Read Ntcham Exode 27 Bible Online

Exode 27 - Ntcham bible

Exode 27

¹«Á dū akasiya dɔŋu kí kpáá nsaraafan ŋun cáá ajannaatil ŋmèe. Dijandi diba ń nīn cáá meetab bili nì dijandi, ní ŋu-fɔkɔŋŋu ń nīn sá meeta ubɔ nì dijandi.

²Ŋu-jaŋŋi naatil kpiŋŋi puee, á kpítí kí lēē iyin án jɔ̄m̀, i nì nsaraafan ń nīn sá mmɔm, ní á dū tasa kúti kí nyùntī.

³Á dū tasa kúti kí mɔ́ɔ́ tin kɔkɔ bi làá nīn cáa tūǹ nsaraafan pu tundee. An dàkà yii asambil ŋin poon bi làá nīn fà ŋkpam min bi wùn̄ee fantam ki ŋáańee nì peelab nì asambil ŋin poon bi làá nīn ŋáań fatiku ki cáa yàantée, nì njiimu mun cáá anyinee nì nsambiyaamu mun poon bi tùutī talaaluee.

⁴Á dū tasa kúti kí mɔ́ɔ́ kilàaŋ́ŋi ní kí ŋá ki-jaŋŋi naatil pu abɔmbil

⁵kí dūú nákań nsaraafan taapu kí màntīí tū ní án jɔ̄mìń kí dāá ŋmàntī ŋu-kansikin.

⁶Á dū akasiya dɔŋu kí kpítí ikpandɔ, kí dū tasa kúti kí nyùntī-mu.

⁷Á dū ikpandɔee kí bɔ̄ abɔmbil ŋin bí nsaraafan jaŋŋi puee poon bí ŋmā kí nīn yòontí-ŋu.

⁸Á dū ndɔ kí kpáá nsaraafan gbanti, ŋu-poon ń nīn dɔ̄ fám tiba ń taa nín kā. Á kpáá-ŋu kii m nín dàkā-si dijool nee pu á kpáá puee.

⁹«Á yàntī circir kɔŋkooŋŋu ń nīn cáá dicindi. Á dū gulfa un dàfèe kí lù satab kí dūú bàkā ŋgiil pú, ŋfɔkɔn ń nīn sá meetab imuŋku ili nì saalaa.

¹⁰Á dū mbɔmbilɔ̀kɔkaamu nì tibakaal tin bi dū animbil kúti ki mɔ́ɔ́yee kí cúú satabee kí dūú sàkan̄ idɔjaa mmuŋku in bi dū tasa kúti ki mɔ́ɔ́yee pu. Idɔjaayee làá nīn cáá titílkaal mmuŋku tin bi dū tasa kúti ki mɔ́ɔ́yee.

¹¹Á ŋá míǹ mbaantiim ŋgan pú jandi mun. Niin mun ń nīn cáá satab meetab imuŋku ili nì saalaa ki sàkā idɔ mmuŋku in tílkaati sá tasa kútee, nì in pu animbil kúti bɔmbilɔkɔkaamu nì ti-bakaati bée.

¹²Circir kɔŋkooŋŋu ŋwaan pu ŋwìiń jeetilaŋki watilee, satab fɔkɔŋŋu ń nīn sá meetab mmuŋku nì biŋmoo, kí nīn sàkā idɔjaa saalaa in tɔ́kɔ́ titílkaal saalaa mun puee.

¹³Circir kɔŋkooŋŋu cindi ŋwaan pu dijandi din bí ŋwìiń nyalaŋki watilee mun ń nīn cáá meetab mmuŋku nì biŋmoo.

¹⁴Dijandi diba pú satab fɔkɔŋŋu ń nīn sá meetab biluli nì dijandi, nì idɔjaa ita nì i-taapu tílkaati tita.

¹⁵Dijandi din kíǹee pú satab fɔkɔŋŋu ń nīn sá meetab biluli nì dijandi, nì idɔjaa ita nì i-taapu tílkaati tita.

¹⁶Circir kɔŋkooŋŋu mɔŋkiŋu punyɔkɔ ŋaasakaŋkaaŋu fɔkɔŋŋu ń nīn sá meetab saalaa. Á dū gulfa un dàfì kí máǹ gùŋgumee, nì un máǹ cínciŋee, nì un máǹ wèeeeyee kí nyāantì-i. Í nīn sàkā idɔjaa inaa in tɔ́kɔ́ titílkaal tinaa mun puee.

¹⁷Á dū tibakaal tin bi dū animbil kúti ki mɔ́ɔ́yee kí cúú idɔjaa in bi cóoǹ ki māntìi tú circir kɔŋkooŋŋu cindee kí kpāfì. Á dū animbil kúti kí mɔ́ɔ́ mbɔmbilɔ̀kɔkaamuee, ní kí dū tasa kúti kí mɔ́ɔ́ idɔjaa tílkaati.

¹⁸Circir kɔŋkooŋŋu cindi púuŋŋu fɔkɔŋŋu ń nīn sá meetab imuŋku ili nì saalaa, ŋu-waaŋŋu ń nīn sá mmuŋku nì biŋmoo, ní aŋaajan fɔkɔŋŋu ń nīn cáá meetab bili nì dijandi. Idɔjaa tílkaati ń nīn sá tasa kúti.

¹⁹Á dū tasa kúti kí mɔ́ɔ́ tin kɔkɔ bi làá nīn cáa tūǹ circir kɔŋkooŋŋu poon tundee ki kpáaǹ circir kɔŋkooŋŋu kpakpaaŋi nì ŋu-cindi yaŋ.»

²⁰«Á tùkù Isirayeel yab yii bí cáań-si ɔliifi kpam min ŋān̄ ki wāĺ kílkilee á nīn cáa sìtī fitilab poon, án nín làá ŋá pu fitilab ń nīn pée fòol̄ ŋyunti kamaayee.

²¹Aarɔn nì u-jipɔmbi ń dāá dū fitilab tɔ́kɔŋkaati kí yóoń circir kɔŋkooŋŋu poon ŋŋaapìtikaa ŋun lìkī baa wāĺ Dipoondi dakaauee nimbiin. Aarɔn nì u-jipɔmbi ń bɔ́ntí fitilab gbanti tiŋan án nín làá ŋá pu bí nīn pée fòol̄ ŋyunti kamaa m-nimbiin kí yòon̄ kujoou kí cáá sāā kutaafaauee. An sá mara ní m yóoǹ Isirayeel yab bí nīn ŋáań míǹ kí nīn pée cáa cá jaanjaan.»