpáá idɔjaati puee kamaa làá nīn cáá titílkaal tili tin poon ní laakin a cákée làá kɔ́ee.

²⁰Á gíti kpáá idɔjaati mmuŋku circir kɔŋkooŋŋu ŋgan pú.

²¹Á dū animbil kúti kí mɔ́ɔ́ titílkaal imuŋku ili, ndɔjaati kamaa titílkaal tili.

²²Circir kɔŋkooŋŋu boon pú jandi din bí ŋwìiń jeetilaŋki púee, á dāá kpáá idɔjaati iluu kí cóoń.

²³Á dāá kpáá idɔjaati ili kí cóoń akpin pu poon pú án nīn tíkí circir kɔŋkooŋŋu.

²⁴Idɔjaati gbanti taapui làá nīn dátiǹ tɔb, ama ní kí tin dūú kpāfì yilpu dibɔmbibaantiilin. Míǹ ní idɔjaati liitilee làá nīn sá tiwambaantiil ní kí nīn sá titíkiŋkaal.

²⁵Mimmee idɔjaatee làá nīn sá inii dee, ní i-taapu tílkaati ń nīn sá saalku nì ubɔ, an dàkà yii ndɔjaati ŋubɔ titílkaal tili.

²⁶«Á dū akasiya dɔŋu kí kpítí ikalim iŋmoo kí cúú idɔjaati in a kpááyee circir kɔŋkooŋŋu jandi diba.

²⁷Á kpítí ikalim iŋmoo mun kí cúú dijandi din kíǹee, ní kí kpítí iŋmoo mun kí cúú boon ŋwìiń jeetilaŋki pú.

²⁸Ŋkalim ŋun bí kansikinee làá jītí idɔjaati in bi kpááyee kansikin nì kansikin ní, kí yòon̄ circir kɔŋkooŋŋu kílilaŋki kí tin cáá kátí.

²⁹Á dū sindaariya kí nyùntī idɔjaati in bi kpááyee nì ikalimee pu, ní kí dū sindaariya kí mɔ́ɔ́ mbɔmbiyaamu mun poon ní bi làá dū ikalimee kí bɔ̄ee.

³⁰Á gāā circir kɔŋkooŋŋu kii m nín dàkā-si min dijool pu nee deedee.

³¹«Á dū gulfaman gùŋgum nì uman wèeee nì uman cínciŋ nì gulfa un bí fálfal ki dàfèe kí lù ŋŋaasakaŋkaa, kí lù keerubimbi kí nákań ŋŋaabuee pu.

³²Á dū-ŋu kí sàkan̄ akasiya dɔjaai inaa in bi dū sindaariya ki nyūntì ní sindaariya babikaati túuń animbil kúti tinaa tíĺ taapuee pu.

³³Á dū ŋŋaasakaŋkaayee kí lúntí tibábikaalee taapu. «Ŋŋaasakaŋkaayee boon ní a làá dū Dipoondi dakaau kí yóoń. Ŋúǹ di làá yàkatī <circir laŋki> nì <circir páaa laŋki[95].>

³⁴Á dū dibìil kí púkuń dipoondi dakaau pu <circir páaa laŋki>.

³⁵Á kɔ́ǹ teebil kí yóoń poon ŋŋaasakaŋkaa nimbiin circir kɔŋkooŋŋu ŋgan pú, ní ŋgiil púee, fitilab tɔ́kɔŋkaati ń nīn yú ki túĺ teebil.

³⁶«Á dū gulfa un bí fálfal ki dàfèe, nì un máǹ gùŋgumee nì un máǹ cínciŋee nì un máǹ wèeeeyee kí lù ŋŋaasakaŋkaa ŋubɔ mun, usatalul ń nyāantì-ŋu bí dūú sàkan̄ circir kɔŋkooŋŋu punyɔkɔki pu.

³⁷Á kpítí akasiya dɔjaai iŋmoo, kí dū sindaariya kí nyùntī-i kí dūú cóoń, ní kí dū titábikaal tin bi dū sindaariya ki mɔ́ɔ́yee kí bā, ní kí dū tasa kúti kí nyùntī titílkaal tiŋmoo kí tíĺ idɔjaatee taapu.»