Read Ntcham Exode 28 Bible Online

Exode 28 - Ntcham bible

Exode 28

¹«Á yàntī a-nabiki Aarɔn nì u-jipɔmbi, Nadaab nì Abiyuu nì Eeleeyasaar nì Itamaar ń dāan̄ a-cee. Á gàntī-bi Isirayeel yab kansikin bí nīn tūǹ man saraaŋatundi.

²Á ŋáĺ a-nabiki Aarɔn circir wampeeŋkaati án nīn cáá kunyaaŋŋu ki dàkà usaraaŋakpil nyooti.

³Á sòoǹ nì bitɔntɔnliibi bin kɔkɔ m gbéeǹ iciin famee, kí yàntī bí ŋáĺ Aarɔn tiwampeeŋkaal. Ú dāá nīn pēē-tì ní á dū-u kí sú-mi ú nīn bí man saraaŋatundin.

⁴Tiwampeeŋkaal tin a làá yàntī bí ŋáĺ-uee di sá kilɔbiki kin làá nīn pá u-bindi puee nì eefoodi nì dibɔkutifɔkɔl nì poon bɔkutil nì ŋŋaabu ŋun u làá nīn cáa fìǹ u-yilee nì ŋŋaabu dambalau. Á yàntī bí ŋáĺ tiwan gbanti kí tīī Aarɔn nì u-jipɔmbi bí nīn tūǹ man saraaŋatundi.

⁵Bí dū gulfab bin cáá sindaariya nyimee nì bin máǹ gùŋgumee, nì bin máǹ cínciŋee nì bin máǹ wèeeeyee nì bigulifapimbi bin dàfèe, kí lù tiwampeeŋkaal gbanti.»

⁶«Bitɔntɔnliibi ń dū gulfab bin cáá sindaariya nyimee nì bin máǹ gùŋgumee nì bin máǹ cínciŋee nì bin máǹ wèeeeyee nì bigulifapimbi bin dàfèe kí lù eefoodi.

⁷Bí ŋáĺ ŋŋaacalimu muli kí bā ajan liitil nyɔɔgbaŋŋi bí nīn cáa cútí.

⁸Bí ŋáĺ eefoodi nì dambala un u làá nīn cáa cútée ń nīn sá tiwambaantiil. Bí dū gulfab bin cáá sindaariya nyimee nì bin máǹ gùŋgumee nì bin máǹ cínciŋee nì bin máǹ wèeeeyee nì bigulifapimbi bin dàfèe kí ŋáĺ dambala mun.

⁹Á dū ataŋkpanyaan ŋin bi yíì soowamee ali, kí dū kigaai kí ŋmà Jaakɔb jipɔmbi yiŋŋi ataŋkpeeyee pu.

¹⁰Á ŋmà ditaŋkpapeekaal pu ayin aluu, ní kí ŋmà dililiitiil mun pu ayin aluu, án nīn nóó Jaakɔb jipɔmbi nín kpíǹ kpíǹ tɔb puee.

¹¹Á dū kigaai kí cáká Jaakɔb jipɔmbi yiŋŋi ataŋkpeeyee pu kii bi nín cákà kijalii puee, ní kí mɔ́ɔ́ sindaariya sɔnti kí dūú fúuń.

¹²Á dūú bā ŋŋaacalimu mun bi ŋáĺ ki tábíǹ eefoodee. Ataŋkpeeyee di làá nīn sá kii kudaaŋŋu ki téetí Jaakɔb jipɔmbi pu. Mimmee bi-yiŋŋi làá nīn náká Aarɔn gbigbipati liitil pu man ni-Dindaan nimbiin, ní ḿ nīn pée téetí bi-pu.

¹³Á dū sindaariya kí mɔ́ɔ́ tisɔnee liitil,

¹⁴ní kí dū sindaariyamɔnti kí mɔ́ɔ́ ikusaka ili mpalimu yam kí dūú cúú tisɔn tin poon ataŋkpeeyee fúuńee.»

¹⁵«Á yàntī bitɔntɔnliibi ń dū gulfab bin cáá sindaariya nyimee, nì bin máǹ gùŋgumee nì bin máǹ cínciŋee nì bin máǹ wèeeeyee nì bigulifapimbi bin dàfèe kí lù kilɔbiki kin pāantí usaraaŋakpil bindi puee kí nákań eefoodi pu.

¹⁶Kilɔbiki gbanti jaŋŋi naatil ń nīn ŋmà ní dijandi kamaa ń nīn cáá santimeetab mmuŋku nì biŋmoo.

¹⁷Á dū ataŋkpanyaan kí nákań ikuul inaa ki-pu kí nyāantì-kì. Ŋkuupeepeekaa ń nīn sá ataŋkpanyaan ŋin bi yíì oodeemee, nì ŋin bi yíì piitidaayee nì ŋin bi yíì bareekeetee.

¹⁸Ŋkuuliliiti ń nīn sá ataŋkpanyaan ŋin bi yíì noofeekee, nì ŋin bi yíì safiiree nì ŋin bi yíì yaaliimee.

¹⁹Ŋkuutataatee ń nīn sá ataŋkpanyaan ŋin bi yíì leeseemee nì ŋin bi yíì seebooyee nì ŋin bi yíì alamaayee.

²⁰Á dū ataŋkpanyaan ŋin bi yíì taarsiisee nì ŋin bi yíì soowamee, nì ŋin bi yíì yaasipee kí nákań ŋkuunanaati pu. Á dū sindaariya kí mɔ́ɔ́ tisɔn tin poon a làá dū ataŋkpanyaanee kí fúuńee.

²¹Á dū kigaai kí cáká Jaakɔb jipɔmbi saalaa nì bilee yiŋŋi ataŋkpanyaanee pu kii bi nín cákà kijalii pu puee. Ditaŋkpanyaandi kamaa puee, á ŋmà kunaakoou kubɔ yindi, di sá tinaakɔti sá saalaa nì tili ní.

²²«Á dū sindaariyamɔnti kí mɔ́ɔ́ ikusaka ili mpalimu yam kí dūú cúú kilɔbikee.

²³Á dū sindaariya kí mɔ́ɔ́ mbɔmbiyaamu muli kí túuń kilɔbikee nyɔɔgbaŋŋi liitil.

²⁴Á dū sindaariya kusakayee kí bɔ̄ mbɔmbiyaamu muli mun túuń kilɔbikee nyɔɔgbaŋŋi buŋyin,

²⁵ní kí dū anyɔɔgbán ali ŋin kíǹee kí bā sindaariya sɔnti tili tin poon ní ataŋkpanyaan fúuń eefoodi ŋaacalimmu puee, ní an nīn bí kilɔbikee nyɔkɔpu.

²⁶Á dū sindaariya kí gíti mɔ́ɔ́ mbɔmbiyaamu muli kí dūú bā kilɔbikee nyɔɔgbaŋŋi taapu jandi án nīn nákáǹ eefoodi.

²⁷Á dū sindaariya kí mɔ́ɔ́ mbɔmbiyaamu muli mun kí dūú bā iŋmii in bí eefoodi ŋaacalimmu puee taapu nnimbiin pú, laakin bi ŋáĺ ki táb́ee caŋin. Mbɔmbiyaamu gbanti làá nīn bí eefoodi dambalau yilpu pu ní.

²⁸Á dū gulfaman gùŋgum ŋmiiŋu kí bɔ̄ kilɔbiki bɔmbiliŋ nì eefoodi bɔmbiliŋin kí kúĺ, ní kilɔbikee ń nīn pá eefoodi dambalau pu ki pɔ̄ɔ̄ kaa cìŋkī.

²⁹«Ŋyunti kamaa Aarɔn yaa kɔ́ circir kɔŋkooŋŋunee, Jaakɔb jipɔmbi yiŋŋi làá nīn náká kilɔbiki kin pá u-bindi puee. Mimmee man ni-Dindaan làá nīn pée téetí ni-pu.

³⁰Á dū Uriim nì Tumiim[96] kí ŋá kilɔbiki kin pá usaraaŋakpil bindi puee poon. Mimmee án làá nīn pá u-bindi pu ŋyunti ŋun u yaa làá kɔ́nní m-nimbiinee. Di sá yii u yaa bí m-nimbiinee, an máaǹ kí nīn pée pá u-bindi pu ní ú ŋmā kí béé min ní m là Isirayeel yab ń ŋée.»

³¹«Boonee á dū gulfab bin máǹ gùŋgumee kí lù dibɔkutifɔkɔl din pu eefoodi làá nīn pée.

³²Á lēē di-kansikin kinyɔkɔ, u yaa làá pèen̄ee ú dū u-yil kí bɔ̄ niin. Á lù kinyɔkɔee nyɔɔgbaŋŋi ń nīn gbìfì ki dàfì kí taa ŋmā kí cátí.

³³Á dū gulfab bin máǹ gùŋgumee nì bin máǹ wèeeeyee nì bin máǹ cínciŋee kí lù asubil ŋin bi yíì greenaadee kí lúntí dibɔkutilee júti taapu kí màntīí tū, ní kí dū sindaariya waŋkilimmu mun kí lúntí dibɔkutilee júti taapu kí màntīí tū.

³⁴Á dū sindaariya waŋkilimmu nì greenaadi subiliŋ ŋin ni lùn̄ee kí lúntí dibɔkutil júti taapu kí nīn sākantí kí màntīí tū.

³⁵Aarɔn yaa làá kɔ́ circir kɔŋkooŋŋun kí ŋá saraabi kí tīī-mee, ú nīn pēē dibɔkutil gbanti ní bí nīn gbìl̀ ŋwaŋkilimu siim pu, ní u yaa làá tí nyēē bí nīn gbìl̀ mu-pu. Mimmee waa làá kpú.

³⁶«Á dū sindaariyamɔnti kí nyùntī kí nántiǹ mpumpukum, ní kí ŋmà an pu kii bi nín ŋmà kijalii pu puee yii: <Bi dū-u ki sú ti-Dindaan>.

³⁷Á dū gulfa un máǹ gùŋgumee kí lù kiŋaacaliŋ kí dūú cúú kí nákań ŋŋaabu ŋun u cáa fìǹ u-yilee nyɔkɔpu pú.

³⁸Sindaariya pumpukumee làá nīn pée bí Aarɔn yigbeel pu, án nín làá ŋá pu ú fōō Isirayeel yab nín yīntiǹ circir wanti tin kɔkɔ bi cáań ki ŋá saraayee kpitii kí túńee. Sindaariya pumpukumee làá nīn pée bí u-yigbeel pu ní man ni-Dindaan ń nín fōō saraabi gbanti.

³⁹«Boonee á dū ŋŋaapiin ŋun bí fálfalee kí ŋáĺ Aarɔn bɔkutifɔkɔl poon yal, ní kí dū ŋŋaapiin ŋun bí fálfalee kí lù ŋŋaabu ú nīn cáa fìǹ u-yil ní kí ŋáĺ ŋŋaabu dambalau kí gbá-u.

⁴⁰«Ní ŋáĺ tiwan gbanti tibaantiil, an dàkà yii dibɔkutifɔkɔl poon yal nì dambala nì ŋŋaabu ŋun bi cáa fìǹ diyilee kí tīī Aarɔn jipɔmbi, án nīn cáá kunyaaŋŋu kí dàkà usaraaŋal nyooti.

⁴¹«Á dū asaraaŋabɔkuti gbanti kí pèen̄ a-maan Aarɔn nì u-jipɔmbi. Á sìtī bi-yiliŋ ŋkpam kí dū-bi kí sú-mi bí nīn bí m-tundin. Mimmee a dū-bi ki sú-mi bi kpántì m-saraaŋaliibi dee.

⁴²Á dū ŋŋaapiin ŋun bí fálfalee kí ŋáĺ-bi ncukutigimu kí bìin̄ bi-cancaŋgbeel pu, kí yòon̄ bi-caŋ kí cáá sāā bi-tapaŋŋi.

⁴³Aarɔn nì u-jipɔmbi yaa làá kɔ́ circir kɔŋkooŋŋun àá bi yaa làá sútí kí pìl̄ nsaraafan kí tɔ̄ circir laŋki ditundee, bí dū ncukutigimuee kí lòon̄. Mimmee baa làá ŋá ikpiti in làá cáań-bi ŋkúmee. Án nīn sá mara un kaa kpántée ki tīī Aarɔn nì u-naantiibi bin làá dāá páań u-boonee.»